Formúla 1

Hamilton biðst afsökunar á bræði sinni

Valur Páll Eiríksson skrifar
Vonbrigðin leyndu sér ekki hjá Hamilton eftir að hafa leitt keppnina. Hann segist hafa tapað sér í hita leiksins og hefur beðist afsökunar.
Vonbrigðin leyndu sér ekki hjá Hamilton eftir að hafa leitt keppnina. Hann segist hafa tapað sér í hita leiksins og hefur beðist afsökunar. Dan Mullan/Getty Images

Lewis Hamilton hefur beðið liðsfélaga sína hjá Mercedes í Formúlu 1 afsökunar á því að hafa misst stjórn á skapi sínu á meðan hollenska kappakstrinum stóð um helgina. Hamilton missti forystuna vegna ákvarðanatöku liðsins og endaði fjórði.

Hamilton virtist líklegur til að vinna sína fyrstu keppni á tímabilinu þegar hann leiddi kappaksturinn og var með liðsfélaga sinn, George Russell, á eftir sér fyrir framan heimsmeistarann Max Verstappen á Red Bull.

Mercedes ákvað að Russell skildi koma inn til dekkjaskipta og skildu þá Hamilton eftir óvarinn fyrir heimsmeistaranum sem komst nokkuð auðveldlega fram úr Bretanum og vann keppnina.

Hamilton bölvaði Mercedes-mönnum í sand og ösku á meðan keppninni stóð, þar sem hann skildi ekkert í ákvarðanatökunni. Hann kvaðst svo eftir keppnina hafa séð eftir ummælum sínum.

„Ég var einfaldlega við ystu nöf tilfinningalega,“ sagði Hamilton. „Ég bið liðið afsökunar vegna þess að ég man ekki einu sinni hvað ég sagði. Ég tapaði mér bara,“

„En ég held að þeir viti að þetta er bara svo mikil ástríða,“ sagði hann.

Hamilton endaði fjórði, líkt og áður segir, en Russell var annar á eftir Verstappen. Charles Leclerc á Ferrari var þriðji.




Fleiri fréttir

Sjá meira


×