Lífið

„Ekki allir sem verða kvikmyndastjarna og ljóðskáld á einu kvöldi“

Elísabet Hanna skrifar
Velkominn Arni - Håkon Broder Lund-8933
Håkon Broder Lund

Heimildarmyndin Velkominn Árni var frumsýnd í Bíó Paradís í gær. Myndin segir sögu Árna Jóns Árnasonar sem vissi aldrei hver væri faðir sinn. Það var ekki fyrr en á áttræðisaldri sem hann komst óvænt að því hver faðir hans gæti hafa verið.

Upphaf sögunnar má rekja til þess að Bandaríkjamaðurinn David Balsam hafði samband við fjölmiðlakonuna Viktoríu Hermannsdóttur. Viktoría hafði þá nýlega gert þáttaröðina Ástandsbörn og hafði David samband í von um að hún gæti hjálpað honum að finna mögulegan bróður sinn á Íslandi. Einu upplýsingarnar sem hann hafði á milli handanna voru fæðingarárið 1945 og nafn móðurinnar.  

Viktoría og Allan héldu ræðu fyrir sýningu myndarinnar í gær.Håkon Broder Lund

Eftir að David hafði samband fór hún á fullt að grennslast fyrir um þennan mögulega bróður. Út frá því urðu þættirnir Á ég bróður á Íslandi? til. Þau fundu Árna Jón, sem var mögulega týndi bróðirinn, og hittust þeir út frá því. 

Vildi vita meira

Leikstjórar myndarinnar eru þau Viktoría og Allan Sigurðsson. „Eftir að við fundum Árna vildi ég gera eitthvað meira en ég hafði aldrei gert heimildarmynd áður. Ég hafði samband við Allan sem var til í þetta verkefni með mér,“ segir Viktoría í samtali við Vísi. Úr varð myndin Velkominn Árni

Í myndinni er fylgst með ferðalagi Árna til Bandaríkjanna. Þar hittir hann alla fjölskyldu mögulegs bróður síns og undirgengst DNA próf til að athuga hvort að hann sé í raun sá sem leitað var.

„Ég er svo glöð að hafa kynnst Árna því hann er svo ótrúlega skemmtilegur og einlægur. Hann er svo frábær og það hefur gefið okkur mikið að fá hann inn í okkar líf,“ segir hún um Árna.

Gaman að deila myndinni með öðrum

Gerð myndarinnar hefur átt hug þeirra Allans og Viktoríu í tæp fjögur ár á milli annarra verkefna. Myndin hlaut Einarinn, áhorfendaverðlaun Skjaldborgar 2022, sem er hátíð íslenskra heimildakvikmynda. „Það hefur verið ótrúleg upplifun að sýna myndina og deila henni með fólki,“ segir Viktoría.

Þroskasaga Árna

„Sagan er stærri en bara ferðalagið út,“ segir hún einnig. „Þetta er þroskasaga manns sem hefur ekki leift sér að lifa lífinu.“ Auk þess að vera viðfangsefni myndarinnar lét Árni, sem er 77 ára gamall, drauminn rætast og gaf út sína fyrstu ljóðabók í gær.

Það myndaðist röð þar sem gestir myndarinnar biðu eftir árituðu eintaki frá skáldinu.Håkon Broder Lund

Árni hafði nefnt þann draum við Viktoríu að gefa úr ljóðabók. Hún bað hann þá að færa sér nokkur af sínum helstu ljóðum, sem hann gerði, handskrifuð í bók. „Ég mundi eftir handskrifuðu ljóðabókinni þremur dögum fyrir brúðkaupið mitt,“ segir Viktoría sem giftist eiginmanni sínum Sólmundi Hólm um helgina. 

„Ég skrifaði hana upp, reddaði umbrotsmanni og við náðum að koma henni í prent. Hún var svo tilbúin í gærmorgun, sama dag og við frumsýndum myndina“ segir hún um bókina. Ljóðabókin ber heitið Seyðingur og bætir Viktoría við:

„Það eru ekki allir sem verða kvikmyndastjarna og ljóðskáld á einu kvöldi.“

Tengdar fréttir






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.