Innlent

Segir að auðveldlega hefði mátt leysa vandann hjá Eflingu

Kolbeinn Tumi Daðason og Sunna Karen Sigurþórsdóttir skrifa
Vilhjálmur ásamt Sólveigu Önnu á fundi hjá ríkissáttasemjara. Þennan dag var stutt í brosið hjá þeim báðum.
Vilhjálmur ásamt Sólveigu Önnu á fundi hjá ríkissáttasemjara. Þennan dag var stutt í brosið hjá þeim báðum. vísir/vilhelm

Vilhjálmur Birgisson, formaður Verkalýðsfélags Akraness, segist eins og fleiri vera sleginn vegna afsagnar Sólveigar Önnu Jónsdóttur sem formanns Eflingar og uppsagnar Viðars Þorsteinssonar framkvæmdastjóra.

Vilhjálmur var mættur á formannafund hjá Starfsgreinasambandinu í morgun, ólíkt Sólveigu Önnu og Viðari. Varaformaður og varaframkvæmdastjóri Eflingar mættu fyrir hönd félagsins þar sem næstu skref í kjaramálum verða rædd fram eftir degi.

Vilhjálmur segir eftirsjá af Sólveigu Önnu.

„Já, ég held að það þurfi ekkert að fara í grafgötur með það. Sólveig hefur komið inn með mikinn stormsveip. Ég held að Lífskjarasamningurinn sem við gengum frá síðast sýni svo ekki verði um villst að hennar barátta þar ýtti undir það að okkur tókst að landa góðum kjarasamningi handa þeim sem höllustum fæti standa.“

Vilhjálmur segir tímann þurfa að leiða í ljós hvað gerist næst. Nú hefjist undirbúningur í að móta kröfugerðir og vonandi hafi vistaskiptin eins lítil áhrif og kostur sé. Aðspurður segir hann þau Sólveigu alls ekki alltaf hafa verið sammála.

„Ég held að við Sólveig vitum það. Við höfum oft tekist á um leiðir og annað slíkt, erum stundum sammála um að vera ósammála. En það skiptir máli þegar á hólminn er komið að fólk standi saman og vinni saman. Því það er alveg ljóst að með samstöðunni einni saman náum við að bæta kjör okkar félagsmanna.“

Segist sjálfur hafa hlaupið á sig með afsögn

Málið hjá Eflingu sé innanhússmál, sem leysa þurfi innan frá.

„Í mínum huga hefði verið auðvelt að leysa þetta mál. Með því að setjast niður, fá óháðan aðila til að greina stöðuna og komast svo að sameiginlegri niðurstöðu,“ segir Vilhjálmur.

Aðspurður hvort Sólveig hafi hlaupið á sig með ákvörðun sína segir Vilhjálmur:

„Sá sem hér stendur getur vart talað um það. Ég sagði af mér sem fyrsti varaforseti Alþýðusambandsins og í því tilfelli var ég of fljótur á mér.“

Vilhjálmur segist hafa rætt við Viðar í morgun. Þau samskipti hafi verið góð sem fyrr.

„Auðvitað er þetta mikið högg, líka fyrir þau. Við ræddum bara stöðuna, meðal annars hvað væri fram undan og svo framvegis.

Þetta er bara í höndum þeirra og ákvörðun þeirra. Eins og staðan er í dag virði ég hana.“

Björn Snæbjörnsson, formaður verkalýðsfélagsins Einingar – Iðju minnir á að Sólveig Anna Jónsdóttir sé enn þá varaformaður Starfsgreinasambandsins. Hún hafi ekki sagt af sér því embætti.

„Þetta er náttúrulega innanhússmál hjá Eflingu en auvðitað vont þegar svona gerist. Auðvitað er missir af Sólveigu,“ segir Björn.

Framhaldið verði að koma í ljós.

„Maður er ekki enn þá búinn að átta sig á því hvað hefur þarna gerst. Það verður bara að koma í ljós.“

Hann minnir á að ár sé þar til samningar renni út. Rætt verði um næstu skref í þeim efnum á fundinum í dag.

„Við erum að skoða stöðuna, hvernig hún er í dag. Og leggja línurnar hvernig félögin munu undirbúa sig í kröfugerðum. Hvenær Starfsgreinasambandið verður tilbúið. Við gerum þetta alltaf til að setja félögin svolítið í gang. Hvað verður með framtíðina verður að koma í ljós.“

Hann segist ekki hafa hugmynd um hvort hún geri það en hann hafi ekki heyrt í henni.


Tengdar fréttir

Á von á því að Sólveig Anna segi af sér sem varaforseti ASÍ

Drífa Snædal, forseti ASÍ, reiknar með að Sólveig Anna Jónsdóttir, fráfarandi formaður Eflingar, segi af sér sem annar varaforseti ASÍ í dag. Drífa segir að afsögn Sólveigar Önnu sem formaður Eflingar hafi komið sér á óvart. Þá reiknar hún með að varaformaður félagsins taki við sem formaður.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.