Sport

Einar Vilhjálmsson vígður inn í Heiðurshöll ÍSÍ

Atli Arason skrifar
Einar Vilhjálmsson hélt ræðu eftir að hafa verið tekinn inn í heiðurshöll ÍSÍ.
Einar Vilhjálmsson hélt ræðu eftir að hafa verið tekinn inn í heiðurshöll ÍSÍ. Mummi Lú

Fyrrum spjótkastarinn Einar Vilhjálmsson var rétt í þessu vígður inn í Heiðurshöll ÍSÍ. Einar er fæddur árið 1960 en hann gerði garðinn frægan á níunda og tíunda áratug síðustu aldar.

Árið 1985 vann Einar til gullverðlauna á fjórum Grand Prix mótum og var á verðlaunapalli á öðrum fjórum. Einar setti Íslandsmet í spjótkasti utanhúss með 800gr spjóti árið 1992 með kasti upp á 86,80 metrum og stendur það Íslandsmet enn þá í dag.

Einar Vilhjálmsson stundaði háskólanám í Bandaríkjunum og árið 1984 sló hann bandarískt háskólamet í spjótkasti með kasti upp á 92,42 metra. Í gegnum tíðina hefur þyngd og lögun löglegra spjóta í spjótkasti breyst mikið og núverandi metskrá miðast við árið 1991. Einar er einn af þremur spjótkösturum í heiminum sem á met á heimslista með öllum spjótum.

Einar keppti á þremur Ólympíuleikum fyrir Ísland, í Los Angeles 1984, Seoul 1988 og Barcelona árið 1992. Á löngum keppnisferli tók Einar þátt í um 220 mótum í 22 löndum og hafnaði hann á verðlaunapalli á 200 af 220 mótum.

Einar var þrisvar valin íþróttamaður ársins, árið 1984, 1986 og 1988. Tíu sinnum var Einar á meðal topp tíu í kjörinu á íþróttamanni ársins. Faðir Einars, Vilhjálmur Einarsson var einnig afreksíþróttamaður í frjálsíþróttum en Vilhjálmur var fyrsti Íþróttamaður ársins árið 1957 og var hann alls fimm sinnum útnefndur íþróttamaður ársins á árunum 1957-1962.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.