Erlent

Rúss­ar á und­an­hald­i í suðr­i

Samúel Karl Ólason skrifar
Úkraínskir hermenn og fallinn félagi þeirra í Lyman í norðanverðu Donetsk-héraði, en Rússar voru reknir þaðan um helgina. Góður árangur Úkraínumanna gegn Rússum hefur ekki verið þeim að kostnaðarlausu.
Úkraínskir hermenn og fallinn félagi þeirra í Lyman í norðanverðu Donetsk-héraði, en Rússar voru reknir þaðan um helgina. Góður árangur Úkraínumanna gegn Rússum hefur ekki verið þeim að kostnaðarlausu. AP/Evgeniy Maloletka

Úkraínskir hermenn virðast sækja hratt fram gegn Rússum í suðurhluta Úkraínu. Vólódímír Selenskí, forseti Úkraínu, segir að komið verði fram við Úkraínumenn sem búa í byggðum sem búið er að frelsa frá Rússum af sanngirni.

Hafi viðkomandi ekki „þjónað hernámsliðinu eða svikið Úkraínu“, hafi þau ekkert að óttast.

„Hundruð þúsunda af okkar fólki bjó á tímabundið hernumdum svæðum,“ sagði Selenskí í ávarpi í gærkvöldi, samkvæmt New York Times. „Margir hjálpuðu her okkar og leyniþjónustum. Margir reyndu einfaldlega að lifa af og biðu endurkomu úkraínska fánans.“

Hann sagði að mikil áhersla yrði lögð á að koma lífi þessa fólks í eðlilegt horf.

Ummælin þykja til marks um góðan árangur Úkraínumanna á víglínunum gegn Rússum undanfarnar vikur. Rússar haf verið reknir frá stórum svæðum í Úkraínu. 

Frelsa fjölda þorpa og bæja

Úkraínskir hermenn birta þessa dagana mikið af myndum af sér frelsa þorp og bæi úr höndum Rússa. Þorp þessu eru að mestu í Kherson-héraði, en einnig í Donetsk og norðar í Kharkív.

Rússar stjórna þó enn um einum sjötta af Úkraínu og að mestu í fimm héruðum, Luhansk, Donetsk, Saporisjíam, Kherson og Krímskaga, sem Rússar innlimuðu árið 2014. Þetta landsvæði er stærra en Portúgal en Rússar eru sagðir hafa flutt fjölmarga Úkraínumenn nauðungaflutningum frá þessu svæði og til Rússlands.

Selenskí sagði einnig í ávarpinu að varnir Úkraínumanna litu vel út og það væri augljóst í hvað stefndi.

„Sífellt fleiri óvinir flýja og óvinaherinn verður fyrir sífellt meira mannfalli,“ sagði Selenskí. Hann sagði einnig að í Rússlandi væru fleiri að átta sig á því að Rússar hefðu gert mikil mistök með því að ráðast inn í Úkraínu.

Til að sjá grófa mynd af stöðu mála í Úkraínu í gær má skoða meðfylgjandi kort frá hugveitunni Institute for the study of war.

Gengur best í Kherson

Svo virðist sem Úkraínumönnum gangi best þessa dagana í Kherson í suðri, þó þeir sæki fram gegn Rússum víða. Í Kherson hafa Úkraínumenn freslað fjölmörg þorp í dag og er útlit fyrir að Rússar hafi flúið af stóru svæði en þeir voru í hættu á því að verða mögulega umkringdir.

Auk þess að myndefni á samfélagsmiðlum sýni úkraínska hermenn ganga inn í frelsaðar byggðir hafa einnig birst myndbönd af íbúum annara bæja hífa úkraínska fánann að húni eftir brotthvarf rússneskra hermanna.

Til marks um gott gengi Úkraínumanna má sýna kort sem vinsælir rússneskir herbloggarar birtu í morgun af stöðunni í Kherson og svo annað sem þeir birtu fyrir skömmu.

R

Vikur í að herkvaðning skili einhverjum árangri

Til að reyna að fylla upp í raðir sínar og bæta varnir sínar hafa ráðamenn í Rússlandi hafið herkvaðningu og segja að um þrjú hundruð þúsund manns verði skikkaðir til herþjónustu og sendir til Úkraínu. Embættismenn í Vesturlöndum, sem blaðamaður Wall Street Journal ræddi við, segjast sjá vísbendingar um að Rússar eigi í miklum vandræðum með skipulag herkvaðningarinnar.

Sjá einnig: Leiðtogi Téténa sendir fjórtán til sextán ára syni sína til Úkraínu

Rússar hafa þegar sent menn sem skikkaðir hafa verið til herþjónustu til Úkraínu, án nokkurrar þjálfunar, en áðurnefndir embættismenn segja að það muni taka minnst einhverjar vikur fyrir herkvaðninguna að skila Rússum betri vörnum gegn Úkraínumönnum.

Úkraínumenn vinna að því að bæta stöðuna fyrir veturinn og reka Rússa frá eins stóru svæði og þeir geta áður en bleyta og kuldi gerir gagnárásir erfiðari. Rússar reyna á sama tíma að halda aftur af Úkraínumönnum, víðast hvar.

Sjá einnig: Úkraínuher sækir fram í suðri og austri

Gera enn árásir nærri Bakhmut

Þrátt fyrir að hafa verið á hælunum í nokkrar vikur hafa Rússar ekkert látið af ítrekuðum tilraunum sínum til að að sækja fram nærri Bakhmut í Donetsk. Þar hafa Rússar gert linnulausar árásir, leiddar af málaliðum Wagner Group, á Úkraínumenn.

Árangur af þeim árásum hefur þó verið verulega takmarkaður en sérfræðingjar telja pólitískar ástæður liggja fyrir því að Rússar hafi ekki flutt hermenn frá víglínunni við Bakhmut og reynt að styrkja varnir sínar þar sem Úkraínumenn herja á þá.


Tengdar fréttir

Sendiherra segir Musk að fara norður og niður

Úkraínski sendiherrann í Þýskalandi vandaði Elon Musk, auðkýfingnum sem hefur haslað sér völl sem nettröll, ekki kveðjurnar eftir að sá síðarnefndi viðraði hugmynd um forsendur friðar á milli Rússlands og Úkraínu. Bað sendiherrann Musk um að fara norður og niður.

Petreaus segir banda­menn myndu þurrka Rússa út í Úkraínu

David Petreaus, fyrrverandi yfirmaður bandarísku leyniþjónustunnar CIA og fjögurra stjörnu hershöfðingi, segir að Bandaríkin og bandamenn þeirra innan Atlantshafsbandalagsins myndu grípa til afgerandi aðgerða ef Rússar notuðu kjarnorkuvopn í Úkraínu.

Góð helgi fyrir Úkraínumenn

Frá því Vladimír Pútin lýsti yfir ólöglegri innlimun fjögurra héraða Úkraínu á föstudaginn virðist sem Úkraínumönnum hafi vegnað verulega vel gegn Rússum á vígvöllum landsins. Rússar eru víðast hvar á hælunum í Úkraínu.

Beitt­u íbúa Izy­um kerf­is­bundn­um pynt­ing­um

Rússneskir hermenn eru sagðir hafa ítrekað pyntað íbúa Izyum í Úkraínu í þá sjö mánuði sem þeir stjórnuðu borginni. Sameinuðu þjóðirnar hafa skráð markvissa beitingu ofbeldis gegn óbreyttum borgurum og að pyntingar hafi verið beitt með kerfisbundnum hætti.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.