Handbolti

Einar í bann fyrir að vega að heilindum eigin leikmanns

Ingvi Þór Sæmundsson skrifar
Misheppnað grín Einars Jónssonar kostaði hann eins leiks bann.
Misheppnað grín Einars Jónssonar kostaði hann eins leiks bann. vísir/hulda margrét

Aganefnd HSÍ hefur úrskurðað Einar Jónsson, þjálfara karlaliðs Fram í handbolta, í eins leiks bann vegna ummæla hans eftir leikinn gegn FH á föstudaginn.

Einar lét ummælin falla í viðtali við Vísi eftir leikinn í Kaplakrika, er hann var spurður út í rauða spjaldið sem Þorsteinn Gauti Hjálmarsson fékk fyrir að kasta boltanum í andlit Birgis Más Birgissonar beint úr aukakasti eftir að leiktíminn var liðinn. 

„Gauti bombar í andlitið á honum, ég held hann þoli ekki þennan gaur þannig að ég skil það vel að hann hafi bombað í andlitið á honum,“ sagði Einar meðal annars í viðtalinu. Framkvæmdastjóri HSÍ vísaði ummælunum til aganefndar sem dæmdi hann í eins leiks bann.

Að mati aganefndarinnar veittist Einar að heilindum og háttvísi Þorsteins Gauta. Nefndin taldi ennfremur að ummælin hafi verið til þess fallin að gera lítið úr umræðuna innan íþróttahreyfingarinnar um alvarleika höfuðmeiðsla. Engu hafi breytt þótt ummælin hafi verið sett fram í háði eða spotti.

Úrskurð aganefndar HSÍ má sjá með því að smella hér.

Einar baðst afsökunar á ummælum sínum í gær þar sem hann tiltók að þau hafi verið sett fram í gríni og þeim hafi ekki verið ætlað að særa neinn.

„Vegna ummæla sem ég viðhafði eftir leik FH-Fram. Ég vil koma á framfæri afsökunarbeiðni til allra hlutaðeigandi aðila. Þau ummæli sem ég viðhafði voru sögð í gríni og áttu ekki að særa neinn. Hins vegar geta höfuðmeiðsl verið mjög alvarleg og ekki til þess að tala um af léttúð,“ segir í yfirlýsingunni frá Einari.

Einar tekur út leikbann þegar Fram tekur á móti Íslands-, bikar- og deildarmeisturum Vals í Olís-deildinni á föstudaginn.

Birgir Steinn Jónsson, leikmaður Gróttu, var einnig dæmdur í eins leiks bann fyrir rauða spjaldið sem hann fékk í tapinu fyrir Aftureldingu. Hann verður því fjarri góðu gamni þegar Grótta tekur á móti FH á fimmtudaginn.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.