Innlent

Segir Play stór­hættu­legt launa­fólki

Samúel Karl Ólason skrifar
Drífa Snædal er forseti Alþýðusambands Íslands.
Drífa Snædal er forseti Alþýðusambands Íslands. Vísir/Vilhelm

Drífa Snædal, forseti Alþýðusambands Íslands, segir Play vera „stórhættulegt íslensku launafólki“. Hún hvetur launafólk og fjárfesta að sniðganga flugfélagið.

Þetta segir Drífa á Facebook þar sem hún deilir frétt Mbl um uppbyggingu Play í Litháen. Drífa segir það rökrétta framvindu að forsvarsmenn flugfélagsins leiti lægri launa erlendis. Viðskiptamódel Play gangi út á lækkun launakostnaðar og segir Drífa að til þess hafi félagið lagt til hliðar samskipti á vinnumarkaði og brotið allar reglur. Félagið hefði sölsað undir sig heilt stéttarfélag.

„Play er stórhættulegt íslensku launafólki, ekki bara flugfreyjum og -þjónum heldur öllum. Það er engin tilviljun að miðstjórn ASÍ og formannafundur hefur hvatt til sniðgöngu á félaginu, það er ekki yfirlýsing sem gefin er á hverjum degi,“ segir Drífa.

ASÍ og Play hafa átt í deilum á undanförnum mánuðum vegna kjaramála flugfreyja og flugþjóna. ASÍ hefur haldið því fram að kjör þessa starfsfólk séu of lág og hafa forsvarsmenn ASÍ hafa áður hvatt Íslendinga til að sniðganga Play.

Deilurnar hafa meðal annars snúið að Íslenska flugstéttafélaginu (ÍFF), sem áður hét Íslenska flugmannafélagið. ASÍ skilgreinir ÍFF sem „gult stéttarfélag“ með beina tengingu við atvinnurekandann. Því hefur ÍFF mótmælt.

Í gær sagði ASÍ frá því að stjórn Norræna flutningamannasambandsins (NTF) hefði neitað ÍFF um inngöngu vegna „augljósra galla“ á kjarasamningi félagsins við umbjóðendur sína sem starfa hjá Play.

Sjá einnig: Íslenska flugstéttafélaginu neitað um inngöngu í Norræna flutningamannasambandið

Harma ákvörðunina og halda baráttunni áfram

Stjórn ÍFF segist harma þá ákvörðun stjórnar Norræna flutningamannasambandsins (NTF) að neita þeim um inngöngu og segist ætla að halda baráttu fyrir sína félagsmenn.

Meðlimir ÍFF eru 81, samkvæmt svörum Vignis Arnar Guðnasonar, formanns, og Friðriki Má Ottesen, varaformanni, við fyrirspurn Kjarnans.

Í svari við fyrirspurn Vísis um ákvörðun NTF segir stjórn ÍFF að þau harmi niðurstöðuna mjög. Á árum áður, fyrir gjaldþrot WOW air hafi ÍFF verið í NTF og í Evrópska- og Alþjóðlega flutningamannasamböndunum.

„Á þessum árum átti Íslenska flugmannafélagið mjög farsælt samstarf við þessi sambönd og í gegnum þau sérstaklega góð samskipti við Flugfreyjufélag Íslands (FFÍ) sem og önnur Norræn og evrópsk systurfélög,“ segir í svarinu.

Þá segir að stjórn NTF hafi hafnað umsókn ÍFF vegna mótmæla Flugvirkjafélags Íslands og Félags íslenskra atvinnuflugmanna.

„ÍFF mun ekki leggja árar í bát og ætlar að halda áfram sinni stéttarfélags baráttu fyrir sína félagsmenn í hvívetna.“


Tengdar fréttir

Play opnar úti­bú í Litháen

Lággjaldaflugfélagið Play mun opna útibú í Vilníus í Litháen í næsta mánuði. Þetta kemur fram í tilkynningu frá félaginu tengt ársfjórðungsuppgjöri, en þar var jafnframt sagt frá því að sætanýting félagsins hafi aukist um 30% milli mánaða og var 67,7% í október.

Play bætir við fimmta og sjötta á­fanga­staðnum sínum á Spáni

Flugfélagið Play hefur bætt spænsku áfangastöðunum Mallorca og Malaga við sumaráætlun sína árið 2022. Það þýðir að Play selur nú flug til sex áfangastaða á Spáni en flugfélagið býður nú þegar upp á áætlunarflug til Barcelona, Tenerife, Alicante og Gran Canaria.

Rakel Eva flytur sig frá Marel til Play

Rakel Eva Sævarsdóttir hefur verið ráðin forstöðumaður sjálfbærni- og samfélagsábyrgðar hjá flugfélaginu Play. Í tilkynningu frá flugfélaginu segir að hún muni í starfinu móta og innleiða sjálfbærnistefnu félagsins ásamt því að skilgreina sjálfbærnitengd markmið þess sem snúa að umhverfismálum, félagslegum þáttum, stjórnarháttum og öðrum rekstrarlegum þáttum.

„Hryllings­sagna­beiðni“ ASÍ var hvatning um að skipta um stéttar­fé­lag

Í tölvu­pósti sem Al­þýðu­sam­band Ís­lands (ASÍ) sendi á flug­liða sem starfa hjá flug­fé­laginu Play voru þeir hvattir til að ganga í Flug­freyju­fé­lag Ís­lands (FFÍ) og þeim heitið trúnaði sem vildu hafa sam­band við sam­bandið. „Það er alltaf vel­komið að hafa sam­band við okkur per­sónu­lega, í síma eða tölvu­pósti,“ stóð í lok póstsins. Birgir Jóns­son, for­stjóri Play, hélt því fram í Silfrinu í dag að ASÍ hafi af fyrra bragði sent starfs­mönnum hans tölvu­pósta þar sem væri óskað eftir „hryllings­sögum“.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.