Gestum Salalaugar brugðið eftir að flugeldum var kastað yfir girðingu

Atli Ísleifsson skrifar 7. desember 2021 08:35

Enginn slasaðist sem betur fer. Kópavogsbær

Sundlaugargestum og starfsfólki Salalaugar í Kópavogi var mörgum mjög brugðið eftir að flugeldum var kastað yfir girðingu laugarinnar í gærkvöldi.

Þóra Jónasdóttir, aðstoðaryfirlögregluþjónn hjá lögreglunni á höfuðborgarsvæðinu, segir að enginn sé grunaður um verknaðinn eins og er en að talið sé að ungmenni hafi verið þarna að verki.

„Það barst tilkynning til okkar um klukkan 21 og það hlaut enginn skaða af,“ segir Þóra í samtali við Vísi.

Greint var frá málinu í hverfisgrúppu á Facebook þar sem starfsfólk laugarinnar segir að þakka megi fyrir að ekki hafi orðið stórslys. Ekki hafi þó munað miklu.

„Sundlaugargestir sem og starfsfólk er í sjokki eftir þetta. Nokkrir sundlaugargestir farnir heim með suð fyrir eyrum,“ segir starfsmaður laugarinnar sem hvetur jafnframt foreldra og forráðamenn að ræða við börn sín um hættuna sem fylgi svona athæfi.

Lögreglumál Kópavogur Sundlaugar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.