Afla meiri raforku úr Svartsengi þrátt fyrir óróann undir Þorbirni

Kristján Már Unnarsson skrifar 10. júlí 2022 06:50

Orkuver HS Orku í Svartsengi hvílir undir fjallinu Þorbirni. Vilhelm Gunnarsson

Ráðamenn HS Orku stefna að því að auka raforkuframleiðslu í Svartsengi um þrjátíu til fjörutíu megavött á næstu þremur árum, aðallega með endurnýjun vélbúnaðar. Þeir óttast ekki fjárfestingar svo nálægt óróafjallinu Þorbirni.

Fjallað var um áformin í fréttum Stöðvar 2. Það var upp úr 1970 sem boranir hófust í Svartsengi eftir jarðgufu, sem fljótlega var farið að nýta, fyrst til hitaveitu en síðar einnig til raforkuframleiðslu. Meira en hálfri öld síðar sjá menn enn tækifæri þar til orkuframleiðslu.

Tómas Már Sigurðsson er forstjóri HS Orku. Viðtalið er tekið framan við Reykjanesvirkjun.Egill Aðalsteinsson

„Svartsengi er geysilega gott jarðhitasvæði. Við höfum nýtt það mjög vel í gegnum tíðina og það er greinilega mikil aukaorka þar,“ segir Tómas Már Sigurðsson, forstjóri HS Orku.

Þar eru þó ekki áformað að bora meira heldur að fá betri vélbúnað.

„Við erum með gamlar vélar sem við þurfum að skipta út. Og við teljum að við getum þar aukið framleiðsluna um þrjátíu megavött, án þess í raun að bora nýja holu heldur bara taka út gamlan búnað og setja nýjan búnað í staðinn.“

Frá orkuveri HS Orku í Svartsengi kemur bæði raforka og heitt vatn til húsahitunar.Stöð 2/Skjáskot

Gufuorka Svartsengis nýtist bæði til raforkuframleiðslu sem og til upphitunar á ferskvatni til að kynda hús Suðurnesjamanna. Betri nýting þeirrar gufu gefur einnig færi á frekari vexti.

„Breyta sem sagt hitaveitunni í varmaveitu og taka út gufu og framleiða rafmagn með henni. Þannig að við sjáum alveg fyrir okkur þrjátíu til fjörutíu megavött á næstu þremur árum til viðbótar í Svartsengi,“ segir Tómas.

Raforkuframleiðslan færi þannig úr um 67 megavöttum í um 100 megavött, sem yrði um fimmtíu prósenta aukning.

Orkuverið í Svartsengi hvílir norðan undir fjallinu Þorbirni, sem verið hefur miðja jarðhræringanna á Reykjanesskaga undanfarin ár. Ráðamenn HS segjast þó ekki smeykir við að fjárfesta meira í Svartsengi.

„Við höfum ekki verið það, nei. Vissulega er þetta nálægt þessu svæði. En Reykjanesið er allt eins og það er. Og vísindamenn spá nokkuð nákvæmlega fyrir, eins og sýndist í Geldingadölum, hvar kvikan kemur upp. Þannig að fyrst og fremst hugar maður náttúrlega bara að öryggi fólks.

En við erum náttúrlega á eldvirku svæði og erum að nýta það sem það gefur okkur. Og við verðum að geta tekið þá áhættu líka,“ svarar forstjóri HS Orku.

Hér má sjá frétt Stöðvar 2:

Árið 2014 fjallaði Stöð 2 um Auðlindagarðinn á Suðurnesjum í þættinum Um land allt, sem sjá má hér:

Orkumál Jarðhiti Jarðhræringar á Reykjanesi Eldgos í Fagradalsfjalli Grindavík

Tengdar fréttir

Ná þrjátíu megavöttum með betri nýtingu á varma Reykjanesvirkjunar

Mestu virkjanaframkvæmdir landsins um þessar mundir standa yfir á Reykjanesi en þar er verið að stækka jarðgufuvirkjun HS Orku um þrjátíu megavött. Ekki þarf þó að borar nýjar holur á svæðinu til orkuöflunar heldur er ætlunin að nýta betur þann jarðvarma sem þegar er til staðar.

29. júní 2022 22:22

Hvalárvirkjun aftur á dagskrá og tvö ár gætu verið í framkvæmdir

Framkvæmdir við Hvalárvirkjun á Ströndum gætu hafist eftir tvö ár, að mati forstjóra HS Orku. Það er þó háð því að tilskilin leyfi verði fengin fyrir nauðsynlegum háspennulínum.

2. júlí 2022 07:07

Hanna varnir fyrir Svartsengi, Grindavík og Reykjanesbraut

Eldgosið í Fagradalsfjalli tók kipp í gærkvöldi með miklum hraunflæðigusum og mældust óróakviðurnar um tíma þær mestu frá upphafi gossins. Byrjað er að hanna varnarmannvirki til að verja Grindavík, Svartsengi og Reykjanesbraut.

30. júní 2021 22:57

Telur tíu til tuttugu eldgos geta fylgt í kjölfarið á Reykjanesskaga

Landsmenn þurfa að vera viðbúnir tíu til tuttugu eldgosum á Reykjanesskaga á næstu tveimur til þremur öldum, að mati Páls Einarssonar jarðeðlisfræðings. Gera verði ráð fyrir mun myndarlegri hraungosum en því sem nú stendur yfir.

19. maí 2021 22:44

Hræringarnar búnar að auka orku Svartsengis

Umbrotahrinan á Reykjanesskaga hefur fært aukinn kraft í jarðhitakerfi Svartsengis, sem skilar núna meiri gufu til orkuframleiðslu hjá HS Orku.

15. apríl 2021 23:10

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.