Innlent

Andlát tveggja ára stúlku: Nokkur dæmi þess að tæpt hafi staðið

Lillý Valgerður Pétursdóttir skrifar
Jónas Egilsson, sveitarstjóri Langanesbyggðar, segir stjórnvöld verða að tryggja að öryggi íbúa sé ekki ógnað. 
Jónas Egilsson, sveitarstjóri Langanesbyggðar, segir stjórnvöld verða að tryggja að öryggi íbúa sé ekki ógnað.  Vísir/Einar

Íbúar á landsbyggðinni búa við skerta þjónustu og það er stjórnvalda að tryggja að öryggi þeirra sé ekki ógnað. Þetta segir sveitastjóri Langanesbyggðar í Norður-Þingeyjarsýslu en hann kallar eftir því að stjórnvöld tryggi betri heilbrigðisþjónustu á svæðinu eftir að tveggja ára stúlka lést þar vegna Covid-19.

Foreldrar stúlkunnar sem lést eftir að hafa fengið Covid-19 sögðu í kvöldfréttum okkar í gær að heilbrigðiskerfið hefði brugðist þeim. Þau búa á Þórshöfn í Langanesbyggð í Norður-Þingeyjarsýslu og telja læknisþjónustu óásættanlega sem margir á landsbyggðinni búa við. 

Þegar dóttir þeirra veiktist var næsti læknir á Kópaskeri sem er í 70 kílómetra fjarlægð frá heimili þeirra og því skoðaði hjúkrunarfræðingur barnið en ekki læknir.

Umfjöllunina má sjá að neðan.

Jónas Egilsson, sveitarstjóri Langanesbyggðar í Norður-Þingeyjarsýslu, segir íbúa hafa áhyggjur af hversu lítil heilbrigðisþjónusta sé í boði á staðnum.

„Fólk hér hefur áhyggjur af þeirri heilbrigðisþjónustu og almennt þeirri þjónustu sem að ríkisvaldið á að bjóða okkur hérna og þetta umrædda slys hérna, hörmulegi atburður sem var hérna um daginn, hann kallar á þá umræðu og í raun og veru kallar líka á það að stjórnvöld gefi okkur skýr svör um það hvað er talið svona hæf þjónusta eða viðbragð hérna á svæðinu. Það er ekki í boði að mínu viti að fólk hérna búi við óöryggi. Því líði ekki vel hérna.“

Dæmi þess að tæpt hafi staðið 

Hann segir nokkur dæmi um það á síðustu árum að tæpt hafi staðið að veikt fólk hafi komist undir læknishendur í tíma. Of langt sé í næsta lækni ef bæjarbúar veikjast en enginn læknir er með fasta viðveru í bænum.

„Sem dæmi þá erum við með flugvöll hérna og áætlunarflug hingað og þar af leiðandi möguleikar á sjúkraflug og þeir bjarga heilmiklu fyrir okkur það er ekki spurning um það. Það er hérna nýlegt tilfelli þar sem að kalla þurfti út snjóruðningstæki og björgunarsveit til þess að koma einstaklingi á sjúkrahús á Akureyri en sem betur fer tókst það vel en það mátti ekki tæpara standa.“

„Við þurfum að sækja alla okkar almennu læknisþjónustu, augnlækna, tannlækna og fleiri þjónustu um langan veg en þetta er svona grunnþjónusta sem þarf að vera til staðar og fólkið þarf að vera nokkuð öruggt um það að þessi þjónusta sé hérna til staðar til þess að okkur líði vel og líði sem öruggustum.“

Mæðgurnar Berglind og Petra.Aðsend

Mikilvæg þjónusta þurfi að vera til staðar í bænum. 

„Þetta er bara liður í því að gera þetta að samfélagi ekki vinnustað að hafa þessa hluti í lagi.“

Hann segir stjórnvöld síðustu ár hafa skert þjónustu á landsbyggðinni á kostnað öryggis. 

„Svokallaðar hagræðingaraðgerðir þær bitna fyrst og fremst á dreifbýli það virðist vera þróunin undanfarin ár. Það er náttúrulega dýrara að reka þessa læknaþjónustu við gerum okkur grein fyrir því en það er svona þessi grunnþjónusta hún er skert.“

Á sjötta hundrað manns búa á Þórshöfn.vísir/Vilhelm

Á milli fimm og sex hundruð manns búa á Þórshöfn og nágrenni og hefur andlát stúlkunnar haft mikil áhrif á samfélagið.

„Nálægðin er mikil en styrkur samfélagsins felst í því að við höfum styrk af hvort öðru en þetta hefur áhrif á samfélagið í heild sinni.

Þvert á stefnu stjórnvalda

Foreldrarnir hafa nú ákveðið að flytja frá Þórshöfn til Akureyrar þar sem þau treysta sér ekki til að búa með syni sína svo langt frá læknum og sjúkrahúsi.

„Harmur foreldra og aðstandenda er mjög mikill og okkar samúð liggur hjá þessu fólki en vonandi getum við samt dregið einhvern lærdóm af þessu og kannski verður umræðan í kjölfarið til þess að við skoðum þessi mál betur og fólk eins og þetta unga fólk duglega, sem er því miður að flytja héðan, að það þurfi ekki fleiri að flytja héðan út af þessum ástæðum. Það er þvert á hugmyndir okkar og stefnu stjórnvalda að jafna lífsgæði og lífskjör víða um landið. Þannig þetta er eitthvað sem ég held að ríkisvaldið þurfi að skoða í sínum ranni hvernig við getum tryggt öryggi íbúanna sem best.“


Tengdar fréttir

Mikil­vægt að hlustað sé á á­hyggjur for­eldra með veik börn

Barnasmitsjúkdómalæknir segir nokkuð sjaldgæft að börn veikist alvarlega af Covid-19. Tilfelli tveggja ára stúlku sem lést úr sjúkdómnum fyrr í þessum mánuði sýni hins vegar að það geti gerst. Hann segir mikilvægt að hlustað sé á foreldra barna þegar veikindi eru annars vegar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.