Handbolti

Olís-spá karla 2022-23: Í skuld eftir skelfinguna síðast

Ingvi Þór Sæmundsson skrifar
Gengi Aftureldingar ræðst að miklu leyti á frammistöðu Blæs Hinrikssonar.
Gengi Aftureldingar ræðst að miklu leyti á frammistöðu Blæs Hinrikssonar. vísir/vilhelm

Íþróttadeild Vísis og Stöðvar 2 Sports spáir Aftureldingu 7. sæti Olís-deildar karla í vetur.

Íþróttadeild Vísis og Stöðvar 2 Sports spáir fyrir um gengi liðanna í Olís-deild karla en keppni í deildinni hefst með fjórum leikjum fimmtudaginn 8. september.

Íþróttadeild spáir Aftureldingu 7. sæti Olís-deildar karla í vetur og að Mosfellingar fari því upp um tvö sæti milli ára.

Síðasta tímabil lofaði svo góðu fyrir Aftureldingu en endaði á versta mögulega hátt. Mosfellingar töpuðu fjölmörgum jöfnum leikjum og smám saman gufaði allt sjálfstraust upp hjá liðinu. Eftir því sem á tímabilið leið varð staðan alltaf verri og verri og á endanum varð 9. sætið niðurstaðan eftir tap fyrir Fram í hreinum úrslitaleik um sæti í úrslitakeppninni í lokaumferðinni. Mosfellingar voru því ekki á meðal átta bestu liða landsins í fyrsta sinn síðan þeir komu upp í Olís-deildina 2014.

Meiðsladraugurinn hefur verið með lögheimili að Varmá undanfarin ár og hrakfarirnar sem leikmenn Aftureldingar hafa lent í eru efni í heila bók. Sem fyrr er meiðslastaðan stóra spurningarmerkið fyrir tímabilið hjá Aftureldingu.

Með alla heila geta Mosfellingar stillt upp öflugu byrjunarliði en breiddin er lítil og Afturelding mátti ekki við því að missa Svein Andra Sveinsson. Hann fór til þýska B-deildarliðsins Rostock við takmarkaða ánægju Gunnars Magnússonar sem er að hefja sitt þriðja tímabil með Aftureldingu.

Markvarsla Aftureldingar á síðasta tímabili var slök en menn þar á bæ vonast til að hinn þrautreyndi Jovan Kukobat hjálpi til í þeim efnum. Pétur Júníusson kom einnig frá Víkingi og Böðvar Páll Ásgeirsson og Sveinn Aron Sveinsson tóku einnig fram skóna. Ekki vantar reynsluna hjá þessum köppum en spurning hversu mikið er til á tankinum.

Gengi Aftureldingar undanfarinn áratug

  • 2021-22: 9. sæti

  • 2020-21: 8. sæti+átta liða úrslit

  • 2019-20: 3. sæti

  • 2018-19: 6. sæti+átta liða úrslit

  • 2017-18: 6. sæti+átta liða úrslit

  • 2016-17: 4. sæti+bikarúrslit

  • 2015-16: 3. sæti+úrslit

  • 2014-15: 2. sæti+úrslit

  • 2013-14: B-deild (1. sæti)

  • 2012-13: 8. sæti

Lykilmaðurinn

Árni Bragi Eyjólfsson ætti að öllu eðlilegu að vera einn besti leikmaður Olís-deildarinnar.vísir/daníel

Eftir frábært tímabil með KA 2020-21, þar sem hann var markakóngur og valinn besti leikmaður Olís-deildarinnar, sneri Árni Bragi Eyjólfsson aftur í Mosfellsbæinn fyrir síðasta tímabil. Ekkert var upp á hann að klaga en í fimmtán deildarleikjum skoraði Árni Bragi 5,3 mörk að meðaltali. En hann fór úr axlarlið í lok febrúar og sneri ekki aftur fyrr en í lokaumferðinni. Árni Bragi hefur hingað til á ferlinum sloppið nokkuð vel við meiðsli, sérstaklega miðað við sveitunga sína, og stuðningsmenn Aftureldingar vonast til að hann komi endurnærður til leiks í vetur.

Félagaskiptamarkaðurinn

Komnir:

  • Pétur Júníusson frá Víkingi
  • Jovan Kukobat frá Víkingi
  • Sveinn Aron Sveinsson byrjaður aftur
  • Böðvar Páll Ásgeirsson byrjaður aftur

Farnir:

  • Andri Sigmarsson Scheving í nám erlendis

  • Agnar Ingi Rúnarsson til Víkings

  • Þrándur Gíslason hættur

  • Sveinn Andri Sveinsson til Rostock (Þýskalandi)

Markaðseinkunn (A-C): B

Fortíðarhetja sem gæti nýst í vetur

Markvarslan var hausverkur hjá Aftureldingu á síðasta tímabili en Bergsveinn Bergsveinsson gæti verið íbúfenið við honum. Hann varði mark Aftureldingar á gullaldarárum liðsins í kringum aldamótin. Bergsveinn var meðal annars aðalmörkvörður Mosfellinga þegar þeir unnu þrefalt tímabilið 1998-99. Hann varð einnig deildarmeistari með liðinu 2000.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.