Innlent

Getur ekki séð að áhætta fylgi rafbyssunotkun lögreglu

Sunna Sæmundsdóttir skrifar
Jón Gunnarsson dómsmálaráðherra.
Jón Gunnarsson dómsmálaráðherra. Vísir/Vilhelm

Dómsmálaráðherra segist treysta lögreglu til þess að nota rafbyssur af ábyrgð. Hann segir aukna hörku kalla á betri varnir lögregluþjóna.

Til skoðunar er að útvega lögreglu rafbyssur og segist Jón Gunnarsson dómsmálaráðherra gera ráð fyrir að það verði í fyrstu nokkurs konar tilraunaverkefni á meðan lögregla „fetar sig inn í þann raunveruleika.“

Hann segir reynslu annarra þjóða til sérstakrar skoðunar og telur ljóst að rafbyssur séu til þess fallnar að draga úr slysum meðal lögreglumanna. 

„Við sjáum það á útköllum sérsveitarinnar, þar sem vopn koma við sögu, að þeim hefur fjölgað allt of mikið,“ segir Jón. „Við megum aldrei gleyma þvi að lögreglumenn eru bara fólk eins og við, sem eiga sína fjölskyldu, sem vill fá sitt fólk heilt heim. Það hefur verið of mikið um meiðsli hjá lögreglumönnum við störf og menn eru að tapa mörgum vinnustundum. Þetta er skref sem hefur verið talið hógvært en er til þess fallið að styrkja varnir lögreglunnar,“ segir Jón aðspurður um þörfina fyrir rafbyssur.

Dómsmálaráðherra segir nauðsynlegt að styrkja varnir lögregluþjóna.Vísir/Vilhelm

Telurðu að einhver áhætta fylgi þessu?

„Ég hef nú fengið kynningar á þessu hjá þeim sem betur þekkja til og ég get ekki séð að það fylgi þessu áhætta. Almennt sýna þau gögn sem ég hef séð að reynslan af þessu er mjög góð þar sem þetta hefur verið notað. Þá er ég að vitna til okkar svæðis og lögregluyfirvalda á Norðurlöndum.“

Hefurðu ekki áhyggjur af því að of mikilli hörku verði beitt?

„Ég treysti lögreglu alveg til þess að vera með mjög skýrar verklagsreglur um þetta og nú eru menn komnir með búkmyndavélar þar sem er hægt að fá upplýsingar ef ágreiningsmál koma upp. Ég treysti lögreglunni til þess að stíga þetta skref af festu og ábyrgð.“

Jón segir ekki liggja fyrir hvenær rafbyssur verða teknar í notkun. Nokkur kostnaður fylgi kaupunum og eftir eigi að skoða hvernig það passi inn í rekstur lögreglunnar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.