Erlent

Bretar bregðast við nýju af­brigði kórónu­veirunnar

Viktor Örn Ásgeirsson skrifar
Sajid Javid heilbrigðisráðherra Bretlands.
Sajid Javid heilbrigðisráðherra Bretlands. Getty Images

Yfirvöld í Bretlandi hafa ákveðið að setja takmarkanir á ferðamenn frá ákveðnum löndum í Suður-Afríku vegna ótta við nýtt afbrigði kórónuveirunnar. Flug frá tilgreindum löndum til Bretlands verður lagt niður.

Sajid Javid, heilbrigðisráðherra Bretlands, segir að takmarkanirnar taki gildi klukkan 12 á morgun, föstudag. Sex lönd munu fara á sérstakan rauðan lista og ferðamönnum frá löndunum verður bannað að heimsækja Bretland. 

Breskir ríkisborgarar, sem hafa verið í Suður-Afríku, þurfa að sæta sóttkví við komuna til landsins. 

Vísindamenn fylgjast grannt með hinu nýja afbrigði en það er talið mögulega betur í stakk búið en önnur afbrigði veirunnar til að komast hjá ónæmisvörnum líkamans. 59 tilfelli hafa greinst í Suður-Afríku, Hong Kong og Botsvana. Engin tilfelli hafa greinst í Bretlandi. 

Sjá einnig: Hafa áhyggjur af nýju og mikið stökkbreyttu afbrigði SARS-CoV-2

Löndin sem takmarkanir taka til eru Suður-Afríka, Namibía, Simbabve, Botsvana, Lesótó og Eswatini, en allt flug frá löndunum til Bretlands verður lagt niður. BBC greinir frá.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.