Viðskipti erlent

FTX fer fram á endurskipulagningu og forstjórinn víkur

Kjartan Kjartansson skrifar
Sam Bankman-Fried hætti sem forstjóri FTX í dag. Hann viðurkenndi í gær að hann hefði klúðrað sínum málum. FTX var metið á tugi milljarða dollara fyrir örskömmu síðan en er nú á barmi gjaldþrots.
Sam Bankman-Fried hætti sem forstjóri FTX í dag. Hann viðurkenndi í gær að hann hefði klúðrað sínum málum. FTX var metið á tugi milljarða dollara fyrir örskömmu síðan en er nú á barmi gjaldþrots. Vísir/Getty

Rafmyntarfyrirtækið FTX óskaði eftir því að vera tekið til endurskipulagningar á grundvelli laga um gjaldþrot í Bandaríkjunum í dag. Þá var greint frá því að forstjórinn Sam Bankman-Fried hefði sagt af sér.

FTX er ein af stærstu rafmyntarkauphöllum heims. Fyrirtækið hefur átt undir högg að sækja frá því að Bankman-Fried skar önnur rafmyntarfyrirtæki í kröggum úr snörunni fyrr á þessu ári. Órói vegna stöðu félagsins leiddi til áhlaups þar sem viðskiptavinir leystu út milljarða dollara. Stjórnendur hafa í örvæntingu reynt að afla fjár til þess að standa undir úttektunum.

Í tilkynningu sem FTX sendi frá sér í dag kom fram að félagið hefði farið fram á að vera tekið til fjárhagslegrar endurskipulagningar á grundvelli bandarískra gjaldþrotalaga svo hægt sé að hefja sölu á eignum til að hægt sé að greiða upp í kröfur viðskiptavina. Um 130 tengd félög eru hluti af gjaldþrotaumsókninni.

Bankaman-Fried, sem skaut upp á stjörnuhimininn sem einhvers konar rafmyntargúrúi, stígur einnig til hliðar sem forstjóri. Hann er sagður verða félaginu innan handar til þess að tryggja að forstjóraskipti gangi snurðulaust fyrir sig.

Greint hefur verið frá því að yfirvöld í Bandaríkjunum og Bahama rannsaki hvort FTX hafi brotið lög um verðbréf með viðskiptaháttum sínum. Keppinauturinn Binance hætti við að kaupa félagið í vikunni og vísaði til þess að bókhald þess væri einhvers konar svarthol.

Rafmyntir Fjártækni Bandaríkin Gjaldþrot FTX

Tengdar fréttir

Frystu eignir FTX-raf­myntar­kaup­hallarinnar

Hrakfarir rafmyntarkauphallarinnar FTX sem varð fyrir áhlaupi innistæðueigenda í vikunni halda áfram. Yfirvöld á Bahamaeyjum frystu eignir dótturfélags FTX og þá berast fréttir af því að bandarísk yfirvöld rannsaki möguleg lögbrot stofnanda félagsins.

Rafmyntarrisi rambar á barmi þrots

Gengi helstu rafmynta heims tók dýfu eftir að ljóst varð að FTX, ein af stærstu rafmyntarkauphöllum heims yrði ekki bjargað af keppinauti sínum. FTX er sagt ramba á barmi þrots í skugga frétta um að viðskiptahættir fyrirtækisins séu til rannsóknar hjá bandarískum yfirvöldum.



Mest lesið


Fleiri fréttir

Sjá meira


×

Mest lesið