Greint var frá því fyrir tveimur vikum síðan að Jón Hjaltason, frambjóðandi Flokks fólksins á Akureyri, krefðist afsökunarbeiðni frá Ingu Sæland, formanni Flokks fólksins, Guðmundi Inga Kristinssyni, varaformanni flokksins, og þremur frambjóðendum flokksins, þeim Málfríði Þórðardóttur, Tinnu Guðmundsdóttur og Hannesínu Scheving Virgild Chester, fyrir að hafa sakað sig um andlegt ofbeldi og ýjað að því að hann hafi áreitt konurnar kynferðislega.
Engin afsökunarbeiðni hefur borist en Jón, sem sat í þriðja sæti á lista Flokks fólksins á Akureyri í síðustu sveitarstjórnarkosningum, og Brynjólfur Ingvarsson, oddviti flokksins, hafa sagt sig úr Flokki fólksins. Brynjólfur situr nú í bæjarstjórn Akureyrar utan flokka og gegnir Jón nefndarstörfum einnig utan flokka.
Í grein sem Þorsteinn Hjaltason, bróðir Jóns, ritar í Morgunblaðið í dag rekur hann forsögu málsins. Hann segir allar þær ásakanir sem forysta flokksins og konurnar þrjár hafa gefið út vera afar óljósar.
„Í sex daga var fjallað um málið og þessir tveir engdust við að reyna að verja sig gegn alvarlegum ásökunum en svo óljósum að erfitt var að henda reiður á málinu og bera hönd fyrir höfuð sér. Þá loks 19. september héldu konurnar fréttamannafund og sögðu að Brynjólfur og Jón hefðu ekki beitt þær kynferðislegri áreitni, þeir væru saklausir af því. Þetta sögðu þær án þess að sýna nokkurn vott af iðrun yfir því að hafa valdið því, að allir fjölmiðlar og samfélagsmiðlar landsins fjölluðu um þessar ásakanir á hendur þeim Jóni og Brynjólfi,“ skrifar Þorsteinn.
Þorsteinn gagnrýnir að á fundinum hafi konurnar ekki verið krafðar skýringa á orðum sínum. Þá heimtar hann afsökunarbeiðni fyrir hönd bróður sín.
Líkt og Þorsteinn bendir á í grein sinni hefur Guðmundur Ingi sagst hvorki ætla að biðjast afsökunar á einu né neinu. Ef mennirnir vilji segja sig úr flokknum sé það þeirra mál.
„Varaformaður og formaður Flokks fólksins sjá ekkert athugavert við þessa hegðun, þeir eru blindir á góða siði, þ.e. virðast siðblindir. Slíkt smitast yfirleitt niður til undirsátanna eins og þekkt er, því ella fá þeir ekki að vera með. Ég held hins vegar að flestir aðrir sjái, að þessi framkoma er alls ekki við hæfi,“ skrifar Þorsteinn.
Hann sakar konurnar þrjár um að misbeita „heilögu vopni“ sem #MeToo-bylgjan hafi fært þeim.
„Vopnið er heilagt og ber að koma fram við það af virðingu. Það er grafalvarlegt mál þegar það er vanhelgað og slævt, og spellvirki unnin á því, með að misnota það eins og gert var í þessu máli, þegar það var notað af valdagræðgi og yfirgangi við pólitískar hreinsanir í Flokki fólksins,“ segir Þorsteinn.
Þorsteinn segir Ingu, Guðmund og fleiri mega skammast sín niður í lægstu læðir. Þá fordæmir hann framferði kvennanna harðlega.
