Sagðir vilja selja Fjaðrárgljúfur á hundruð milljóna króna

Kjartan Kjartansson skrifar 10. maí 2022 08:56

Aðsókn ferðamanna í Fjaðrárgljúfur hefur verið mikil undanfarin ár en gljúfrið á meðal helstu náttúruperlna Suðurlands. Vísir/Vilhelm

Eigendur jarðar sem Fjaðrárgljúfur tilheyrir hafa samþykkt kauptilboð í hana sem er sagt hlaupa á 300 til 350 milljónum króna. Ríkið á forkaupsrétt á gljúfrinu en er sagt hafa skamman tíma til að ákveða hvort það neyti hans.

Fréttablaðið segist hafa heimildir fyrir því að kaupandi gljúfursins sé Íslendingar sem starfi í ferðaþjónustu. Magnús Leópoldsson, fasteignasali sem sér um söluna, segi hana þó enn í ferli.

Fjaðrárgljúfur er á meðal vinsælli ferðamannastaða á Suðurlandi. Umhverfisstofnun hefur annast það og lokaði aðgangi að því um tíma árið 2019 til að vernda gljúfrið fyrir ágangi ferðamanna sem streymdu þangað eftir að kanadíski skallapopparinn Justin Bieber birti myndir af sér við það.

Magnús segir ekkert liggja fyrir um að fyrir væntanlegum kaupanda vaki að hagnast með gjaldtöku við gljúfrið. Bílastæði hafa fram að þessu verið gjaldfrjáls og ekki þarf að greiða fyrir að skoða gljúfrið.

Skaftárhreppur Ferðamennska á Íslandi

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.