Stoltenberg verður næsti seðlabankastjóri Noregs

Atli Ísleifsson skrifar 4. febrúar 2022 11:05

Jens Stoltenberg hefur verið framkvæmdastjóri NATO síðustu ár. EPA

Jens Stoltenberg, framkvæmdastjóri NATO, verður næsti seðlabankastjóri Noregs. Hann er skipaður til sex ára og mun taka við embættinu 1. október.

Fjármálaráðherra Noregs greindi frá skipun Stoltenbergs í morgun, en aðstoðarseðlabankastjórinn Ida Wolden Bache, sem var einnig einn umsækjenda um stöðuna, mun gegna embættinu frá 1. mars til 1. október þegar skipunartími Stoltenbergs sem framkvæmdastjóri NATO rennur út og hann kemur til starfa í norska seðlabankanum.

Stoltenberg er hagfræðingur að mennt og tekur við stöðunni af Øystein Olsen sem tilkynnti á síðasta ári að hann vildi láta af störfum nú í febrúar.

Stoltenberg tók við stöðu framkvæmdastjóra NATO árið 2014, en hann gegndi embætti forsætisráðherra Noregs á árunum 2000 til 2001 og svo aftur frá 2005 til 2013.

Stoltenberg er fyrsti maðurinn frá tíunda áratugnum sem gegnir stöðu seðlabankastjóra Noregs og er með fortíð í norskum stjórnmálum. Hann er auk þess fyrsti maðurinn sem hefur áður gegnt embætti forsætisráðherra Noregs sem tekur við starfi seðlabankastjóra landsins.

NATO Noregur

Tengdar fréttir

Jens Stoltenberg sækir um stöðu seðlabankastjóra

Jens Stoltenberg, framkvæmdastjóri Atlantshafsbandalagsins (NATO), er í hópi umsækjenda sem vilja taka við starfi seðlabankastjóra Noregs.

14. desember 2021 09:56

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.