Innlent

„Ég hef hvergi getað leitað réttlætis eða úrvinnslu“

Sunna Valgerðardóttir skrifar
Anna Katrín er mjög gagnrýnin á úrræðaleysi kerfisins þegar kemur að óhefðbundnum lækningum og heilunaraðferðum. Hún hefur hvergi getað leitað með brotin sem hún hefur orðið fyrir.
Vísir/Arnar

Ekkert eftirlit er með óhefðbundnum heilunar- og sjálfshjálparaðferðum og lítið gert nema þolendur verði fyrir alvarlegum lögbrotum. Kona sem hefur ítrekað orðið fyrir ofbeldi og misbeitingu í andlega heiminum kallar eftir vettvangi til að tilkynna brot.

Í nýjasta Kompás er hulunni svipt af ofbeldi, valdníðslu og lygum í andlega heiminum á Íslandi. Nýaldarsamfélagið hefur vaxið hratt undanfarin ár og eftirlitið með því er nánast ekkert. Hver sem er getur þóst vera hæfur leiðbeinandi, haldið viðburð, tekið við peningum og leitt fólk í gegn um berskjaldandi athafnir sem geta valdið óafturkræftum skaða. Kompás ræddi við fjölda fólks sem hafði orðið fyrir ofbeldi, misbeitingu eða svikum á viðburðum eða námskeiðum þar sem leiðbeinendur meiddu í stað þess að heila.

Margir skammast sín eftir brotin

„Fólk kemur oft mjög brotið og leitar sér aðstoðar þarna, er kannski ekki með mörkin sín uppi eða hefur ekki lært að setja þau upp og það kemur ennþá brotnara út,“ segir Anna Katrín, sem hefur orðið fyrir ítrekuðum og alvarlegum áföllum í gegn um tíðina og leitað ýmissa leiða til að lækna þau sár. Hún kallar eftir siðareglum fyrir andlega leiðbeinendur og bættri löggjöf. 

Fréttastofa spurðist fyrir hjá bæði lögreglu og Bjarkarhlíð, miðstöð fyrir þolendur ofbeldis, hvort margar tilkynningar hafi borist vegna þessara mála, en þaðan var lítið að frétta. Ein skýringin gæti verið sú að oftar en ekki eru brotin sem um ræðir ekki hrein og klár lögbrot og ofbeldið dulið.

„Margir skammast sín og líður eins og að hafa gabbast út í aðstæður þar sem er verið að beita beita ofbeldi, hvort sem það er andlegt, líkamlegt, fjárhagslegt eða kynferðislegt,“ segir Tanya Lind Daníelsdóttir Pollock, völva og heilari. Margir hafa leitað til hennar undanfarin misseri og deilt með henni reynslu sinni. 

Langir biðlistar og dýr geðheilbrigðisþjónusta 

Það er kannski ekki skrítið að eftirspurnin eftir óhefðbundnum heilunaraðferðum og sjálfshjálp fari vaxandi. Biðlistar eftir sálfræðingum, geðlæknum og félagsráðgjöfum eru óheyrilega langir og svo kostar sú þjónusta sömuleiðis oft mjög mikla peninga. En þú kemst yfirleitt strax að í seremóníur, heilanir, nú eða til stjörnuspekings, eins og Anna Katrín komst að.

„Eruði búnar að skemma börnin ykkar? Eruði bara rækilega búnar að fokka þeim upp? Af því að þið eruð svo fokkt öpp sjálfar? Þið þurfið að skoða þetta. Þið þurfið að fara þangað.“ 

„Og hugsa með ykkur: Vá, enginn smá fokking lærdómur að ég þurfi að lifa með því að ég fokkaði barninu mínu svo upp að hann er einhverfur.“ 

- Stjörnuspekingur

Kallað eftir lagabreytinum og skýrara regluverki

Fólk hefur viðrað þá skoðun á samfélagsmiðlum í dag, eftir að þátturinn fór í loftið, að það verði að bæta lagaumhverfið til að fólk geti leitað réttar síns, að það vanti löggjöf um óhefðbundnar lækningar og að Landlæknisembættið ætti að standa fyrir vitundavakningu um vanhæfa ráðgjafa.

„Þú mátt ganga miklu lengra yfir mörk fólks áður en þú ert stoppaður af,“ segir Anna Katrín. 

„Það þarf virkilega að fara að setja einhverja ramma um það sem er í gangi hér, því það virðist vera svo ótrúlega auðvelt að brjóta á fólki í þessum heimi.“

Í færslu á Facebook í dag gagnrýnir Anna Katrín harðlega úrræðaleysi kerfisins og vonast til að umræðan verði til þess að breytingar verði gerðar og skýr lagarammi verði settur í kring um allt sem viðkemur andlegum málefnum.

„Ég gagnrýni harðlega úrræðaleysi kerfisins þegar kemur að óhefðbundnum lækningum! Ég óska þess að með því að hafa hátt & sprengja bóluna að það verði gerðar breytingar & settur skýr lagarammi í kringum allt sem tengist andlega heiminum svo að fólk geti trúað því & treyst að það sé öruggt og að kerfið grípi það ef eitthvað brestur.“

Hún nefnir dæmi þar sem brotið hefur verið á henni, bæði hjá fyrrnefndum stjörnuspekingi, í sjamannámi og hjá heilara. 

„Ég hef hvergi getað leitað réttlætis eða úrvinnslu þar sem þau sem brutu á mér eru látin taka ábyrgð á orðum & gjörðum sínum. En ég vona að með umræðunni að það breytist.“

Tengdar fréttir

Ofbeldi og illska í skjóli andlegrar vinnu

Kompás ræddi við fjölda fólks sem hefur orðið fyrir ofbeldi, svikum og misbeitingu í andlega heiminum við það eitt að reyna að leita sér aðstoðar í góðri trú.

Heimilisofbeldi, dulbúnar orgíur og stjórnlaus tripp í nafni andlegrar vinnu

Eitraðir leiðbeinendur og vanhæfir kennarar skilja margir eftir sig slóð af sköðuðu fólki sem leitaði til þeirra í góðri trú. Ekkert eftirlit er með starfseminni og getur í raun hver sem er titlað sig leiðbeinanda. Töluvert er um að andleg vinna sé sett í búning einhvers konar heilunar, heimilisofbeldi getur verið kallað skuggavinna, og ef fólk er ekki til í allt þá er það ekki nógu vakandi. 

Hugvíkkandi lyf eru flugbeitt verkfæri

Í Kompás þætti gærkvöldsins var fjallað um það ofbeldi sem þrífst innan andlega heimsins svokallaða hér á landi, nánar tiltekið þeim kima hans sem hefur með shamanisma og hugvíkkandi lyf að gera.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×