„Ég vaknaði nokkrum sinnum við sprengingar og byssu­hvelli“

„Það voru rosalegir bardagar hérna í nótt. Ég vaknaði nokkrum sinnum við þvílíkar sprengingar og byssuhvelli. Klukkan sex í morgun var brjáluð barátta og síðan allt í einu hætti hún. Það var mjög skrítið, eiginlega akkúrat þegar sólarupprás var og það hefur eiginlega ekkert heyrst síðan,“ segir Óskar Hallgrímsson, ljósmyndari og íbúi í Kænugarði. 

Hann segir mjög skrítið að þurfa að venjast því að heyra sprengingar og skothríð. Borgin sé bara nútímaleg evrópsk borg. 

„Það er eins og þú sért bara í München, það er mjög lítill munur á þeim og svo allt í einu bara heyrirðu í byssuhvellum og stórskotahríð og ein og ein svakaleg sprenging inn á milli,“ segir Óskar. 

Sprengdu upp íbúabyggingu í morgun

Hann segist enn engin átök hafa séð en hann er búsettur í hjarta miðborgarinnar. Rússneski herinn hefur komist inn í norðanverða borgina, austurhluta hennar og suðurhluta og eitthvað inn í miðborgina. 

„Ein af þessum stóru sprengingum var við flugvöll sem er frekar nálægt mér, við hliðina á honum var gerð eldflaugaárás og þeir sprengdu upp íbúabyggingu þar í morgun. Ég veit að herinn er að standa sig vel, aðra nóttina í röð. Þeir eru ekki að ná neinu svæði af neinu ráði á sitt vald. Þeir eru ekki komnir inn í miðbæinn af alvöru til dæmis,“ segir Óskar. 

Hann hefur sjálfur heyrt að úkraínski herinn sé búinn að þvinga þann rússneska í hálfgerðan flöskuháls. 

„Þeir voru búnir að ná að taka yfir einhvern flugvöll í gær en ég held að það sé búið að ná honum aftur, ég er ekki búinn að fá staðfestar fregnir af því samt. Þeir hafa reynt að koma fallhlífahermönnum inn í borgina en þurftu í nótt að snúa við vegna þess að úkraínski herinn skaut svo mikið upp í loftið á þá og í nótt var flugvél skotin niður full af fallhlífahermönnum frá Rússum. Þannig að þeir ná ekki að koma liðsauka inn í borgina.“

Fuglasöngur, heiðskýrt og púðurlykt í lofti

Hann segist varla hafa farið út úr húsi síðan í fyrradag, fyrst dag árásarinnar, en í gær gekk hann að neðanjarðarlestarstöð nærri heimili hans, þar sem fjöldi fólks haldi nú til. 

„Ég fór út í gær og í stað þess að fara hérna yfir í næsta hús í sprengjuskýlið þegar sírenurnar fóru af stað fór ég í neðanjarðarlestarstöð sem er hérna rétt hjá. Það er fullt af fólki sem hefur komið sér fyrir þar og það var mjög margt fólk sem svaf þar í nótt en göngutúrinn þangað og hingað er það eina sem ég hef gert,“ segir Óskar. 

„Það var mjög fallegur dagur, blár himinn og gott veður. Maður heyrði bara fuglasöng því það er enginn á ferðinni og enginn á götunum. Það er mjög skrítið en púður- og brunalykt í loftinu,“ segir Óskar. 

„Núna heyrir maður ekkert nema fuglasöng og þá meina ég ekki neitt, því það er engin umferð. Það eru nokkrir bílar að keyra hér og þar en Kænugarður er stórborg og þú ert vanur að heyra niðinn í borginni en nú heyrirðu ekkert neitt nema fuglasöng.“