Körfubolti

KR-ingar mæta ríkjandi Ís­lands­meisturum í fyrsta sinn í sjö og hálft ár

Óskar Ófeigur Jónsson skrifar
Björn Kristjánsson í leik með KR í Þorlákshöfn en hann er eini leikmaður síðasta meistaraliðs KR sem er enn að spila með liðinu.
Björn Kristjánsson í leik með KR í Þorlákshöfn en hann er eini leikmaður síðasta meistaraliðs KR sem er enn að spila með liðinu. Vísir/Vilhelm

Aðeins tvö félög hafa orðið Íslandsmeistarar í körfubolta frá árinu 2014. KR og núverandi Íslandsmeistarar Þórs úr Þorlákshöfn. Þessi tvö lið mætast í Icelandic Glacial höllinni í Þorlákshöfn í kvöld.

KR-ingar unnu Íslandsmeistaratitilinn í körfubolta karla sex ár í röð frá 2014 til 2019. Árið 2020 fór Íslandsbikarinn ekki á loft vegna kórónuveirunnar en Þórsarar enduðu sigurgöngu KR-inga síðasta vor.

Leikurinn milli Þór Þorl. og KR í kvöld er sögulegur hvað það varðar að þetta er í fyrsta sinn í sjö og hálft ár sem KR-ingar mæta ríkjandi Íslandsmeisturum í úrvalsdeildinni.

Leikurinn hefst klukkan 20.15 og verður sýndur beint á Stöð 2 Sport. Á undan honum verður sýnt beint frá leik ÍR og Grindavíkur á sömu stöð.

Eins og áður sagði þarf að fara langt aftur í tímann til að finna leik hjá KR þar sem þeir eru að glíma við Íslandsmeistara. Það hefur ekkert gerst síðan að KR og Grindavík léku til úrslita um Íslandsmeistaratitilinn vorið 2014. Grindavík var þá Íslandsmeistari tvö ár þar á undan.

KR tryggði sér Íslandsmeistaratitilinn með sigri í fjórða leiknum í Grindavík 1. maí 2014. KR-ingar héldu Íslandsmeistaratitlinum í 2612 daga þar til að Þórsarar fengu styttuna í hendurnar eftir sigur í úrslitaeinvíginu á móti Keflavík í sumar.

Bæði liðin töpuðu í síðustu umferð, Þórsarar á útivelli á móti Val en KR-ingar á heimavelli á móti Keflavík. KR-liðið hefur reyndar tapað tveimur leikjum í röð og missti auk þessa landsliðsmanninn Þóri Guðmund Þorbjarnarson í atvinnumennsku. Þórir var með 21 stig, 8 fráköst og 7 stoðsendingar í síðasta leik.

KR vann úrslitaeinvígið 3-1 en síðast þegar KR mætti ríkjandi Íslandsmeisturum í deildinni þá töpuðu KR-ingar með sjö stigum á heimavelli á móti þá ríkjandi Íslandsmeisturum Grindavíkur.

Þórsliðið vann báða leiki sína á móti KR á síðustu leiktíð þar af með átta stigum í Þorlákshöfn, 84-76, og með þrjátíu stigum í Vesturbænum, 107-77.




Fleiri fréttir

Sjá meira


×