Viðskipti innlent

Fimm nýjar lyftur á höfuð­borgar­svæðið og hefja snjó­fram­leiðslu

Eiður Þór Árnason skrifar
Von er á tveimur nýjum stólalyftum í Bláfjöll.
Von er á tveimur nýjum stólalyftum í Bláfjöll. Vísir/Vilhelm

Sveitarfélögin á höfuðborgarsvæðinu hafa náð samkomulagi um 5,2 milljarða króna fjárfestingu í uppbyggingu skíðasvæða til ársins 2026.

Gert er ráð fyrir því að settar verði upp tvær nýjar stólalyftur í Bláfjöllum sem fá nafnið Gosi og Drottning. Þá er meðal annars stefnt að snjóframleiðslu á skíðasvæðunum á höfuðborgarsvæðinu, uppsetningu nýrrar toglyftu í Kerlingardal, lyftu í Eldborgargili og Skálafelli auk uppbyggingar á skíðagöngusvæði. 

Þetta kemur fram í tilkynningu en sérstakur verkefnahópur hefur verið starfræktur á vettvangi Samtaka sveitarfélaga á höfuðborgarsvæðinu (SSH) til þess að undirbúa verkefnin og fylgja þeim eftir. Þá hefur verið ráðinn verkefnastjóri sem starfar með verkefnahópnum og stjórnendum skíðasvæðisins meðal annars til að fylgja eftir samningum, hönnun og framkvæmd ásamt almennu utanumhaldi verkefnisins.

Frá vinstri: Björg Fenger fulltrúi í Samráðsnefnd skíðasvæðanna og verkefnahópi um framkvæmdirnar, Páll Björgvin Guðmundsson framkvæmdastjóri SSH, Gunnar Einarsson formaður stjórnar SSH, Ómar Ívarsson og Ingvar Ívarsson frá Doppelmayr skíðalyftum, Hildigunnur Hafsteinsdóttir lögfræðingur SSH.Aðsend

Gert ráð fyrir að Bláfjöll fái nýjar lyftur 2022 og 2023

Í fyrsta áfanga verkefnisins hefur verið samið við Doppelmayr skíðalyftur ehf., sem var lægstbjóðandi í samkeppnisútboði, um kaup og uppsetningu á skíðalyftunum Gosa, sem áætlað er að verði afhent á árinu 2022, og Drottningu, sem áætlað er að verði afhent á árinu 2023. 

Undirbúningsvinna vegna framkvæmdanna er þegar hafin og gengur samkvæmt áætlunum, að því er fram kemur í tilkynningu. Heildarkostnaður af uppsetningu lyftna og tengdum verkefnum í fyrsta áfanga er áætlaður um 2,4 milljarðar króna. 

Fulltrúar stjórnar SSH og Doppelmayr á Íslandi hafa skrifað undir samning þess efnis. Við sama tækifæri fór fram kynning á fyrirhuguðum framkvæmdum fyrir helstu hagsmunaaðilum, svo sem formönnum skíðafélaga á höfuðborgarsvæðinu.

Samninginn undirrituðu Gunnar Einarsson, formaður stjórnar SSH og Páll Björgvin Guðmundsson, framkvæmdastjóri SSH og Ómar Ívarsson og Ingvar Ívarsson fyrir hönd Doppelmayr á Íslandi.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.