Fótbolti

Utan vallar: Ís­lendingar á­berandi er Meistara­deildin mætti til Köben

Runólfur Trausti Þórhallsson skrifar
Þó Ísak Bergmann hafi spilað á hægri væng FCK gegn Sevilla þá skilaði hann einnig sínu varnarlega.
Þó Ísak Bergmann hafi spilað á hægri væng FCK gegn Sevilla þá skilaði hann einnig sínu varnarlega. Lars Ronbog/Getty Images

Ísak Bergmann Jóhannesson var í byrjunarliði FC Kaupmannahafnar er liðið tók á móti Sevilla í riðlakeppni Meistaradeildar Evrópu á heimavelli sínum Parken. Hákon Arnar Haraldsson og Orri Steinn Óskarsson hófu leik á bekknum á meðan fjöldi Íslendinga var í stúkunni, þar á meðal einn í fjölmiðlastúkunni.

Orðið byrjunarörðuleikar lýsir vel upphafi undirritaðs á Parken í gærkvöld. Eftir að mæta alltof snemma og bíða í dágóða stund ásamt dönsku sem og spænsku fjölmiðlafólki áður en fjölmiðlum var hleypt inn mundi blaðamaður að passinn hans var á svokallaðri UEFA skrifstofu. Eftir að skottast þangað og til baka var förinni loks heitið inn á völlinn.

Hákon Arnar Haraldsson, Viktor Claesson og Orri Steinn Óskarsson að leik loknum.Lars Ronbog/Getty Images

Aðstaðan var nokkuð rúmgóð, inni þar að segja. Sæti hjá lággjaldaflugfélögum á borð við RyanAir eða EasyJet myndu einna helst lýsa aðstöðu fjölmiðla í stúkunni sjálfri. Allavega þar sem blaðamaður frá Íslandi fékk sæti, mögulega var Jesper Grønkjær með örlítið meira fótapláss en það er eins og það er. 

Þar sem það stimplað á ennið á undirrituðum að hann sé hvorki frá Danmörku eða Spáni var sessunautur kvöldsins forvitinn að vita hvaðan þessi veraldarvani heimsmaður væri eiginlega. „Íslandi,“ svaraði ég áður en sessunauturinn svaraði um hæl „bara eins og hálft liðið“ og hló. 

Blaðamaður er heitfengur að eðlisfari og ef til vill búinn að safna vetrarforðanum full snemma í ár. Á meðan ferðinni var heitið á Parken perlaði því af enninu en það snöggkólnaði er sólin var sest enda hófst leikur gærkvöldsins ekki fyrr en 21.00 að staðartíma. Að sjá Ísak Bergmann í byrjunarliði heimamanna yljaði sem og sjóðandi heitt kaffið sem varð þó kalt skömmu eftir að út var komið.

Blaðamaður hefur svo sem farið á leiki á Parken síðla kvölds áður en fram til þessa einungis verið staðsettur í Sektion 12. Um er að ræða það svæði vallarins þar sem stuðningsfólk er hvað virkast að styðja við bakið á FCK þó það komi fyrir að mótherjinn fái að heyra það.  Þá er einnig bannað að sitja í Sektion 12 og oftar en ekki er hoppað þannig að Parken hreinlega nötrar. 

Það þarf eflaust ekki að taka fram að Sektion 12 var troðfullt löngu áður en liðin mættu út í upphitun og var stemningin gríðarleg.

En að leik gærkvöldsins: Ísak Bergmann hóf leik á hægri vængnum líkt og svo oft áður. Sófa-þjálfarinn sem blaðamaður er finnst sú staða vallarins ekki henta leikmanninum nægilega vel og hæfileikar hans myndu eflaust njóta sín betur ef hann væri að spila meira miðsvæðis. Þó Ísak Bergmann stefni á að vinna sér inn sæti á miðju liðsins fyrr heldur en síðar þá kvartar hann ekki. 

„Þar sem þjálfarinn vill að ég spili, þar spila ég“ 

sagði hinn 19 ára gamli Ísak Bergmann í spjalli við Vísi að leik loknum

Það var ekki að sjá að okkar maður væri stressaður yfir því að spila sínar fyrstu mínútur í riðlakeppni Meistaradeildarinnar. Hann hikaði ekki við að segja samherjum sínum til eða að láta dómara leiksins vita  nákvæmlega hvað honum fannst er hann dæmdi ekki FCK í hag.

Heimamenn, sem voru dyggilega studdir áfram af áhorfendaskaranum, fengu fín færi til að komast yfir í leiknum. Eðlilega áttu gestirnir frá Andalúsíu líka sína spretti enda með leikmenn á borð við Isco og Ivan Rakitić innanborðs. 

Klippa: Parken nötrar

Leikmenn Sevilla þurftu þó að finna kraftinn innra með sér þar sem aðeins 67 stuðningsmenn liðsins sáu sér fært að mæta. Það var því aldrei spurning hvort liðið myndi vinna baráttuna um stúkuna en alls voru 34.910 manns á Parken í gærkvöldi.

Ísak Bergmann gerði sitt til að lyfta áhorfendum heimaliðsins. Hann pressaði markvörð gestanna tvívegis þannig að hann endaði á að senda boltann í innkast. Hann hljóp meir en góðu hófi gegnir og skilaði boltanum nær alltaf vel frá sér. Þá átti Ísak Bergmann góðan þríhyrning í aðdraganda besta færis FCK í fyrri hálfleik en það féll fyrir fætur vinstri bakvarðarins Victor Kristansen. Hann lúðraði yfir eins og sönnum bakverði sæmir.

Isco féll til jarðar oftar en einu sinni og oftar en tvisvar í leik gærkvöldsins.Sergei Gapon/Getty Images

Gestirnir náðu örlítið betri tökum í síðari hálfleik og vakti Isco sérstaklega athygli blaðamanns. Það var líkt og boltinn væri límdur við tærnar á hinum þrítuga Spánverja. Mögulega var það ástæðan fyrir því að leikmenn heimaliðsins rákust oftar í fótleggi hans frekar en boltann.

Hákon Arnar svo kom inn af bekknum þegar tíu mínútur lifðu leiks en æskuvinirnir fengu aðeins sjö mínútur saman á grasinu en Ísak Bergmann var tekinn af velli þegar þrjár mínútur lifðu leiks. Hákon Arnar fékk ekki úr miklu að moða en hann kom inn í stöðu fremsta manns þegar Sevilla hafði í raun öll tök á leiknum. 

Þess má til gamans geta að Ísak Bergmann hefur nú spilað fleiri mínútur í riðlakeppni Meistaradeildar Evrópu en æskuvinur sinn og liðsfélagi Hákon Arnar Haraldsson. Blaðamaður ætlaði að reyna ná tali af þeim síðarnefnda eftir leik en hann virðist hafa sloppið óséður af leikvanginum og út í nóttina.

Eins gaman og það hefði verið að sjá FCK vinna leikinn þá var markalaust jafntefli á endanum eflaust sanngjörn niðurstaða. Af viðbrögðum Julen Lopetegui, þjálfara Sevilla, eftir leik að dæma þá var hann ekki til í að virða stigið og vildi greinilega komast aftur til Andalúsíu sem fyrst. Nú er bara að vona að Pep Guardiola og Edin Terzić verði jafn pirraðir er þeir yfirgefa Parken á komandi vikum.


Tengdar fréttir

Ísak í byrjunarliði FCK gegn Sevilla

Ísak Bergmann Jóhannesson er í byrjunarliði FC Kaupmannahöfn sem mætir spænska liðinu Sevilla í Meistardeild Evrópu í kvöld.

Ísak Bergmann: „Veit að Man City er annað skrímsli“

Ísak Bergmann Jóhannesson varð í gærkvöld sextándi Íslendingurinn til að spila í riðlakeppni Meistaradeildar Evrópu. Hann lék 87 mínútur í markalausu jafntefli FC Kaupmannahafnar og Sevilla en leikurinn fór fram á Parken í Kaupmannahöfn. Vísir náði tali af Ísaki Bergmanni eftir leik.




Fleiri fréttir

Sjá meira


×