Innlent

Níu andlát tengd lækninum nú á borði lögreglu

Kolbeinn Tumi Daðason skrifar
Gustað hefur um Heilbrigðisstofnun Suðurnesja undanfarin misseri. Dæmi eru um að íbúar í Reykjanesbæ leiti frekar til höfuðborgarinnar eftir læknisþjónustu.
Gustað hefur um Heilbrigðisstofnun Suðurnesja undanfarin misseri. Dæmi eru um að íbúar í Reykjanesbæ leiti frekar til höfuðborgarinnar eftir læknisþjónustu. Vísir/Vilhelm

Rannsókn Lögreglunnar á Suðurnesjum á mistökum í starfi læknis við Heilbrigðisstofnun Suðurnesja hefur undið upp á sig og lýtur nú að andláti níu sjúklinga á stofnuninni á árunum 2018 til 2020. Því til viðbótar eru mál fimm annarra sjúklinga til skoðunar en þeir höfðu verið látnir hefja lífslokameðferð áður en þeir voru fluttir á hjúkrunarheimili og slíkri meðferð hætt.

Þetta kemur fram í úrskurði Héraðsdóms Reykjaness vegna rannsóknargagna sem læknirinn, Skúli Tómas Gunnlaugsson, óskaði eftir því að fá aðgang að. Landsréttur komst að þeirri niðurstöðu að lögreglu bæri að veita Skúla aðgang að hluta þeirra gagna sem hann óskaði en þó ekki öllum.

Lögreglan á Suðurnesjum segir að rannsókn vegna átta sjúklinga af fjórtán sé á frumstigi. Grunur leiki á að Skúli Tómas sé ábyrgur fyrir rangri greiningu og meðferð sömu sjúklinga. Þannig hafi hann gerst sekur um manndráp auk fleiri hegningar- og sérrefsilagabrota.

Af hálfu lögreglu er sérstaklega bent á málefni eins sjúklinganna fjórtán og álits óháðra sérfræðinga, sem Embætti landlæknis aflaði, að sjúkdómsgreining, meðferð og umönnun sjúklingsins hafi verið alvarlega ábótavant. Skúli Tómas hafi gefið röng fyrirmæli um lífslokameðferð og fylgt eða látið fylgja þeim eftir með staðfestri notkun morfíns og fleiri lyfja sem stuðlað hafi að ótímabæru andláti sjúklingsins síðla árs 2019.

Skúli Tómas hefur frá því í ágúst 2021 haft réttarstöðu sakbornings en þá var tekin skýrsla af honum hjá lögreglu. Daginn eftir óskaði verjandi hans eftir afrit af fyrirliggjandi gögnum og fékk hluta þeirra send. Öðrum yrði haldið eftir vegna rannsóknarhagsmuna.

Þá kom fram að dómkvaddir matsmenn ættu að hefja störf í janúar á þessu ári en þeir eiga að svara spurningum vegna meðferðar, greiningar og umönnunar þeirra sjúklinga sem lögreglurannsóknin lýtur að.

Almar Möller, verjandi Skúla, hefur barist áfram fyrir því að umbjóðandi hans fái málsgögn. Eftir að hafa verið neitað um hluta gagnanna lét hann reyna á rétt sinn fyrir dómi. Héraðsdómur og svo Landsréttur úrskurðuðu að hann skildi fá gögn afhent að frátöldum þeim sem væru ekki til á skjalaformi því þau teldust ekki til skjala í skilningu laga um meðferð sakamála.

Skúli Tómas var í desember færður til í starfi hjá Landspítalanum. Hann hafði þá verið í endurmenntun og þjálfun á Landspítalanum eftir að embætti landlæknis gaf honum takmarkað lækningaleyfi eftir að hann missti það vegna atburðanna á HSS. Fram kom í yfirlýsingu Landspítalans í desember að hann yrði ekki í sjúklingasamskiptum á meðan skýrari mynd fengist af þeirri atburðarás sem væri til rannsóknar hjá lögreglu.

Landspítalinn áréttað að með þessu væri ekki verið að leggja mat á sekt eða sakleysi í málinu. Forstjóra og stjórnendum spítalans bæri að standa vörð um það traust sem til spítalans sé borið og verði sjúklingar því ætið að njóta vafans.

Dætur sem misstu móður sína, sem var sjúklingur á HSS, ræddu málið í kvöldfréttum Stöðvar 2 í ágúst í fyrra.


Tengdar fréttir

Vill skoða betur vaktafyrirkomulag og frítökurétt hjá HSS

Heil­brigðis­ráð­herra segir úr­bætur í heil­brigðis­þjónustu Suður­nesja komnar í far­veg. Hann vill skoða betur hvort vakta­fyrir­komu­lag Heil­brigðis­stofnunar Suður­nesja (HSS) skapi furðu­mikinn frí­töku­rétt lækna, sem geri það að verkum að þeir starfi mikið á öðrum heil­brigðis­stofnunum á lands­byggðinni.

Fékk tólf tonna lyftara á fótinn á sér og sendur heim í teygju­sokk

Bæjar­full­trúi Reykja­nes­bæjar telur að einka­rekin heilsu­gæsla gæti leyst ýmis vanda­mál svæðisins. Í­búar á Suður­nesjum hafa kvartað sáran undan þjónustu Heil­brigðis­stofnunar Suður­nesja sem virðist illa mönnuð og ná illa utan um á­lagið.

Kurr í Suðurnesjamönnum vegna HSS

Þingmaður Samfylkingarinnar segir vanda Heilbrigðisstofnunar Suðurnesja skrifast á vanrækslu stjórnvalda gagnvart Suðurnesjum. Kurr og óánægja sé í íbúum sem eigi skilið almennilega heilbrigðisþjónustu eins og aðrir landsmenn.

Ó­sáttir í­búar upp­nefna HSS „Slátur­hús Suður­nesja“

Íbúar Suðurnesja eru margir orðnir langþreyttir á þjónustu Heilbrigðisstofnunar Suðurnesja (HSS) og kalla hana öllum illum nöfnum. Þeir segja lækna gefa sér lítinn tíma til skoðunar og að rangar greiningar á alvarlegum kvillum séu allt of algengar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.