Jón Gunnarsson dómsmálaráðherra mun í haust leggja fram frumvarp um víðtækar rannsóknarheimildir lögreglu. Lögregla mun meðal annars fá víðtækari heimildir til að afla upplýsinga til að meta ógn af hryðjuverkum og segir Jón þær verða í takt við það sem gengur og gerist í nágrannaríkjum Íslands.
Frá þessu er greint í Morgunblaðinu. Þar segir að Jón sé sammála Runólfi Þórhallssyni, aðstoðaryfirlögregluþjóni hjá greiningardeild ríkislögreglustjóra, um að rýmka þurfi heimildir lögreglu miðað við núverandi heimsmynd.
Þá sé mikilvægt að samræma rannsóknarheimildir lögreglunnar á Íslandi við heimildir lögreglu í samstarfsríkjum.
„Bæði til að upplýsingar geti gengið greiðar á milli og til þess að íslenska lögreglan geti aflað þeirra upplýsinga sem hún þarf til að geta veitt þær þessum samstarfsaðilum okkar og tekið þátt í þessu samstarfi af fullum krafti og þunga,“ segir Jón við Morgunblaðið.
Hann segir eðlilegt að samhliða verði eftirlit með lögreglu eflt.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
Fleiri fréttir
Sjá meira
