Heimsmarkmiðin

Veik rödd barna með fötlun og fáir að hlusta ​

Heimsljós
UNICEF

Fötluð börn fá margvíslega skerta þjónustu á sviðum eins og heilbrigði, menntun og félagslegri vernd.

Eitt af hverjum tíu börnum í heiminum býr við fötlun, eða því sem næst 240 milljónir barna. Fötluð börn fá margvíslega skerta þjónustu á sviðum eins og heilbrigði, menntun og félagslegri vernd, að því er fram kemur í nýrri skýrslu frá UNICEF, Barnahjálp Sameinuðu þjóðanna.

Skýrslan nefnist: „Seen, Counted, Included“ og staðfestir að sögn Henriettu Fore, framkvæmdastýru UNICEF, það sem löngum var vitað. Hún segir að börn með fötlun standi frammi fyrir mörgum og fjölþættum áskorunum, rödd þeirra sé veik, fáir að hlusta og alltof oft séu þau einfaldlega skilin eftir.

Skýrslan varpar ljósi á bága stöðu þessa þjóðfélagshóps og fram kemur meðal annars að börn með fötlun séu 42 prósent minni líkur á því að tileinka sér grunnþekkingu í lestri og stærðfræði, líkurnar á því að fötluð börnum standi engin skólavist til boða sé 49 prósent meiri en meðal ófatlaðra. Þegar litið er á heilsufarsþætti sýnir skýrslan að börn með fötlun eru 25 prósent líklegri en ófötluð börn að vera undir kjörþyngd og 34 prósent líklegri til að búa við vaxtarhömlun. Þá eru 53 prósent þeirra líklegri til að þjást af öndunarfærasýkingum.

Í samanburðinum við ófötluð börn kemur fram í skýrslunni að 51 prósent meiri líkur séu á því að fatlað barn sé óhamingjusamt og 32 prósent meiri líkur á því að fötluð börn sæti líkamlegri refsingu.

Með skýrslunni hvetur UNICEF stjórnvöld hvarvetna í heiminum til þess að veita börnum með fötlun jöfn tækifæri. Stjórnvöld eru jafnframt hvött til þess að hafa samráð við fatlaða í stefnumörkun í málefnum þeirra.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.