Koma til móts við námsþyrsta

Nýju ári fylgja nýjar áskoranir og mörg strengjum við heit um að breyta um lífsstíl, prófa eitthvað nýtt eða læra eitthvað spennandi. Þeir sem vilja bæta við sig þekkingu, næla sér í aukin réttindi eða einfaldlega auðga andann, finna það sem þeir leita að á námskeiðsvef Alfreðs. Nanna Arnfríðardóttir Christensen, verkefnastjóri segir mikla þróunarvinnu hafa verið lagða í vefinn undanfarna mánuði.

„Yfir hundrað námskeið eru í boði inni á síðunni frá ólíkum fræðsluaðilum um allt land. Okkur fannst vanta vettvang þar sem hægt væri að finna öll námskeið sem boðið er upp á á Íslandi á einum stað og höfum lagt mikla þróunarvinnu í námskeiðsvefinn okkar undanfarið ár, meðal annars endurbætt notendaviðmót og auðveldað leit,“ útskýrir Nanna.

Hægt er að leita eftir flokkum eins og til dæmis Tungumál, Iðngreinar, Heilsa og lífsstíll eða Fyrir börn. Einnig er hægt að leita eftir ákveðnum námskeiðsseljanda ef fólk hefur hug á að sækja námskeið hjá Endurmenntun HÍ, Dale Carnegie eða Kvan svo nokkrir séu nefndir.

Alfreð er stærsti atvinnuvefur landsins og þar er að finna nánast hvert einasta lausa starf til umsóknar. Námskeiðin eru þó ekki eingöngu ætluð þeim sem eru í atvinnuleit, þvert á móti er að finna fjölskrúðugt úrval námskeiða fyrir allan aldur á vefnum.

„Þarna inni eru allar gerðir námskeiða, bæði námskeið sem veita fólki aukin atvinnuréttindi eins og verðbréfaréttindi, fjármálarekstur, bókaranám og leiðtogafærni en einnig heilsutengd námskeið, skapandi námskeið og fleiri námskeið tengd áhugamálum og lífsstíl. Þarna eru námskeið fyrir allan aldur og til að mynda fjöldi spennandi námskeiða fyrir börn. Námskeiðsvefinn er einnig hægt að nota til þess að fá innblástur og hugmyndir, það er eitt að „gúggla“ þegar fólk langar að læra eitthvað nýtt, í leitinni á námskeiðsvefnum fær fólk upp þau námskeið sem koma til greina,“ segir Nanna.

Notendavænni bæði fyrir neytendur og seljendur námskeiða

Skráning á námskeið hefur verið einfölduð. Vefurinn leiðir notandann beint inn á síðu viðkomandi námskeiðshaldara þar sem skráning fer fram. Atvinnuvefurinn Alfreð hefur yfir hundrað þúsund notendur á mánuði og því tilvalið fyrir seljendur námskeiða og skóla að ná til fjöldans og auglýsa námskeið hjá Alfreð. Þá hefur vefurinn einnig verið gerður notendavænni fyrir námskeiðshaldara og mjög auðvelt að setja inn auglýsingu fyrir námskeið. Námskeiðsvefurinn er einnig aðgengilegur í Alfreð-appinu þar sem viðmótið er notendavænt og þægilegt að skrolla yfir úrval námskeiða.

Öflugur hópur stendur að baki Alfreð og segir Nanna bæði atvinnuvefinn og námskeiðsvefinn í stöðugri þróun.

Nánari upplýsingar er að finna á vefsíðu Alfreðs.