Lífið

Stöð 2 leitar að næstu Idol-stjörnu Íslands

Tinni Sveinsson skrifar
Idol hefst í haust á Stöð 2. Leitin að stjörnu á aldrinum 16 til 30 ára hefst í dag.
Idol hefst í haust á Stöð 2. Leitin að stjörnu á aldrinum 16 til 30 ára hefst í dag. Stöð 2

Stöð 2 hefur í dag leit að nýrri íslenskri Idol-stjörnu. Sett hefur verið í loftið skráningarsíða fyrir áhugasama og undirbúningur að nýrri þáttaröð Idol, sem fer í loftið í haust, er formlega hafinn. Seinna í sumar munu fara fram áheyrnarprufur út um allt land.

Idol þættirnir hafa verið sýndir víða um heim síðustu tuttugu ár við gríðarlegar vinsældir. Margar af skærustu stjörnum tónlistarheimsins hafa stigið sín fyrstu skref þar. Íslendingar þekkja þættina einnig vel en fjórar íslenskar þáttaraðir voru sýndar á Stöð 2 á árunum 2003 til 2009.

16 til 30 ára geta tekið þátt

„Stöð 2 tilkynnir með stolti að leitin að næstu Idol stjörnu Íslands er hafin. Þættirnir verða á dagskrá í haust en leitin hefst núna.

Við hvetjum alla áhugasama á aldrinum 16 til 30 ára að senda inn myndband á slóðinni idol.stod2.is þar sem þeir láta ljós sitt skína og syngja tvo lagbúta. Idol-lestin mun einnig verða á ferðinni í leit að hæfileikafólki um landið í sumar. Nánari dagsetningar og staðsetningar verða auglýstar síðar,“ segir í tilkynningu frá Stöð 2.

„Við fundum fyrir miklum áhuga meðal áskrifenda okkar að vera með hæfileikaþátt og Idolið var oftast nefnt. Við vitum að það er fjöldinn allur af ungu fólki sem að vill nýta sér þennan vettvang til að koma sér á framfæri. Við erum gríðarlega spennt að vinna með öllu því fagfólki sem kemur að þáttunum og hlökkum mikið til að sjá ungt hæfileikafólk á Idol sviðinu í haust,“ segir Þórhallur Gunnarsson, framkvæmdastjóri fjölmiðla Stöðvar 2 og Vodafone.

Hverjir eru í dómnefnd?Stöð 2

Dómnefndin kynnt í næstu viku

Dómnefndin verður skipuð nokkrum af skærustu stjörnum íslenskrar tónlistar í dag. Hún verður kynnt til leiks hér á Vísi í næstu viku. Tónlistarstjórn þáttanna verður í höndum Magnúsar Jóhanns Ragnarssonar sem stýrir einnig hljómsveit þáttanna.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.