Innlent

Telja Hjalt­eyrar­hjón hafa byrlað börnum ó­lyfjan í Garða­bæ

Berghildur Erla Bernharðsdóttir skrifar
Garðabær lét gera úttekt á starfsemi Hjalteyrarhjónanna sem voru með börn í gæslu í bænum frá 1996-2014. Fram kemur í þeirri úttekt að allar líkur eru á að þau hafi beitt einhver börn ofbeldi í bænum. Þá eru lýsingar á að þau hafi byrlað börnunum svefnlyf. Þetta svipar til lýsinga hjá þeim sem voru hjá þeim á Hjalteyri.
Garðabær lét gera úttekt á starfsemi Hjalteyrarhjónanna sem voru með börn í gæslu í bænum frá 1996-2014. Fram kemur í þeirri úttekt að allar líkur eru á að þau hafi beitt einhver börn ofbeldi í bænum. Þá eru lýsingar á að þau hafi byrlað börnunum svefnlyf. Þetta svipar til lýsinga hjá þeim sem voru hjá þeim á Hjalteyri. Vísir

Starfsmaður Hjalteyrarhjónanna sem ráku leikskóla í Garðabæ lýsir tveimur atvikum árið 2007 þar sem þau hafi beitt börn ofbeldi. Þá telja foreldri og einstaklingur sem var hjá þeim í vistun að börnunum þar hafi verið byrlað ólyfjan svo þau svæfu, jafnvel allan daginn.

Garðabær ákvað að hefja úttekt á starfsemi sem fór fram í daggæslu og leikskóla sem hjónin Beverly og Einar Gíslason ráku í sveitarfélaginu frá 1996 til 2014 en talið er að 80 börn hafi dvalið þar.  Það var eftir að fólk sem hafði verið í umsjón hjónanna á Hjalteyri á áttunda áratug síðustu aldar steig fram og lýsti gríðarlegu andlegu og líkamlegu ofbeldi af hálfu þeirra. 

Ráðgjafafyrirtækið EAÞ gerði úttektina og var hún kynnt fyrir bæjarráði Garðabæjar í síðustu viku.

Telja að börnunum hafi verið byrlað ólyfjan 

Þar kemur fram að rætt var við 20 foreldra og meirihlutinn lýsi upplifun barna sinna jákvætt eða hlutlaust.

Þrír foreldrar tala hins vegar neikvætt um hjónin og töldu að þau hefði ekki verið góð við börnin, einn taldi að sínu barni hefði verið byrlað ólyfjan þannig að það svæfi allan daginn, en Hjalteyrarbörnin lýstu einmitt slíkri meðferð.

Þá lýsir einstaklingur erfiðri og vondri dvöl.  Hjónin hafi verið afskiptalaus og alltaf í náttslopp, hann hafi hvorki fengið að fara mikið út að leika sér né mikið að borða. Hans upplifun sé að hann hafi meira og minna verið sofandi og telur að sér og öðrum börnum hafi verið byrlað ólyfjan.

Starfsmaður segist hafa séð hjónin beita ofbeldi

Loks lýsir starfsmaður sem starfaði fyrir hjónin í skamman tíma því að þau hafi bundið barn niður í matarstól. Einar hafi gripið í úlnið annars barns og læst sig inni á salerni með því í tíu mínutur.

 Andrúmslofið hafi verið skrítið og óþægilegt. Hann upplifði að hann væri staddur í undarlegum sértrúarsöfnuði en hjónin notuðu trúnna á ofbeldisfullan hátt á Hjalteyri samkvæmt lýsingum fólks sem var þar sem börn. 

Gunnar Einarsson bæjarstjóri Garðabæjar segist taka þessari niðurstöðu af alvöru.

Gunnar Einarsson bæjarstjóri Garðabæjar segir að eitt atvik þar sem barn sé beitt ofbeldi sé of mikið. Hann segir allar ferla hafa verið yfirfarna eftir úttekt á málefnum Hjalteyrarhjónanna í bænum.Vísir/Sigurjón

„Megin niðurstaðan er að foreldrar hafa upplifað dvölina jákvæða en það eru þarna nokkrir sem hafa ekki upplifað góða framkomu við börnin og  þegar slíkt er er það einu tilviki of mikið,“ segir Gunnar. 

Fram kemur í úttektinni að daggæsluráðgjafi hafi fengið símtal frá manni 2007 eða 2008 sem var sem barn á Hjalteyri og varaði í því símtali við hjónunum. Bæjarstjóri hafi verið upplýstur um málið. 

Hjónin voru látin vita af símtalinu en þau héldu áfram að gæta börn í bænum.

Gunnar segir að auðvitað hefði hann tekið málið mun fastari tökum hefði hann grunað að hjónin væru ekki í lagi. 

„Maður hefði átt að taka þetta símtal af meiri alvöru miðað við það sem kom svo í ljós með hjónin. En ég man ég lagði mikla áherslu á eftirlitið þarna þ.e. að fylgjast mjög vel með hjónunum. En eftir á að hyggja þá hefði maður átt að stíga enn fastar þarna inn,“ segir Gunnar.

Loka niðurstaða skýrslunnar er að það hefði mátt skrá betur atvik sem komu upp hjá bænum.

„Við létum fara yfir það hvernig eftirlitinu var háttað með þessum málum á þessum tíma og fengum athugasemdir um að við hefðum mátt skrá þetta allt saman mun betur. Þeir ferlar sem við erum með núna taka einmitt á því. Eftirlitið hjá okkur er gott í dag,“ segir Gunnar. 

Bæjarstjórinn segir að áfram verði tekið á móti fólki telji það sig þurfa á aðstoða að halda vegna málsins .

„Fólk getur áfram leitað til okkar ef það telur sig hafa orðið fyrir einhverju af hálfu hjónanna. Niðurstöðurnar eru með ákveðnum fyrirvara sem eru að ef það koma nýjar upplýsingar þá skoðum við það.“ segir Gunnar að lokum.


Tengdar fréttir

Hjalt­eyrar­börnin fá greiddar sann­girnis­bætur frá ríkinu

Dómsmálaráðherra hefur ákveðið að greiða fólki sem dvaldist á barnaheimili á Hjalteyri á áttunda áratug síðustu aldar sanngirnisbætur. Fram hefur komið að hjón sem höfðu umsjón með börnunum beittu þau gríðarlegu andlegu og líkamlegu  ofbeldi. Þá verður skipuð rannsóknarnefnd um Vöggustofuna í Reykjavík.

Biskup harmar Hjalt­eyrar­málið

Agnes M. Sigurðardóttir, biskup Íslands, gerði ofbeldi gagnvart börnum á Hjalteyri að umtalsefni í jólaávarpi sínu í hátíðarmessu í Langholtskirkju í dag. 

Daglegar pyntingar á Hjalteyri og enginn vildi hlusta

Enn og aftur stígur fram maður sem segist hafa verið beittur hræðilegum pyntingum af hjónum sem ráku barnaheimili á Hjalteyri á áttunda áratug síðustu aldar. Hann hefur í áranna rás reynt að ná eyrum yfirvalda til að fá hjónin rannsökuð en segist aldrei hafa fengið áheyrn.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.