KR dæmt til að greiða Kristófer nokkrum tímum fyrir landsleikinn mikilvæga

Landsréttur kvað upp dóm sinn í dag eftir að KR hafði áfrýjað dómi Héraðsdóms Reykjavíkur í málinu sem snýst um laun sem Kristófer átti inni hjá KR. KR-ingar töldu sig ekki þurfa að greiða honum laun vegna meiðsla hans.

Kristófer stefndi KR vegna launagreiðslna frá 1. júlí 2019 þar til að samningi hans við KR var slitið í lok ágúst 2020. Dómur héraðsdóms kvað á um að KR ætti að greiða Kristófer rúmar 10,8 milljónir króna en þá þegar hafði KR greitt rúmar sjö milljónir inn á höfuðstól þeirrar skuldar. Eftir stóðu 3.783.056 krónur sem KR skuldaði þá Kristófer, auk málskostnaðar hans upp á 1,4 milljónir.

Landsréttur hefur nú tekið í sama streng og héraðsdómur og því ljóst að KR þarf að greiða Kristófer það sem eftir stendur af ógreiddum launum hans, eða þá að sækja um leyfi til að áfrýja dómnum til Hæstaréttar.

Upphæðin hækkaði

Raunar þarf KR að greiða hærri hærri upphæð en héraðsdómur hafði ákveðið, eða 3.994.588 krónur auk dráttarvaxta frá 5. desember 2018. 

Hækkunin er tilkomin þar sem að Landsréttur féllst á það að Kristófer hefði einnig átt að fá greidd laun fyrir tímabilið 1.-13. ágúst, sem héraðsdómur var ósammála. KR þarf einnig að greiða um þrjár milljónir króna vegna málskostnaðar í Landsrétti og héraðsdómi.

Kristófer, sem væntanlega er þessa stundina með hugann við landsleikinn gegn Georgíu sem hefst í Laugardalshöll klukkan 19:30, tjáði sig um þá ákvörðun KR-inga að áfrýja dómi Héraðsdóms Reykjavíkur í viðtali við Vísi á dögunum:

„Auðvitað er þetta leiðinlegt og mun alltaf verða leiðindardæmi á mínum ferli við mitt uppeldisfélag. Maður hittir enn þá KR-inga niður í bæ eða hvar sem er sem spyrja út í þetta en maður getur ekki svarað miklu,“ sagði Kristófer í viðtalinu.

„Þetta er samt þreytt, maður var kannski aðeins búinn að gleyma þessu en eins og í gær að mæta aftur [í dómsal] þá er svolítið verið að rífa upp gömul sár,“ sagði Kristófer í síðasta mánuði.