Enski boltinn

Ronaldo svaraði því af hverju hann hafnaði boði um hæstu laun sögunnar

Sindri Sverrisson skrifar
Cristiano Ronaldo segist hafa séð fyrir sér frábæra leiktíð hjá Manchester United í vetur.
Cristiano Ronaldo segist hafa séð fyrir sér frábæra leiktíð hjá Manchester United í vetur. Getty/James Gill

Cristiano Ronaldo heldur því fram í viðtalinu umtalaða við Piers Morgan að hann hafi verið „mjög ánægður“ hjá Manchester United í sumar og séð fram á spennandi leiktíð.

Margir af stærstu íþróttamiðlum heims fjölluðu ítrekað um það í sumar að Ronaldo vildi losna frá United og komast að hjá liði sem spilaði í Meistaradeild Evrópu, en ekkert varð af því að hann færi frá félaginu.

Því var haldið fram að stærstu félög Evrópu hefðu ekki áhuga á að fá Ronaldo en hinn 37 ára gamli Portúgali blæs á það í viðtalinu á TalkTV.

Spænska blaðið Marca sagði frá því að Al-Hilal í Sádi-Arabíu hefði viljað gera tveggja ára samning við Ronaldo, og að tilboðið hefði hljóðað upp á 305 milljónir punda og gert hann að launahæsta knattspyrnumanni sögunnar.

„Það er satt, já það er satt,“ sagði Ronaldo spurður út í orðróminn um tilboð frá Sádi-Arabíu.

„En það sem fjölmiðlarnir segja, þetta kjaftæði um að enginn vilji fá mig, það er algjörlega rangt,“ sagði Ronaldo og hélt áfram.

„Ég var mjög ánægður hérna, í hreinskilni sagt. Ég var gíraður í að eiga frábæra leiktíð hérna. En þeir [fjölmiðlar] héldu áfram að endurtaka að enginn vildi Ronaldo. Hvernig ættu þeir ekki að vilja leikmann sem skoraði 32 mörk á síðustu leiktíð, að landsliði meðtöldu?“

Ætlar að spila til fertugs

Morgan spurði Ronaldo hvernig hefði verið að hafna hinu háa tilboði frá Sádi-Arabíu: „Það var erfitt, það var erfitt. En á sama tíma fannst mér ég vera mjög ánægður hérna, og að ég gæti enn skorað mörk.

Ég held að ég geti enn skorað mörg, mörg mörk og hjálpað liðinu því mér finnst ég enn vera góður og geta hjálpað landsliðinu – sem og Manchester United. En þegar maður finnur að orkan er ekki með manni í liði þá er það erfitt,“ sagði Ronaldo og kvaðst sjá fyrir sér að hann myndi gera stóra hluti á HM sem er að hefjast í Katar.

Ronaldo kveðst alls ekki vera að íhuga að hætta í fótbolta heldur sjái hann fyrir sér að það sé passlegt að hætta fertugur.


Tengdar fréttir

„Ánægður ef Arsenal vinnur deildina“

Seinni hluti viðtals Piers Morgan við Cristiano Ronaldo var sýnt í kvöld. Þar sagði Ronaldo meðal annars að hann yrði ánægður að sjá Arsenal vinna deildina og þá ræddi hann einnig um virðinguna sem hann ber fyrir Lionel Messi.

„Engin leið til baka fyrir Ronaldo“

Gary Neville fékk sinn skerf af gagnrýni frá Cristiano Ronaldo í viðtalinu umtalaða við Piers Morgan. Neville segir að Ronaldo eigi ekki afturkvæmt hjá United og segist ekki vera á móti Portúgalanum.

„Ég var nálægt því að ganga til liðs við City“

Cristiano Ronaldo segir í viðtalinu umtalaða við fjölmiðlamanninn Piers Morgan að litlu hafi munað að hann myndi ganga til liðs við Manchester City sumarið 2021. Alex Ferguson var sá sem náði að sannfæra hann um að ganga frekar til liðs við Manchester United.

Segir að Ron­aldo gæti klórað sér í pungnum það sem eftir er án þess að skaða arf­leifðina

Katia Aveiro, systir portúgalska knattspyrnumannsins Cristiano Ronaldo, hefur komið bróður sínum til varnar eftir að hann settist niður í umdeilt viðtal við þáttastjórnandann Piers Morgan. Hún segir að bróðir sinn gæti klórað sér í pungnum það sem eftir er af ferlinum og það myndi ekki hafa nein áhrif á arfleifðina sem hann skilur eftir sig.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.