Ás­laug Thelma hafði betur gegn Orku náttúrunnar í Lands­rétti

Áslaug Thelma höfðaði mál gegn fyrirtækinu í kjölfar þess að henni var sagt upp störfum í september 2018. ON, sem er dótturfélag Orkuveitu Reykjavíkur, var sýknað af ásökunum hennar um ólögmæta uppsögn og kynbundinn launamismun í héraðsdómi í nóvember 2020. Í kjölfarið áfrýjaði Áslaug Thelma dómnum til Landsréttar.

Deila aðila sneri að því hvort uppsögn Áslaugar hefði grundvallast á kvörtun Áslaugar undan Bjarna Má Júlíussyni, fyrrverandi framkvæmdastjóra ON, en ON byggði á því að uppsögn hennar ætti rætur í því að Áslaug hefði ekki staðið undir væntingum sem starfsmaður. 

Fram kemur í yfirlýsingu frá ON að Landsréttur taki undir aðfinnslur sem komu fram í úttekt innri endurskoðunar Reykjavíkurborgar frá árinu 2018 og fyrirtækið hefur lagt sig fram um að bæta úr. Lögmaður ON hafi haft samband við lögmann Áslaugar Thelmu til að vinna úr niðurstöðu Landsréttar.

Ekki sýnt fram á að uppsögnin hefði grundvallast á öðru en kvörtunum Áslaugar

Í dómi Landsréttar er vísað til laga um jafnrétti kynjanna um að ekki megi segja upp starfsmanni sem óskar leiðréttingar á grundvelli laganna og að atvinnurekandi skuli gæta þess að starfsmaður sé ekki beittur óréttlæti, svo sem í starfsöryggi, kjörum eða mati á árangri.

Þar segir jafnframt að ON hefði ekki tekist að sýna fram á því að uppsögnin hefði grundvallast á öðru en kvörtun Áslaugar. ON hafi lengst af borið traust til Áslaugar, fjölgað verkefnum hennar og aukið ábyrgð samhliða því að ræða launahækkun henni til handa. 

Þá segir að kvörtun Áslaugar undan Bjarna hafi snúið að samskiptavanda en ekki kynferðislegri áreitni, þrátt fyrir að tilefni væri til þess, en í dómnum segir að málsgögn hafi borið með sér að Áslaug og aðrar konur hafi margsinnis kvartað yfir framferði yfirmanns hennar áður. ON hafi hvorki virkjað ferla sína í áreitnismálum né fylgt reglum um aðgerðir gegn kynbundinni áreitni á vinnustöðum.

ON er því skylt að greiða Áslugu skaða- og miskabætur vegna ólögmætrar uppsagnar.

„Nú hefur fallið dómur mér vil í þessu máli eftir næstum fjögurra ára baráttu. Ég vildi óska þess að þessum tíma ævi minnar hefði verið varið í eitthvað uppbyggilegra. En ég er þakklát fyrir að þessu máli er nú lokið og ég þakka öllum þeim sem sýndu mér vinarþel og stuðning í baráttunni fyrir réttlæti,“ segir Áslaug Thelma í færslu á Facebook-síðu sinni.

Sneru við dómi Héraðsdóms Reykjavíkur

Brottrekstur Áslaugar frá ON vakti mikla athygli á sínum tíma. Henni var sagt upp störfum í september 2018 og kvaðst hún ekki hafa fengið handbærar skýringar á því.

Innri endurskoðun Reykjavíkurborgar komst að þeirri niðurstöðu að uppsagnir beggja hefðu verið réttmætar. Héraðsdómur úrskurðaði árið 2020 að munur á launum Áslaugar og annars forstöðumanns sem hóf störf skömmu áður hefði verið málefnalegur þar sem Áslaug hafði enga starfsreynslu hjá fyrirtækinu.

Þá taldi dómurinn að ON hefði sýnt fram á að uppsögn Áslaugar hefði ekki komið til vegna kvartana hennar eða gagnrýni á þáverandi framkvæmdastjóra.

Fréttin hefur verið uppfærð.