Innlent

Allt að 170 flótta­menn borða saman á hverju kvöldi í Guð­rúnar­túni

Hallgerður Kolbrún E. Jónsdóttir og Óttar Kolbeinsson Proppé skrifa
Fjöldi flóttafólks frá Úkraínu borðar kvöldmat hjá Pipar í Guðrúnartúni.
Fjöldi flóttafólks frá Úkraínu borðar kvöldmat hjá Pipar í Guðrúnartúni. Vísir/Egill

Samtökin Flottafólk, sem stofnuð voru til að bjóða flóttafólki frá Úkraínu kvöldmat og samkomuaðstöðu, taka á móti allt að 170 manns á hverju kvöldi í mat. Forsvarsmaður verkefnisins segir augljóst að fólkið þurfi á miðstöðinni að halda til að ræða málin. 

Auglýsingastofan Pipar hefur boðið matsal sinn á kvöldin fyrir samtökin og þangað streymir fólk kvöld hvert. Svavar Örn Eysteinsson, kerfisstjóri hjá auglýsingastofunni Pipar, sagði í kvöldfréttum Stöðvar 2 að þangað komi á milli 20 og 170 manns kvöld hvert. 

„Við finnum það alveg að þau vilja líka bara koma, hittast og spjalla og drekka kaffi. Við erum með mat en svo er það þessi félagslegi partur að hittast og ræða málin,“ segir Svavar.

„Við erum að halda úti félagsmiðstöð fyrir fólkið sem að kemur hingað frá Úkraínu, elda mat og kaffi og fáum hingað dót: Fatnað, bleyjur, dömubindi, allt til að útdeila til fólksins frá fyrirtækjum og sjálfboðaliðum, á hverjum degi. Ég teki við þessu og Dögg vinkona mín hér á Pipar gerir það líka,“ segir Svavar. 

Starfseminni hefur verið haldið úti núna í um fimm vikur og Svavar segir að henni verði ekki hætt í bráð. Fyrsta kvöldið hafi verið boðið upp á KFC-máltíð en síðan hafi þetta undið upp á sig og heildsölur farið að gefa vörur og matsalurinn þróast í félagsmiðstöð. 

„Það koma alltaf fleiri og fleiri. Ég sá fullt af nýjum andlitum í gær og í síðustu viku. Við erum öll farin að heilsast hérna og krakkarnir sem komu fyrst eru allir sjúkir í mann. Það eru allir farnir að þekkjast en það kemur alltaf nýtt fólk,“ segir Svavar. 

Svavar á sjálfur óljósa og loðna tengingu en að öllum líkindum var langamma hans úkraínsk. 

„Amma mín úr föðurætt kemur hingað með dalli frá Þýskalandi eins og svo margar aðrar konur gerðu á tímum seinna stríðs og endar sem vinnukona uppi í Borgarfirði. Mamma hennar og hún, samkvæmt mínum upplýsingum, flúðu Rússland vegna hungursneyðar. En það var engin hungursneyð á þessum tíma neins staðar annars staðar en í Úkraínu og það er eina sem við vitum af móðurætt ömmu minnar. Mér finnst mjög líklegt að langamma mín sé frá Úkraínu,“ segir Svavar. 

Svavar Örn Eysteinsson, kerfisstjóri hjá Pipar, sér um kvöldmatarþjónustuna.Vísir/Egill

Hann segir fólkið sem sæki miðstöðina eiga sína slæmu daga, eðlilega, en það sé mjög þakklátt fyrir þjónustuna. 

„Þau koma hingað og fá upplýsingar og við erum að útdeila einhverjum gjafabréfum, eins og um dagin fengum við gjafabréf frá Fly Over Iceland þannig að við útdeildum þeim og svo erum við með gjafabréf sem WorldClass hefur gefið. Það er alls konar svona. Svo er þetta upplýsingaveita og fólk fær útdeilt nauðsynjavörum sem eru hér niðri í kjallara.“


Tengdar fréttir

Ný móttökumiðstöð fyrir flóttafólk var opnuð í Reykjavík

Ný móttökumiðstöð fyrir flóttafólk hefur opnað í Reykjavík þar sem Domus Medica var áður til húsa. Guðmundur Ingi Guðbrandsson félagsmálaráðherra segir mikilvægt að flóttafólkið geti leitað allrar nauðsynlegrar þjónustu á einum stað.

Vestur­bæingar sjá um hundrað flótta­mönnum á Hótel Sögu fyrir nauð­synjum

Tæplega eitt hundrað úkraínskir flóttamenn, konur og börn, hafa fengið þak yfir höfuðið í Bændahöllinni, þar sem Hótel Saga var þar til nýlega. Svo virðist sem fólkið fái ekki mikið meira en þak yfir höfuðið enda hafa íbúar Vesturbæjar tekið það á sig að verða fólkinu úti um helstu nauðsynjar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×