Körfubolti

Fékk að spila sinn fyrsta leik og fagnaði sigri

Sindri Sverrisson skrifar
Kyrie Irving er mættur aftur til leiks og fagnaði sigri í nótt.
Kyrie Irving er mættur aftur til leiks og fagnaði sigri í nótt. AP/Darron Cummings

Kyrie Irving, sem enn er óbólusettur gegn Covid-19, fékk að spila sinn fyrsta leik á tímabilinu í NBA-deildinni í körfubolta í gærkvöld og fagnaði sigri.

Vegna þess að hann er óbólusettur má Irving ekki spila körfubolta í New York, heimaborg Brooklyn Nets. Félagið ákvað auk þess að banna honum að æfa og spila útileiki, þar til nýverið að ákveðið var að kalla á Irving.

Hann spilaði því í Indianapolis í gærkvöld í 129-121 sigri Brooklyn á Indiana Pacers, og skoraði 22 stig í sterkri endurkomu síns liðs, þrátt fyrir að hafa verið svo lengi frá keppni.

„Hann leit út eins og hann á að sér, ekki það að það hafi komið á óvart,“ sagði Steve Nash, þjálfari Brooklyn.

Indiana komst mest 19 stigum yfir en Brooklyn tókst að bregðast við því og skoraði Kevin Durant 39 stig fyrir liðið. Durant fagnaði því að sjá Irving aftur spila:

„Hann leit ekkert út fyrir að vera stressaður. Hann er með gott pókerfés. Hann er hæglátur náungi. Hann spilar með orku og ástríðu,“ sagði Durant.

Irving sagðist engu að síður hafa fundið fyrir stressi og sagði þetta öðruvísi frumraun en hann hefði áður prófað á sínum körfuboltaferli.

„Þetta hafði meiri þýðingu, að vera átta mánuði í burtu og í svona mikilli óvissu. Ég róaðist þegar leið að seinni hálfleik. Hverju sem liðið þarf á að halda þá geri ég það,“ sagði Irving.

  • Úrslitin í nótt:
  • Charlotte 140-111 Detroit
  • Orlando 106-116 Philadelphia
  • Washington 111-114 Houston
  • Boston 97-99 San Antonio
  • Indiana 121-129 Brooklyn
  • Dallas 99-82 Golden State
  • Milwaukee 111-117 Toronto
  • Minnesota 98-90 Oklahoma
  • Denver 109-115 Utah
  • Portland 109-115 Miami
  • Sacramento 102-108 Atlanta

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði.

NBA



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.