Fagnar 41,1 milljón króna með sonum sínum þremur um áramótin

Kolbeinn Tumi Daðason skrifar 30. desember 2021 15:23

Konan segist hlakka til að fagna með sonum sínum sem eru hjá henni um hátíðarnar. Vísir/Vilhelm

Kona á sjötugsaldri vann 41,1 milljón króna þegar hún var ein með allar tölur réttar í Lottó á jóladag. Þá var dreginn út hæsti þrefaldi potturinn hingað til.

Í tilkynningu frá Íslenskri getspá segir að konan, sem býr á höfuðborgarsvæðinu, hafi látið athuga miðann á sölustað í gær og var vísað niður í Laugardal í höfuðstöðvar Íslenskrar getspár. Þar voru góðu fréttirnar opinberaðar og komu vinningshafanum gjörsamlega í opna skjöldu.

„Segja má að vinningurinn hafi verið heppileg aukaverkun af jólastressinu,“ segir í tilkynningunni. Konan hafi lýst því hvernig hún var skyndilega stödd fyrir framan N1 við Bíldshöfða án þess að muna hvaða erindi hún átti þangað. Hún hafi því ákveðið að skella sér bara inn og kaupa Lottómiða.

„Hún brá ekki út af vananum og keypti þrjár raðir í sjálfvali þar sem hún á þrjá syni.“

Konan segir vinninginn einstaklega kærkominn. Hennar fyrsta verk verði að greiða eftirstöðvarnar af húsnæðisláninu. Mest hlakki hún til að fagna með sonum sínum enda séu þeir allir hjá henni núna um hátíðarnar þótt þeir séu uppkomnir og búsettir erlendis.

Fjárhættuspil

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.