Innlent

Ísland heldur áfram að heilla ferðamenn upp úr skónum: „Þetta er yndislegur staður, alveg yndislegur“

Fanndís Birna Logadóttir skrifar
Ferðamenn frá Bandaríkjunum og Bretlandseyjum sem fréttastofa ræddi við í dag voru hæstánægðir með Íslandsferð sína.
Ferðamenn frá Bandaríkjunum og Bretlandseyjum sem fréttastofa ræddi við í dag voru hæstánægðir með Íslandsferð sína.

Ferðamenn streyma nú til landsins eftir kórónuveirufaraldurinn. Fréttastofa náði tali af nokkrum þeirra en íslenska náttúran virtist heilla þá hvað mest. Allir voru sammála um að vilja koma aftur, sumir fyrr en aðrir.

Það þarf ekki að leita lengra en í miðbæ Reykjavíkur til að finna hluta af þeim fjölda ferðamanna sem er nú staddur á landinu. Margir eru í sinni fyrstu stóru ferð sinni eftir Covid og er ljóst að Ísland er áfram vinsæll áfangastaður nú þegar ferðasumarið er komið á fullt. Bandaríkjamenn eru stærsti hópurinn þegar litið er til samsetningar ferðamanna og koma Bretar sömuleiðis sterkt inn. 

En hvað er það sem heillar?

Koma aftur eftir þrjá daga

„Þetta var gamall draumur og loksins er ég kominn hingað,“ sagði Igor frá New York um komuna þegar fréttastofa náði tali af honum og konu hans, Lönu, við Hallgrímskirkju í dag. „Við vildum sjá goshveri, Bláa lónið fræga, og eldgíga,“ sagði Lana.

Þetta er þeirra fyrsta ferð til Íslands en þau ætla ekki að bíða lengi með að heimsækja landið aftur, þau fljúga til Danmörku á morgun og koma svo aftur eftir þrjá daga til að sjá meira, og slá ekki hendinni á móti annarri ferð. „Við viljum taka börnin með líka, þetta er fallegt land,“ sagði Igor.

Igor og Lana frá New York.

Ákváðu að koma til Íslands eftir ferð til Noregs

Þær Liz og Ivonne frá Bretlandi ákváðu að koma eftir að hafa ferðast til Noregs en þær höfðu aldrei komið til Íslands. Þær voru alsælar með ferðina en henni hafði verið frestað um tvö og hálft ár vegna faraldursins.

„Ég dáðist að landslagi og sögu þessarar eyjar. Þetta er yndislegur staður, alveg yndislegur. Og fólkið er vingjarnlegt, í alvöru, mjög vingjarnlegt fólk,“ sagði Liz og tók Ivonne undir. „Við munum örugglega koma aftur, við elskum þetta land,“ sagði Liz enn fremur.

Þær kipptu sér lítið upp við veðrið en höfðu þó orð á hitabylgjunni sem geisar í Evrópu um þessar mundir. „Ég verð að viðurkenna að þegar þau hringja að heiman og segja að það sé 31 gráða, vil ég helst ekki heyra það,“ sagði Ivonne og hló.

Liz og Ivonne frá Bretlandi.

Rigningin kom ekki að sök

Þá virtist veðrið ekki heldur trufla feðgana Orin og Pierre frá Vermont. „Við héldum að það myndi rigna af krafti alla vikuna þannig þetta er ekki eins alvarlegt og við héldum að það yrði,“ sagði Orin en þeir heilluðust af landinu út frá auglýsingum.

„Við flugum til Englands fyrir fimm árum með Icelandair og við vorum mjög hrifnir. Allar auglýsingarnar virkuðu. Þegar við vorum að hugsa um hvað við ættum að gera í sumar vorum við spenntir fyrir að koma hingað, sérstaklega vegna náttúrunnar,“ sagði Pierre.

Ferðin til Íslands var fyrsta fjölskylduferðin eftir Covid og sögðust þeir báðir vilja koma aftur til að sjá meira af landinu. „Við höfum séð rosalega fallega hluti í klukkutímafjarlægð frá Reykjavík en ég vil endilega fara hringveginn,“ sagði Pierre og tók Orin undir.

Orin og Pierre frá Vermont.

Íslenska landslagið draumur fyrir jarðfræðiáhugamenn

Skotinn Andrew kom síðan til Íslands með dóttur sinni, Megan. „Ég kom af því hún vildi koma til Íslands, því hún er mjög spennt fyrir jöklum og eldfjöllum,“ sagði hann. „Ég er hrifin af jarðfræði og svoleiðis,“ sagði Megan enn fremur.

Þetta var fyrsta ferð Meghan til Íslands og var hún alsæl. „Ég elska það,“ sagði hún en hún hafði meðal annars gengið á jöklum, farið í Bláa lónið og labbað undir fossum. Þá sagðist hún hiklaust koma aftur.

„Þetta er í annað sinn sem ég kem hingað, þannig ég hef komið aftur og ég mun koma aftur,“ sagði Andrew enn fremur.

Andrew og Megan frá Skotlandi.

Tengdar fréttir

Kortavelta erlendra ferðamanna aldrei meiri

Kortavelta erlendra ferðamanna hér á landi var 28,3 milljarðar króna í júní. Það er aukning um 27,4 prósent á milli ára og hefur veltan aldrei mælst hærri í júnímánuði frá því mælingar hófust árið 2012.

Banda­ríkja­menn bera af í brott­förum

Alls voru brottfarir erlendra farþega frá landinu í gegnum Keflavíkurflugvöll 176 þúsund talsins í júní. Aðeins fjórum sinnum hefur meiri fjöldi ferðamanna farið í gegnum flugvöllinn í júnímánuði síðan mælingar hófust.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.