Nauðgari undir fölsku flaggi fékk mildari dóm í Hæstarétti

Gabríel var ákærður fyrir nauðgun og brot gegn blygðunarsemi með því að hafa sýnt af sér lostugt athæfi og sært blygðunarsemi þegar hann beitti hana blekkingum undir fölsku flaggi á Snapchat og nýtti sér villu hennar um að hann væri annar karlmaður. Allt í þeim tilgangi að eiga í kynferðislegum samskiptum og brjóta á henni.

Ákæran var í þremur liðum. Með því að fá hana til að senda sér kynferðislegar myndir annars vegar og hafa haft samræði við hana í tvígang þar sem hún var með bundið fyrir augu. Var Gabríel sakfelldur fyrir báða þessa liði. Þriðji liðurinn var sá sem Hæstiréttur vísaði frá á þeim forsendum að ákæran væri ekki nægjanlega skýr til að ákærði Gabríel væri fært að taka afstöðu til sakargiftanna og halda uppi vörnum gegn þeim.

Í þeim ákærulið var honum gefið að sök að hafa þvingað konuna til kynferðislegra samskipta við aðra karlmenn sem meðal annars hafi falist í því að kyssa, hafa samræði um leggöng og stunda önnur kynferðismök með mönnunum og láta hana taka upp og senda sér myndir, mynd- eða hljóðupptökur af framangreindum samskiptum með því að hóta að birta opinberlega kynferðislegar myndir af brotaþola.

Hæstiréttur taldi talsvert skorta á að þessi liður ákærunnar væri svo greinargóður og skýr að Gabríel væri fært að taka afstöðu til sakargiftanna og halda uppi vörnum gegn þeim. Var þeim lið ákærunnar því vísað frá héraðsdómi.

Var Gabríel dæmdur í þriggja og hálfs árs fangelsi og horfði Hæstiréttur til þess að brotin hefðu verið fjölmörg og staðið yfir í langan tíma. Þau hefðu verði úthugsuð, vandlega skipulögð og framin af skeytingarleysi gagnvart brotaþola.

Bætur til brotaþola voru hækkaðar úr 1,8 milljón króna í tvær milljónir króna. Dóm Hæstaréttar má lesa hér.

Nýjar og óþekktar leiðir til að villa á sér heimildir

Í dómi Hæstaréttar var meðal annars fjallað um áhrif samskiptamiðla og möguleika á ýmiss konar áður óþekktum leiðum til að villa á sér heimildir og beita blekkingum og hótunum, þar á meðal í kynferðislegum tilgangi. 

Á vef Hæstaréttar segir að löggjafinn hafi átt fullt í fangi með að mæta kröfum um aukna refsivernd kynfrelsis einstaklinga og bregðast við þeim nýju tæknilegu möguleikum sem samfélagsmiðlar hafa skapað til brota í kynferðislegum tilgangi. 

Þá hafi lögregla, ákæruvald og dómstólar jafnframt þurft að aðlaga rannsóknaraðferðir, ákærusmíð og beitingu refsiákvæða að nýrri tækni og nýjum samskiptamöguleikum.