Leikmenn Fylkis bliknuðu í samanburði við Bl1ck

Snorri Rafn Hallsson skrifar
bl1ck

NÚ er nýtt lið leikstjórnandans Bjarna sem leiddi Dusty til sigurs á síðasta tímabili en með honum leika Clvr, einnig úr Dusty, ásamt Bl1ck, Pandaz og Ravle. Fylkir hafnaði í neðsta sæti á síðasta tímabili en LeFluff úr Dusty er staðráðinn í að gera betur í ár með Snæ, Brnr, Eika47 og Gvend sér til halds og trausts.

Leikurinn fór fram í Nuke og þreföld fella frá Brnr í hnífalotunni tryggði Fylki varnarstöðuna (Counter-terrorists) í fyrri hálfleik.

NÚ vann fyrstu lotuna með öruggri aðgerð en LeFluff og félagar voru ekki lengi að jafna fyrir Fylki í þeirri næstu og komast í stöðuna 7–1 með góðum lestri á leiknum og fjölmörgum fellum frá Snæ og LeFluff.

Bjarna var hvergi að sjá í upphafi fyrri hálfleiks og þurftu Clvr og Bl1ck að draga vagninn fyrir NÚ. Með því að hægja örlítið á leiknum og þétta raðirnar gat NÚ klórað í bakkann áður en hálfleikurinn var úti.

Staða í hálfleik: NÚ 6 – 9 Fylkir

Fylkir jók verulega á forskot sitt í upphafi síðari hálfleik en í stöðunni 12–6 lifnaði yfir NÚ. Bjarni kom sterkur inn og lék á Brnr til að aftengja sprengjuna í 19. Lotu. Fylkismenn voru þá komnir í peningavandræði og NÚ gat fikrað sig nær þeim hægt og rólega.

Eftir misheppnaða reyksprengju frá Fylki krækti Ravle sér í þrefalda fellu og munaði þá einungis einu stigi á liðunum. NÚ jafnaði og var við það að hafa betur í síðustu lotunni en glæsilegt vappaskot frá Brnr sendi leikinn í framlengingu og Fylkir átti ennþá séns.

Staða eftir venjulegan leiktíma: NÚ 15 – 15 Fylkir

Aftur þurftu Fylkismenn að hafa sig alla við til að tapa ekki leiknum og aftengdi Gvendur sprengjuna með ótrúlegum hætti á síðustu stundu til að knýja fram aðra framlengingu.

NÚ hélt þó forskotinu þar sem Bl1ck var enn með flestar fellur en eitthvað vantaði upp á varnarleikinn í annarri framlengingu og Fylkir jafnaði því enn á ný.

Það var svo loks í þriðju framlengingu sem úrslitin réðust þegar NÚ fór hratt um kortið og Clvr felldi Gvend til að loka leiknum.

Lokastaða: NÚ 25 – 21 Fylkir

Næstu leikir liðanna:

LAVA – NÚ, fimmtudaginn 22/9, kl. 19:30

TEN5ION – Fylkir, fimmtudaginn 22/9, kl. 21:30

Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.

Leikirnir




    Velkomin á Vísi. Þessi vefur notar vafrakökur. Sjá nánar.