Innlent

Brynjar dæmdur fyrir þrjár nauðganir og margvísleg önnur brot gegn ungum stúlkum

Elísabet Inga Sigurðardóttir, Kolbeinn Tumi Daðason og Tryggvi Páll Tryggvason skrifa
Dómur í málinu var kveðinn upp við Héraðsdóm Reykjaness í dag.
Dómur í málinu var kveðinn upp við Héraðsdóm Reykjaness í dag. Vísir/Vilhelm

Brynjar Joensen Creed, sem ákærður var í umfangsmiklu kynferðisbrotamáli, hefur verið dæmdur í sex ára óskilorðsbundið fangelsi. Dómur í málinu gegn Brynjari var kveðinn upp í Héraðsdómi Reykjaness á þriðja tímanum.

Finnur Þór Vilhjálmsson, saksóknari hjá embætti Héraðssaksóknara, staðfestir refsinguna í samtali við fréttastofu. 

Í dómnum, sem birtur var á vef héraðsdóms á fimmta tímanum, kemur fram að Brynjar hafi meðal annars verið sakfelldur fyrir að nauðga þremur stúlkum undir lögaldri. Lögregla beitti tálbeituaðgerð til að hafa hendur í hári Brynjars.

Ákæra í sautján liðum

Aðalmeðferð fór fram í héraðsdómi á dögunum en þinghald í málinu, líkt og í flestum kynferðisbrotamálum, var lokað.

Í málinu sem var dæmt í nú var Brynjar ákærður fyrir að hafa nauðgað fjórum ólögráða stúlkum á grunnskólaaldri, sumum oftar en einu sinni, ítrekað og beitt þær allar, auk þeirrar fimmtu, ítrekuðu kynferðisofbeldi og -áreiti.

Alls var ákæran í sautján liðum eins og rakið var í frétt Vísis á dögunum.

Vísir greindi einnig frá því að Brynjar væri grunaður um fleiri brot en þau sem hann var ákærður fyrir í málinu sem var dæmt í í dag. Lögreglan er með fjölmörg brot til viðbótar til rannsóknar.

Brynjar hefur setið í gæsluvarðhaldi á Hólmsheiði síðan í nóvember eða í um hálft ár.

Ástæða þess að ákæra var gefin út í málinu sem dæmt var í í dag var sú að héraðssaksóknari getur aðeins haldið sakborningi í gæsluvarðhaldi í tólf vikur án ákæru. Því var aðeins gefin út ákæra fyrir hluta þeirra brota sem eru til rannsóknar.

Samkvæmt heimildum fréttastofu eru stúlkurnar sem karlmaðurinn var ákærður fyrir að hafa brotið á búsettar á Suðurnesjum og á höfuðborgarsvæðinu. Lögreglan á Suðurnesjum hefur verið með málið til rannsóknar.

Tálbeituaðgerð sett í gang

Í dómi héraðsdóms kemur fram að málið hafi ratað til lögreglu í október í fyrra þegar Barnaverndarnefnd Hafnarfjarðar kærði kynferðisbrot karlmanns til lögreglu. Stúlka undir lögaldri lýsti samskiptum við mann sem kallaði sig Sigga. Hann bæði hana þó um að kalla sig pabba.

Hún hefði hitt hann nokkrum sinnum, hann tekið af henni klámfengin myndbönd gegn greiðslu í formi peninga, fata, áfengis og veipvökva. Þau hefðu kynnst í gegnum Snapchat, verið í samskiptum við hann í fimm mánuði og líklega hitt hann tíu sinnum.

Í eitt skipti hefði hann ekið með hana á afskiptan stað þar sem hún hefði ekki þorað að segja nei þegar hann sagði henni að veita sér munnmök. Þá hefði hann káfað á rassi hennar og kysst hana áður en hann skutlaði henni til fundar við vini sína.

Þá lýsti stúlkan því að Brynjar hefði keypt kynlífstæki fyrir hana og vinkonu hennar, annan brotaþola í málinu. Hann hefði beðið þær að nota tækið og senda sér myndbönd. Þær hefðu gert það en myndbandið hefði farið í meiri dreifingu. Þannig hefði málið ratað á borð barnaverndar. Stúlkan sagði manninn einnig hafa sent sér myndbönd af öðrum stúlkum stunda munnmök með honum.

Í samskiptum við um 110 stúlkur undir lögaldri

Rannsókn lögreglu leiddi til þess þess að grunur féll á Brynjar og í byrjun nóvember í fyrra fékkst heimild hjá lögreglustjóra fyrir tálbeituaðgerð. Hún fólst í því að lögreglan tók yfir síma brotaþola og hélt áfram samskiptum við Brynjar. Þeim lauk með handtöku þremur dögum síðar. Var framkvæmd húsleit á heimili hans þar sem lagt var hald á fartölvu, flakkara, farsíma, harða tölvudiska, minnislykla og geisladiska.

Kom í ljós að Brynjar lét stelpurnar spila stigaleik þar sem hann verðlaunaði þær fyrir kynferðislegar athafnir. Því fleiri stig eftir því sem athafnir voru grófari. Þannig voru fimm stig gefin fyrir að veifa, brosa eða hoppa en þúsund stig fyrir að sýna kynfæri og leika sér með kynlífshjálpartæki.

Lögreglumaður sem skoðaði rafræn gögn úr síma Brynjars sagði fyrir dómi að lögregla hefði fundið kennitölur á um 100 stúlkum sem Brynjar hefði verið í sambandi við. Hann hefði verið í kynferðislegum samskiptum við um 240 kvenmenn og þar af hefðu tæplega 110 verið undir átján ára aldri. Í símum Brynjars hefðu líklega verið nokkur hundruð kynferðislegra mynda og myndskeiða.

Sakhæfur og mikill þroskamunur

Í niðurstöðu dómsins kemur fram að framkvæmd var geðrannsókn á Brynjari af dómkvöddum matsmanni. Niðurstaðan var sú að Brynjar hafi verið fær um að stjórna gjörðum sínum i öllum þeim tilvikum sem matsmaður hafði til skoðunar. Hann hafi verið fær um að stjórna gjörðum sínum á verknaðarstundum og heilsufar hans hafi ekki verið og sé ekki með þeim hætti að ætla megi að refsing geti ekki borið árangur. Taldist Brynjar því sakhæfur.

Brynjar var sakfelldur fyrir þrjár nauðganir og einnig mörg önnur alvarleg og sérlega svívirðileg kynferðisbrot. Brot hans beindust gegn ólögráða stúlkubörnum á viðkvæmum aldri, beindust gegn mörgum þolendum og stóðu yfir í langan tíma, að því er segir í niðurstöðu héraðsdóms.

Brotin hafi verði til þess fallin að hafa alvarlegar afleiðingar á sálarlíf stúlknanna til hins verra eins og þau sálfræðivottorð, sem varða hluta af stúlkunum og eru meðal rannsóknargagna málsins, staðfesta. Þá er snert á því að Brynjar sé um fimmtugt og því haft yfirburðarstöðu bæði í aldri og þroska þegar kom að samskiptum við stúlkurnar. Hann hafi nýtt sér þessa stöðu við framningu brota sinna.

Á annan tug milljóna króna í bætur og kostnað

Brynjar, sem vísaði til spennu- og kynlífsfíknar, hafi engu skeytt um mikilvæga hagsmuni stúlknanna og látið sér í léttu rúmi liggja hvaða afleiðingar brot hans kynnu að hafa á sálarlíf þeirra og heilsu að öðru leyti.

Héraðsdómur Reykjaness segir Brynjar ekki eiga sér neinar málsbætur. Við ákvörðun refsingar hafi þó verði tekið tillit til þess að hann hafi ekki áður sætt refsingu. Þótti hæfileg refsing sex ára fangelsi. Til frádráttar kemur gæsluvarðhald sem Brynjar hefur sætt frá 8. nóvember.

Þá var Brynjar dæmdur til að greiða stúlkunum fimm miskabætur. Einni stúlkunni 2,5 milljónir króna, annarri tvær milljónir króna, þeirri þriðju 1,5 milljónir króna og tveimur til viðbótar eina milljón króna hvorri. Þá þarf Brynjar að greiða stærstan hluta málsvarnarlauna verjanda síns, Elíasar Kristjánssonar eða 7,1 milljón króna auk aksturskostnaðar, þóknun og aksturskostnað réttargæslumanna stúlknanna upp á rúmlega fjórar milljónir króna. Annar sakarkostnaður upp á rúmlega sex hundruð þúsund krónur greiðist af Brynjari sömuleiðis.

Dóminn má nálgast hér.


Tengdar fréttir

Meintur barnaníðingur grunaður um miklu fleiri brot

Rúmlega fimmtugur karlmaður sem bíður dóms í umfangsmiklu kynferðisbrotamáli gegn börnum, er grunaður um fleiri brot en þau sem hann hefur verið ákærður fyrir. Dómur fellur í málinu í næstu viku.

Á­kærður fyrir að hafa keypt kyn­líf­s­tæki fyrir fimm stúlkur og svo nauðgað þeim

Karlmaður hefur verið ákærður fyrir að hafa nauðgað fjórum ólögráða stúlkum, sumum oftar en einu sinni, ítrekað og beitt þær allar, auk þeirrar fimmtu, ítrekuðu kynferðisofbeldi og -áreiti. Aðalmeðferð í málinu er lokið fyrir Héraðsdómi Reykjaness og er dómsuppsaga á dagskrá 19. maí næstkomandi. Þinghald í málinu er lokað.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×