Hyggja á áframhaldandi sölu á hlut ríkisins í Íslandsbanka

Í tilkynningu ráðuneytisins á vef Stjórnarráðsins kemur fram að Bjarni hafi sent Bankasýslunni bréf um ákvörðun sína í dag.

„Ákvörðun ráðherra byggir á fyrirliggjandi greinargerð sem lögð var fyrir fjárlaganefnd og efnahags- og viðskiptanefnd Alþingi og felur í sér að bankinn skuli seldur í áföngum fyrir árslok 2023.

Umsagnir nefndanna liggja nú fyrir, en meiri hlutar þeirra beggja mæla með því að hafist verði handa við framhald sölu. Þá telur Seðlabankinn að telja megi að jafnræði bjóðenda verði tryggt og er salan talin hafa takmörkuð áhrif á gjaldeyrismarkað, gjaldeyrisforða bankans og laust fé í umferð,“ segir í tilkynningunni.

Þar segir að framhald sölu verði háð því að markaðsaðstæður séu hagfelldar.

„Þrátt fyrir að ófriður í Austur Evrópu hafi haft margháttuð áhrif á eigna- og fjármálamarkaði á heimsvísu telur Bankasýslan að það raski ekki meginforsendum söluáformanna að svo stöddu. Þannig hafi verð á hlutum í bankanum ekki verið hærra en það er um þessar mundir,“ segir jafnframt í tilkynningunni.

Á síðasta ári seldi ríkið um 35 prósenta hlut sinn í Íslandsbanka, fyrir 55 milljarða króna. Ríkið á enn um 65 prósenta hlut í bankanum

Á vef Stjórnarráðsins er þá hægt að nálgast hlekki á efni sem tengist fyrirhugaðri sölumeðferð á hlutum í Íslandsbanka.