Enn óbólusettur en „ótrúlega þakklátur“ fyrir að fá að vera með

Brooklyn Nets hefur hingað til bannað Irving að æfa en eftir útbreiðslu kórónuveirusmita undanfarið er liðið aðeins með tíu leikmenn til taks og ákvað að breyta afstöðu sinni gagnvart Irving.

Irving má eftir sem áður ekki spila körfuboltaleiki í New York vegna sóttvarnareglna í borginni en hann getur spilað með Brooklyn í útileikjum, í þeim borgum þar sem aðrar reglur gilda.

„Ég skildi ákvörðun þeirra [forráðamanna Brooklyn Nets] og virði hana. Ég þurfti virkilega að halda aftur af mér og láta ekki tilfinningarnar blinda mér sýn varðandi það hvað þeir ákváðu að gera. Ég varð að meta hlutina og sjá þá frá þeirra sjónarhorni, það er að segja félagsins og liðsfélaga minna,“ sagði Irving.

„Ég vissi hverjar afleiðingarnar yrðu,“ sagði Irving um þá ákvörðun að fá ekki bólusetningu.

„Ég var hins vegar ekki undirbúinn fyrir þær á nokkurn hátt. Fyrir tímabilið hugsaði ég bara um að ég yrði fullgildur liðsmaður, og ætlaði bara að njóta þess að spila og búa til frábært körfuboltafélag. Því miður fór það ekki þannig. Allt á sér sína ástæðu. Við erum hérna núna og ég er bara ótrúlega þakklátur fyrir að vera mættur hingað í bygginguna,“ sagði Irving.

Irving hefur misst af þremur mánuðum af æfingum og leikjum en þessi 29 ára gamli leikmaður gæti í fyrsta lagi mætt til leiks þegar Brooklyn Nets sækja Indiana Pacers heim 5. janúar.