Innlent

Hjörleifur hafi sagst aldrei leggja hendur á konur nema í rúminu

Kolbeinn Tumi Daðason skrifar
Hannesína Scheving, Málfríður Þórðardóttir og Tinna Guðmundsdóttir vermdu þrjú af fimm efstu sætum lista Flokks fólksins á Akureyri í sveitarstjórnarkosningunum ív or.
Hannesína Scheving, Málfríður Þórðardóttir og Tinna Guðmundsdóttir vermdu þrjú af fimm efstu sætum lista Flokks fólksins á Akureyri í sveitarstjórnarkosningunum ív or. vísir/egill

Málfríður Þórðardóttir, Tinna Guðmundsdóttir og Hannesína Scheving Virgild Chester segjast fullar vanlíðunar og kvíða vegna samskipta sinna við þrjá karla á lista flokksins. Allir hafi beitt þær andlegu ofbeldi og einn gerst sekur um kynferðislega áreitni.

Konurnar boðuðu til blaðamannafundar með skömmum fyrirvara í dag. Þær sögðust tilneyddar til að stíga fram eftir mikla umfjöllun fjölmiðla og ávirðingar sem þær hefðu mátt sæta. Þær lýstu kynferðislegri áreitni af hendi Hjörleifs Hallgríms Herbertssonar og slæmri framkomu oddvitans Brynjólfs Ingvarssonar og Jóns Hjaltasonar, á þriðja sæti listans.

Hjörleifur sat í 22. og neðsta sæti listans sem bauð fram á Akureyri í vor. Hann segist sjálfur vera guðfaðir listans og hefur þvertekið fyrir allar ásakanir um dónaskap.

Tinna lýsti samskiptum sínum við Hjörleif. Hann hafi boðið henni heim til sín og þess utan tjáð henni að hann legði aldrei hendur á konur, nema í rúminu. Hún ætti að koma í heimsókn til hans sem oftast.

Hannesína lýsti reglulegum símtölum Hjörleifs sem vildi fá að spjalla við hana. Henni hafi fundist símtölin mjög óþægileg og að lokum hætt að svara símanum.

Jón Hjaltason og Hjörleifur Hallgríms Herbertsson.

„Við þurfum ekki að sitja undir skaðandi samskiptum,“ sagði Hannesína á fundinum í dag. Hún hafi verið að safna undirskriftum fyrir flokkinn í vor. Þegar kom að því að skila listunum til Hjörleifs hafi hún ekki treyst sér til að afhenda honum þær.

„Heldur ákvað ég að setja listann í blaðalúguna hjá manninum og tók svo hreinlega til fótanna til að hitta ekki á hann. Ég hafði engan áhuga á að hitta þennan mann, hvað þá að vera ein með honum,“ sagði Hannesína.

Tölvupóstur undir yfirskriftinni „Hjálp!“

Málfríður segir Brynjólf og Jón hafa verið fullkomlega meðvitaða um svívirðilega framkomu Hjörleifs í þeirra garð. Eftir margítrekaðar kröfur um að Hjörleifur yrði ekki með á fundum fékkst það samþykkt. Svo í ágúst hafi Jón stungið upp á að bjóða Hjörleifi aftur til fundanna.

Málfríður sagði að Brynjólfur og Jón hafi án samtals við þær þrjár fundað með oddvitum minnihlutans á Akureyri. Um leið hafi þeir skipað sér í nefndir næstu fjögur árin. Málfríður hafi sent þeim póst og spurst fyrir um þetta. Áhrif spurninganna hafi verið slík að Brynjólfur hafi sent hjálparbeiðni á pólitíska andstæðina flokksins, í formi tölvupósts með yfirskriftinni: „Hjálp!“

Pósturinn hafi fyrir mistök ratað á fulltrúa á lista Flokks fólksins og þannig komist í hendur flokkssystranna. Málfríður las upp úr pósti Brynjólfs:

„Nú þarf ég bráðum á öllum alvöru vinum að halda. Ég er kominn í svæsnari ormagryfju en ég reiknaði með. Þetta er engu líkt sem ég hef áður lent í. Vinsamlegast hringið í mig þegar hentar. Kveðja, Pápi.“

Grátandi á fundinum

Þarna hafi þær verið orðnar ormar í ormagryfju og því ekki að undra að konunum líði ekki vel. Einnig sé ástæða til að taka fram að áreitið frá Brynjólfi hafi verið mikið. Hann hafi sent þeim yfir 250 tölvupósta.

„Kvíðinn fyrir því að opna tölvupóst á morgnana er í einu orði sagt yfirþyrmandi.“

Dropinn sem fyllti mælinn hafi verið fundur á heimili Brynjólfs 10. september. Þær hafi upplifað andúð og kulda.

„Ég kom illa fyrirkölluð á fundinn, kvíðinn og með grátstafinn í kverkunum. Eftir stutta stund yfirgaf ég fundinn grátandi,“ sagði Málfríður. Hún hafi ekki treyst sér að sitja undir öskrum Jóns Hjaltasonar sem hafi einnig verið farinn að skeita skapi sínu á húsgögnum. Jón hefur sjálfur sagst hafa barið í borðið í lok fundar þegar hann krafðist svara.

250 tölvupóstar

Tinna hafi setið eftir frosinn og ekki þorað að mótmæla. Áður en fundi lauk hafi Brynjólfur lesið bréf sem hann skrifaði. Það hafi verið fullt af rógi og rangfærslum auk hótana um að starfsleyfi kvennanna, sem allar eru heilbrigðisstarfsmenn, kynni að vera í hættu ef þær hegðuðu sér ekki almennilega.

Bréfinu hafi verið dreift til tíu einstaklinga. Brynjólfur hafi þegar hringt í fólk á listanum að ef Málfríður stigi ekki til hliðar, þá myndu þeir Jón gera það. Í kjölfarið hafi þær þrjár mátt sætta hótunum og kallaðar illum nöfnum.

„Samstarfið við þessa menn hefur valdið okkur andvökum, kvíða og gríðarlegri vanlíðan. Við sáum engin önnur ráð en að óska eftir hjálp frá forstu flokksins sem hefur reynst ómetanlegur.“

Efni fundarins er rakið í vaktinni að neðan.


Tengdar fréttir

Saka konurnar um lygar og segja varaformanninn hafðan að fífli

Brynjólfur Ingvarsson, oddviti Flokks fólksins á Akureyri, og Jón Hjaltason, þriðji maður á lista flokksins, segja fullyrðingar þriggja kvenna sem skipa annað, fjórða og fimmta sætið þess efnis að karlar í forystu flokksins fyrir norðan hafi sýnt þeim lítilsvirðingu og jafnvel áreitt þær, fjarri öllu sanni.

Vilja að á­sakanirnar séu dregnar til baka

Karlmenn sem sátu á lista flokks fólksins á Akureyri í sveitastjórnarkosningunum í vor hafa krafist þess að þeir verði beðnir afsökunar á ásökunum sem beint var að þeim og þær dregnar til baka. Þrjár konur innan flokksins ásökuðu mennina um kynferðislegt áreiti og lítilsvirðingu.

Hafna al­farið á­sökunum um ein­elti og kyn­ferðis­legt á­reiti

Atburðarásin hefur verið hröð í röðum Flokks fólksins í morgun og virðist starf flokksins á Akureyri í algjöru uppnámi. Jón Hjaltason sem skipar þriðja sæti listans segir ásakanir sem fram hafa komið í morgun mannorðsskemmandi og tilhæfulausar.

Enn fjölgar hneykslismálum í sex ára sögu Flokks fólksins

Kjörnir fulltrúar Flokks fólksins hafa ýmist neyðst til að segja af sér eða verið hvattir til þess í tengslum við erfið mál sem dunið hafa á flokknum á til þess að gera stuttum líftíma hans. Nú síðast sökuðu þrjár konur innan flokksins samflokksmenn sína um lítilsvirðandi framkomu í sinn garð.

Dapurt að ásökunum um kynferðislegt áreiti hafi verið slengt fram

Formaður Flokks fólksins þvertekur fyrir að nokkur í forystusveit flokksins á Akureyri hafi verið sakaður um kynferðislegt áreiti. Hún segir dapurt að því hugtaki hafi verið slengt fram í ásökunum þriggja kvenna innan flokksins því nú liggi allir undir grun.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira
×