Lífið

Sköpuðu rými sérstaklega fyrir börn í Hörpu

Elísabet Hanna skrifar
Sigríður Sunna Reynisdóttir er listrænn stjórnandi hönnunarteymisins Þykjó.
Sigríður Sunna Reynisdóttir er listrænn stjórnandi hönnunarteymisins Þykjó. Sigga Ella

Hönnunarteymið Þykjó fékk það verkefni að hanna Hljóðhimna sem er nýtt upplifunarrými fyrir fjölskyldur og börn í Hörpu. Þær hafa upplifað góð viðbrögð við hönnuninni og eru spenntar fyrir komandi verkefnum.

Í teyminu eru þær Sigríður Sunna Reynisdóttir leikmynda- og búningahönnuð, Ninna Þórarinsdóttir barnamenningarhönnuður, Erla Ólafsdóttir arkitekt og Sigurbjörg Stefánsdóttir klæðskeri og fatahönnuður.

Á HönnunarMars var hönnunarteymið Þykjó var með sýningu og viðburð fyrir börn og fjölskyldur í tenglsum við Hljóðhimna í Hörpu. Á sýningunni ,,Undir Hljóðhimnum" veittu þær innsýn í hönnunarferlið á bak við Hljóðhimna, allt frá fyrstu hugmynd, til skissu til smíðateikninga og svo var hægt að upplifa lokaútkomuna sjálfa sem er aðgengileg öllum í Hörpu um ókomna tíð.

Blaðamaður hafði samband við Sigríði Sunnu Reynisdóttur sem er listrænn stjórnandi ÞYKJÓ.

Hvernig kviknaði hugmyndin að Hljóðhimnum?

Melkorka Ólafsdóttir, verkefnastjóri hjá Hörpu, hafði samband við okkur og bauð okkur þann heiður að leiða hönnunarferlið fyrir verkefnið. Þetta var búinn að vera langþráður draumur margra allt frá því að Hallfríður Ólafsdóttir heitin plantaði þessu fræi: Að skapa rými sérstaklega fyrir börn í Hörpu.

Við unnum verkefnið í samvinnu við Hörpu og íbúa hússins: Sinfóníuhljómsveit Íslands, Stórsveit Reykjavíkur, Íslensku óperuna, Reykjavík Audio og auðvitað sjálfan Maxímús Músíkús. Auk þeirra voru Gagarín, Irma, Vísindasmiðjan og Krakkaráð ÞYKJÓ frábærir samstarfsaðilar.

Hver voru fyrstu skrefin í að framkvæma hana?

Við hönnuðir ÞYKJÓ lögðum mikla áherslu á að fyrstu skrefin yrðu samtal og samstarf við börn. Við fengum hópa barna á aldrinum fimm til átta ára, alls hundrað börn, sem komu í Hörpu síðasta sumar og tóku þátt í vinnustofum með okkur og hljóðtilraunum með vísindamönnum Vísindasmiðjunnar. Við skoðuðum rýmið með þeim þegar það stóð tómt og fullt af möguleikum og fengum þeirra álit á hvernig það gæti orðið.

„Öll okkar hönnunarvinna í kjölfarið byggði á þessu samtali og samstarfi við börnin.“

Hvernig viðbrögð hefur hönnunin verið að fá?

Við höfum fengið mikið af afskaplega fallegum viðbrögðum frá bæði fullorðnum og börnum. Einn lítill snáði sagði okkur að hann vildi eiga heima í Hljóðhimnum - það er mikið hrós. Svo tala margir foreldrar um að það sé lúxusvandamál hvað sé erfitt að ná börnunum aftur út því þeim finnist svo gaman og vilji dvelja lengur. Það er líka gaman að heyra frá tónmennta- og tónlistarkennurum hvernig þetta getur stutt við kennslu og fræðslu í skólum.

„Almennt höfum við fundið fyrir þakklæti yfir því að vandað sé til verka fyrir börn og fjölskyldur.“

Hvað hefur verið skemmtilegasta verkefnið hjá ykkur til þessa?

Við erum svo lánsamar að hvert skemmtilega verkefnið tekur við af öðru. Við áttum mjög gjöfulan tíma sem staðarlistamenn í Menningarhúsum Kópavogs á síðasta ári þar sem við unnum Kyrrðarrýmin okkar í Gerðarsafni, tónlistarverkefnið Fuglasöngva í Salnum og búningalínuna Ofurhetjur jarðar í Bókasafni Kópavogs. 

Næst munum við gera innsetninguna Sjónarspil hjá vinum okkar í Náttúrufræðistofu Kópavogs sem við hlökkum mikið til.

Finnst ykkur Harpa orðin fjölskylduvænni?

Já, okkur finnst til fyrirmyndar hvað stjórn hússins var með skýra stefnu um að gera Hörpu fjölskylduvænni og tilbúin að fylgja því eftir af krafti. 

Við upplifðum sterkt á HönnunarMars hvernig húsið iðaði af lífi og barnamenningu, foreldrar gátu komið og átt fjölbreyttar gæðastundir með börnunum sínum.

Eru fleiri svona verkefni væntanleg í Hörpu?

Hljóðhimnar er varanleg innsetning og mun þróast áfram með fjölbreytt framhaldslíf, sem er einstaklega ánægjulegt. Þetta er hjarta barnamenningar Hörpu sem púlsar út í önnur rými hússins, eins og til dæmis Norðurbryggju. Við hönnuðum margt með það í huga að hægt væri að færa það til um húsið og bæta við.

Hljóðhimnar eru með sína eigin viðburðadagskrá en nú eftir HönnunarMars verður til dæmis Sveifluball fyrir börn og fjölskyldur með Stórsveit Reykjavíkur þann 21. maí.

En á öðrum stöðum?

Okkur finnst mikil gróska í barnamenningu á Íslandi og vonum að við færumst nær því sem tíðkast í mörgum öðrum Norðurlöndum, þar sem flestar opinberar menningarstofnanir hafa vönduð barnarými og jafnvel heilu barnamenningarhúsin.

Hvað er framundan?

Auk áðurnefndrar innsetningar í Náttúrufræðistofu Kópavogs erum við með spennandi verkefni sem við megum ekki tala um strax, en hvetjum alla áhugasama að fylgjast með okkur á samfélagsmiðlum.


Tengdar fréttir

Ný hljóð við Hörpu með komu nýs útilistaverks

Útilistaverkið Himinglæva var afhjúpað fyrir framan Hörpu í dag. Listaverkið er eftir Elínu Hansdóttur myndlistarkonu og er fagurlega formað hljóðfæri. Tónar heyrast frá listaverkinu þegar vindurinn blæs.

Allt í blóma hjá Hildi Yeoman

Hildur Yeoman stóð fyrir sýningunni In Bloom sem var partur af HönnunarMars og fór fram í Höfuðstöðinni. Merkið hefur verið áberandi bæði innan og utan landsteinanna og er þekkt fyrir draumkennd prent, falleg snið og litadýrð. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.