Handbolti

Sjáðu um­deilda dóminn sem réði úr­slitum: „Dómararnir í ruðnings­ham“

Valur Páll Eiríksson skrifar
Augnablikið sem réði úrslitum, þegar ruðningur var dæmdur á Eyjamenn undir lok leiks.
Augnablikið sem réði úrslitum, þegar ruðningur var dæmdur á Eyjamenn undir lok leiks. Vísir/Stöð 2 Sport

Umdeildur ruðningsdómur undir lok 31-30 sigurs Vals á ÍBV hafði mikið að segja í úrslitaeinvígi liðanna í Olís-deild karla að Hlíðarenda í gærkvöld. Sérfræðingar Seinni bylgjunnar voru sammála um að dómurinn hafi verið rangur og gagnrýna misræmi í dómgæslu í einvígi liðanna.

Valsmenn komust 31-30 yfir í leik gærkvöldsins áður en Erlingur Richardsson, þjálfari Eyjamanna, tók leikhlé þegar um 20 sekúndur lifðu leiks. Eyjamenn stilltu upp í kerfi hægra megin þar sem Elmar Erlingsson sótti á Alexander Örn Júlíusson í vörn Vals og sendi boltann út í horn á Theodór Sigurbjörnsson sem var kominn í gegn.

Dómarar leiksins dæmdu hins vegar ruðning á Elmar og von Eyjamanna því úti. Óhætt er að segja að gestirnir hafi verið ósáttir og lét Erlingur, þjálfari liðsins, óánægju sína í ljós í viðtali eftir leik.

Synd að svona dómur ráði úrslitum

Farið var yfir dóminn í Seinni bylgjunni eftir leik þar sem þeir Theódór Ingi Pálmason og Jóhann Gunnar Einarsson fóru yfir atvikið ásamt Stefáni Árna Pálssyni.

„Þetta er ekki ruðningur,“ sögðu þeir Theódór og Jóhann í kór um atvikið. Hann hleypur fyrir hann og ég held að hann sé búinn að losa boltann áður en snertingin verður,“ sagði Theódór Ingi.

„Þess vegna finnst mér svo skrýtið, þetta er svo stór dómur í lokin, þetta verður að vera rosalega afgerandi. En þeir voru náttúrulega í ruðningsham, dómararnir. Ég veit ekki hvað þeir dæmdu marga ruðninga og liðin voru bara að spila inn á þetta. Það var smá þreytt á köflum,“ sagði Jóhann Gunnar og bætti við:

„Þeir féllu í smá gryfju með þessa ruðningsdóma, og þegar þetta er svona rosalega mikilvægt og búinn að vera frábær leikur, þá á þetta ekki að ráðast á dómi,“

Theódór Ingi tók undir það og sagði: „Þú vilt fá augnablikið, að fá Theodór Sigurbjörnsson, þennan frábæra hornamann, á móti Björgvini Páli, þessum frábæra markmanni, með allt undir þegar 2-3 sekúndur eru eftir og leikurinn ræðst á einu skoti. Þú vilt fá þetta augnablik,“

Klippa: Ruðningsdómur í leik Vals og ÍBV

Misræmið mikið í seríunni - „Veist aldrei hvað þú færð“

Theódór ræddi þá misræmið sem hefur verið í dómgæslunni í leikjunum þremur í úrslitaeinvíginu til þessa, en þrjú mismunandi dómarapör hafa dæmt leikina þrjá.

„Maður er búinn að horfa á þessa þrjá leiki, með þrjú mismunandi dómarapör, og við erum að sjá einhvern veginn sitthvora línuna í öllum þessum leikjum. Það var rosalega hörð ruðningslína í þessum leik, svo í síðasta leik var rekið út af fyrir hvert einasta brot nánast, og í fyrsta leiknum var hálfgert stjórnleysi þar sem allt var leyft.“

„En það er svo skemmtilegt,“ sagði Jóhann Gunnar sem Theódór svaraði: „Að vita aldrei hvað þú færð?“

Þremenningarnir áttu frekari umræðu um dómaramálin en umræðuna má sjá í heild sinni í spilaranum að ofan.

Valur leiðir einvígi liðanna 2-1 eftir sigur gærdagsins og dugar sigur í Vestmannaeyjum í næsta leik til að tryggja sér Íslandsmeistaratitilinn. Leikur liðanna fer fram á laugardag klukkan 16:00 og verður sýndur beint á Stöð 2 Sport.


Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði.


Tengdar fréttir




Fleiri fréttir

Sjá meira


×