Bíó og sjónvarp

Velkominn Árni og Hækkum rána sigurvegarar á Skjaldborg

Stefán Árni Pálsson skrifar
Heimildamyndin Velkominn Árni eftir Viktoríu Hermannsdóttur og Allan Sigurðsson hlaut Einarinn, áhorfendaverðlaunin. Hér má sjá Viktoríu og Allan með sjálfan Einarinn. 
Heimildamyndin Velkominn Árni eftir Viktoríu Hermannsdóttur og Allan Sigurðsson hlaut Einarinn, áhorfendaverðlaunin. Hér má sjá Viktoríu og Allan með sjálfan Einarinn.  @viktoriahermanns

Skjaldborg – hátíð íslenskra heimildamynda var haldin á Patreksfirði í fimmtánda sinn um helgina.

Tíu íslenskar heimildamyndir voru frumsýndar og sex verk í vinnslu voru kynnt. Hátíðinni lauk formlega í á sunnudagskvöldið en samkvæmt hefðinni gengu gestir hátíðarinnar fylktu liði í skrúðgöngu frá Skjaldborgarbíói í Félagsheimili Patreksfjarðar að lokinni síðustu mynd og atkvæðagreiðslu. Verðlaunaafhending fór fram í félagsheimilinu áður en hljómsveitin Celebs lék fyrir dansi á lokaballi hátíðarinnar.

Áhorfendaverðlaunin Einarinn hlaut heimildamyndin Velkominn Árni eftir Viktoríu Hermannsdóttur og Allan Sigurðsson. Í myndinni fá áhorfendur að heyra og sjá sögu Árna Jóns Árnasonar, sem á áttræðisaldri kemst óvænt að því hver faðir hans kann að hafa verið.

Heimildamyndin Hækkum rána eftir Guðjón Ragnarsson hlaut dómnefndarverðlaunin Ljóskastarann. Myndin fjallar um körfuboltaflokkur fyrir stelpur sem var stofnaður 2015 en þjálfarinn var óvenjulegur og hækkaði sífellt rána. Þær voru þjálfaðar sem leiðtogar utan vallar og afrekskonur innan vallar. Þetta er saga 8-13 ára stúlkna sem vildu breyta viðmiðum í kvennakörfu á Íslandi. Með miklum fórnarkostnaði mættu þær mótlætinu sem því fylgdi.

Klippa: Hækkum rána - sýnishorn

Veglegt verðlaunafé

Hvatningarverðlaun Skjaldborgar hlaut myndin Thinking about the Weather eftir Garðar Þór Þorkelsson sem dómnefnd þótti sameina marga af mikilvægum þáttum heimildamyndargerðar. Myndin fjallar um viðfangsefni sem skiptir okkur öll miklu máli, þrátt fyrir að við séum kannski ekki alltaf á sömu skoðun. Örvæntingarfullur vegna yfirvofandi loftslags-heimsenda fer kvikmyndagerðarmaðurinn í för um Bretlandseyjar. Leiðin liggur til afskiptra byggða sem brátt munu sökkva í sæ.

Tækjaleigan Kukl og eftirvinnslufyrirtækið Trickshot veita verðlaunafé til vinningshafa Einarsins og Ljóskastarans sem hvor um sig hlýtur inneign að verðmæti 500 þúsund krónur í tækjaleigu og 250 þúsund krónur í formi eftirvinnslu. Hvatningarverðlaununum fylgir einnig 50 þúsund króna inneign í hljóðdeild Pfaff.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.