Innherji

Aukið eftirlit með kafbátum við Ísland til að vernda fjarskiptaöryggi

Ólöf Skaftadóttir skrifar
Þórdís Kolbrún segir stóraukið kafbátaeftirlit á Íslandi skýrt teikn um þær breytingar sem orðið hafa á öryggisumhverfi landsins undanfarin ár. 
Þórdís Kolbrún segir stóraukið kafbátaeftirlit á Íslandi skýrt teikn um þær breytingar sem orðið hafa á öryggisumhverfi landsins undanfarin ár. 

Ísland veitir gistiríkisstuðning vegna kafbátaeftirlits bandalagsríkja sem farið hefur fram við Ísland frá árinu 2014 vegna aukinnar umferðar kafbáta í kringum Ísland. Fram hafa komið vísbendingar þess efnis að rússneskir kafbátar hafi komið sér fyrir nálægt sæstrengjum sem liggja frá landinu.

Á síðasta ári voru flugvélar við kafbátaeftirlit flesta daga ársins samanborið við 21 dag árið 2014. „Þessi fjölgun eftirlitsdaga er skýrt teikn um þær breytingar sem hafa orðið á öryggisumhverfi Íslands,” segir Þórdís Kolbrún Reykfjörð Gylfadóttir, utanríkisráðherra.

Hún segir kafbátaeftirlitið liður í vöktun bandalagsríkjanna í Norður Atlantshafi. 

Heimildir Innherja herma að eftirlitið sé meðal annars til þess að tryggja fjarskiptaöryggi enda liggur tenging Íslands við umheiminn í gegnum sæstrengi. Áður hafa komið fram vísbendingar þess efnis að rússneskir kafbátar hafi komið sér fyrir nálægt sæstrengjunum tveimur sem liggja frá Íslandi til Evrópu. Í hvaða tilgangi er ekki hægt að fullyrða um.

Sæstrengir gegna veigamiklu hluverki í samskiptum okkar við okkar helstu útflutningslönd, segir Áslaug Arna

Rof eða skemmdir á strengjunum hefðu víðtæk áhrif

Sæstrengir falla undir nýstofnað ráðuneyti Áslaugar Örnu Sigurbjörnsdóttir sem segir sífellt verið að reyna að auka öryggi fjarskipta, almennt. „Sæstrengir gegna veigamiklu hluverki í samskiptum okkar við okkar helstu útflutningslönd,” segir hún og bætar við að aukin áhersla hafi undanfarið verið lögð á öryggi fjarskipta út frá almannahagsmunum og þjóðaröryggi. 

„Ekki síst því nánast öll tal- og gagnafjarskipti frá landinu til útlanda fara í gegnum strengina."

Rof eða skemmdir á sæstrengjunum gætu gert Ísland að mestu sambandslaust við umheiminn. Slíkt gæti haft víðtækar afleiðingar á efnahag þjóðarinnar og öryggis- og varnarmál. Gríðarlega kostnaðarsamt gæti reynst að bæta slíkar skemmdir.

Við getum leyft okkur að vera þakklát fyrir herleysið okkar, en við ættum ekki að gorta okkur af því. Ísland treystir nefnilega líka á hernaðarstyrk þegar á reynir til þess að tryggja frið og öryggi, segir Þórdís Kolbrún

Áslaug Arna segir að öflug, íslensk fyrirtæki í landinu reiði sig mjög á gott og öruggt samband við útlönd.

Eftirlitið mikilvægt til að tryggja frið og öryggi

Þórdís Kolbrún segir Íslendinga vera herlausa þjóð og friðelskandi. „En reyndin er sú að venjulegt fólk í öllum löndum - almenningur - er líka friðelskandi og hatar stríð,” segir hún.

„Þetta á einnig, og ekki síst, við í löndum sem ekki geta kosið þann munað að vera herlaus. Við getum leyft okkur að vera þakklát fyrir herleysið okkar, en við ættum ekki að gorta okkur af því. Ísland treystir nefnilega líka á hernaðarstyrk þegar á reynir til þess að tryggja frið og öryggi.”


Tengdar fréttir

Íslensk öryggismál ekki á neinum tímamótum vegna Úkraínustríðsins

Vegna Úkraínustríðsins hafa dúkkað upp skoðanir um að þess vegna þurfi að hyggja að nýju að hernaðarlegu öryggi Íslands. Umræða um öryggismál er af hinu góða en þarf að byggja á réttum forsendum. Þá kann hún að valda fólki óþörfu áhyggjum með tali um ógn við Ísland í tengslum við innrásina í Úkraínu og harmleikinn þar.

Segir Ísland hvorki varið fyrir innrás né hryðjuverkum

Prófessor í stjórnmálafræði segir að Íslendingar verði nú að taka umræðuna um hvort sérstakar varnarsveitir hafi viðveru á öryggissvæðinu á Keflavíkurflugvelli, í ljósi stríðs í Evrópu. Ísland sé hvorki varið fyrir allsherjarinnrás né sértækum hryðjuverkaárásum. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.