Innlent

Fundarhöld með namibískum rannsakendum og saksóknara

Margrét Helga Erlingsdóttir skrifar
Ólafur Þór Hauksson héraðssaksóknari segir að það sé góður gangur á rannsókninni.
Ólafur Þór Hauksson héraðssaksóknari segir að það sé góður gangur á rannsókninni.

Héraðssaksóknari hefur átt tvo fundi með þeim sem fara fyrir rannsókn og saksókn í Samherjamálinu í Namibíu. Varaforsætisráðherra Namibíu er stödd hér á landi ásamt sendinefnd til að ræða við íslensk stjórnvöld og rannsakendur. Héraðssaksóknari segir að það sé góður gangur á rannsókninni.

Tvö og hálft ár er liðið síðan Kveikur, Stundin og Al jazeera í samstarfi við Wikileaks flettu ofan af Samherjamálinu en í umfjöllun þeirra steig Jóhannes Stefánsson uppljóstrari fram og fullyrti um mútugreiðslur og skattsvik.

„Það hefur verið töluvert mikil gagnaöflun og verið að vinna úr henni auk þess sem yfirheyrslur hafa verið í gangi en það hafa orðið svolitlar tafir eins og flestir þekkja vegna COVID-19 og þá hafa verið erfiðleikar við að ná fundum, aðallega erlendis í tengslum við það. Það er nú verið að bæta úr því síðustu daga.“

Þetta segir Ólafur Þór Hauksson héraðssaksóknari sem staðfestir það sem greint er frá í ítarlegri grein á Stundinni að íslenskir rannsakendur hafi hitt þá namibísku í Haag í síðustu viku til að stilla saman strengi. Fundarhöldum hefur síðan verið fram haldið hér á Íslandi á síðustu dögum.

„Núna síðast eru fundir þá með þeim aðilum sem eru með rannsókn og saksókn í málum í Namibíu og það þurfti aðeins að fara yfir hvernig mál standa þar og það hafa nú verið fundir um það núna upp á síðkastið […] Ég get ekki farið neitt nánar ofan í efni fundanna en staðfesti þó að fundirnir hafi farið fram og hafa verið mjög gagnlegir.“

Netumbo Nandi-Ndaitwah varaforsætisráðherra Namibíu er stödd hér á landi ásamt þeim Ernu Van Der Merwe aðstoðarforstjóra namibísku spillingarlögreglunnar og Mörthu Imalwa, ríkissaksóknara. Tilgangur heimsóknarinnar er að hitta íslenska rannsakendur en einnig íslenska ráðherra. Ólafur vildi hvorki greina frá því hvort formleg framsalsbeiðni yfir hinum grunuðu hafi borist né hvort slík beiðni hafi verið rædd á fundum þeirra en samkvæmt heimildum Stundarinnar hafa namibískir rannsakendur farið fram á það við namibísk dómsmálayfirvöld, enda er framsal forsenda ákæru.

„En hins vegar eru fjölmörg önnur atriði en þetta framsal sem brýnt er að ræða og er undir í rannsókninni. Það er ýmislegt annað sem er uppi á teningnum en einungis það atriði.“

En er eðlilegt að rannsókn taki svona langan tíma?

„Já það getur verið það ef um er að ræða stórt og viðamikið mál. Þá taka þessi mál yfirleitt langan tíma, hvort sem það er hér á Íslandi eða erlendis. Ég bendi þá á, í þessu samhengi, að rannsakendur í Namibíu voru byrjaðir að skoða þetta mál margt löngu fyrir árið 2019. Ég held að það hafi verið árið 2015 sem þeir hófu að skoða þetta mál.“

En teljið þið ykkur hafa allt sem þið þurfið; nægan mannafla og nægt fjármagn?

„Svona mál taka auðvitað verulega í og halda fólki lengi uppteknu þannig að það ætti vera meira en það hefur engu að síður verið ágætis gangur í þessu máli og við teljum að það eigi að vera hægt að klára það.“

Ólafur sagði að ekki væri skynsamlegt að nefna neinn tímaramma þegar hann var spurður hvenær hann telji að rannsókn yrði lokið og málið sett í hendur ákæruvalds.

„Það er vegna þess að við erum með útistandandi réttarbeiðni og þá liggur ekki alltaf fyrir hvenær við fáum endurheimturnar út úr því en þessu miðar samt alveg ágætlega.“


Tengdar fréttir

Jóhannes uppljóstrari verðlaunaður í Svíþjóð

Jóhannes Stefánsson, uppljóstrari og fyrrverandi stjórnandi hjá Samherja í Namibíu, fékk sjálfbærnisverðlaun Gautaborgar í dag, sem kallast Win Win. hann fékk um fimmtán milljónir króna í verðlaunafé.

Fjár­sveltar rann­sóknir á efna­hags­brotum

Á síðustu árum hafa komið upp nokkur stór mál þar sem rökstuddur grunur leikur á um stórfelld efnahagsbrot. Það er mikið áhyggjuefni hversu lengi þessi mál eru til meðferðar hjá yfirvöldum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.