Viðskipti innlent

Eigandi Nýju vínbúðarinnar ákærður fyrir skattsvik

Kolbeinn Tumi Daðason skrifar
Sverrir Einar Eiríksson hefur vakið athygli fyrir ýmis viðskipti undanfarin ár.
Sverrir Einar Eiríksson hefur vakið athygli fyrir ýmis viðskipti undanfarin ár. Vísir

Sverrir Einar Eiríksson, eigandi Nýju vínbúðarinnar sem komið hefur að alls kyns athyglisverðum rekstri undanfarin ár, hefur verið ákærður af héraðssaksóknara fyrir skattsvik og peningaþvætti í rekstri þriggja einkahlutafélaga sem öll hafa orðið gjaldþrota og verið afskráð. Málið verður þingfest í mars. 

Um er að ræða félögin BHG sem stofnað var árið 2016, Sogið veitingar stofnað 2018 og Jupiter gisting stofnað sama ár. Sem framkvæmdastjóri og varastjórnarmaður BHG ehf. er Sverrir Einar ákærður fyrir meiriháttarbrot gegn skattalögum og peningaþvætti með því að hafa ekki staðið skil á virðisaukaskattskýrslum félagsina á lögmæltum tíma, virðisaukanum sjálfum, ekki skilað staðgreiðslu opinberra gjalda og staðgreiðsluskilagreinum vegna þeirra.

Samanlögð upphæð í tilfelli BHG ehf. nemur um fjórtán milljónum króna en auk þess er Sverrir Einar ákærður fyrir peningaþvætti með því að hafa aflað félaginu BHG ehf. ávinnings og nýtt ávinninginn í þágu rekstrar félagsins.

Alls 32 milljónir króna

Sverrir Einar rak um tíma veitingastaðinn Þrastalund í Grímsnesi í félaginu Sogið veitingar ehf. Hann er ákærður fyrir meiriháttar brot á skattalögum og peningaþvætti sem framkvæmdastjóri og stjórnarmaður Sogsins veitinga ehf. með því að hafa ekki staðið skil á staðgreiðslu opinberra gjalda og staðgreiðsluskilagreinum félagsins. Upphæðin nam 9,3 milljónum króna en hann er einnig ákærður fyrir peningaþvætti í þessum lið.

Að lokum sætir hann ákæru fyrir að hafa sem framkvæmdastjóri og stjórnarmaður Jupiter gisting ehf. ekki staðið skil á staðgreiðslu opinberra gjalda og staðgreiðsluskilagreinum árin 2018 og 2019. Heildarupphæðin nam rúmum 8,7 milljónum króna. Félagið varð gjaldþrota árið 2019 en í frétt Fréttablaðsins kom fram að Jupiter gisting ehf. hefði um tíma tengst rekstri á Hótel Brimi í Skipholti.

Er Sverrir Einar einnig ákærður fyrir peningaþvætti í þessum lið.

Komið víða við

Það komast fáir með tærnar þar sem Sverrir Einar hefur hælana hvað fjölbreytni í rekstri varðar. Hann hefur keypt gull af Íslendingum, stundað viðskipti með demanta, opnað smálánafyrirtæki og boðið upp á 95 prósent fasteignalán. 

Þá hefur hann rekið gistiheimili, starfsmannaleigu, veitingastað en fyrrnefndur Þrastalundur í Grímsnesi komst endurtekið í fréttirnar, meðal annars fyrir bröns sem áhrifavaldar voru fastagestir í, fyrir verðlag á vatnsflöskumog núðlum auk áfengissölu í versluninni.

Það var svo síðastliðið sumar sem Sverrir Einar opnaði Nýju vínbúðina en um er að ræða breska vefverslun sem þjónar íslenskum markaði.

Faðir Sverris, Eiríkur Rúnar Sigurbjörnsson sjónvarpsstjóri á Omega, fékk tíu mánaða dóm á síðasta ári fyrir skattsvik. 

Uppfært klukkan 18:50:

Fréttastofu hefur borist eftirfarandi tilkynning frá Sverri Einari vegna umfjöllunar um málið:

Reykjavík, 18. janúar 2022

Yfirlýsing frá Sverri Einar Eiríkssyni

Héraðssaksóknari hefur nú gefið út ákæru á hendur mér fyrir skattalagabrot vegna þriggja félaga, þar sem ég var ábyrgðarmaður. Fjölmiðlar hafa ákæruna undir höndum og hafa, eðli málsins samkvæmt, fjallað um málið í dag.

Ég hef í nærri aldarfjórðung stundað ýmis konar viðskipti, þó mest fasteignaviðskipti hér á landi og í Bretlandi. Þá hef ég komið að kaupum á gulli og demöntum, stundað lánastarfsemi, veitinga- og gistihúsarekstur, starfsmannaleigu og fleira. Flest hefur gengið vel en vissulega hefur ekki allur rekstur gengið upp með þeim hætti sem lagt var upp með í byrjun, og er það miður.

Þau félög sem um ræðir héldu utan um starfsemi á sviði veitingareksturs. Því miður var sá rekstur erfiður og gekk ekki sem upp, þrátt fyrir að ég legði mig allan fram þá varð ég að játa mig sigraðan að lokum. Því fór sem fór með þau félög.


Tengdar fréttir

Nýja vín­búðin fer í sam­­keppni við ÁTVR

Á­fengis- og tóbaks­verslun ríkisins er komin með nýjan sam­keppnis­aðila, sem stílar inn á ís­lenskan markað. Net­verslunin Nýja vín­búðin opnaði fyrir um tveimur vikum en það er við­skipta­maðurinn Sverrir Einar Ei­ríks­son sem rekur hana. Sverrir á litríka viðskiptasögu að baki en hann hefur meðal annars keypt gull og veitt 95 prósenta fasteignalán.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.