Skerða frelsi læknis sem aðstoði Navalní

Samúel Karl Ólason skrifar 14. október 2021 14:45

Anastasia Vasilyeva þegar hún var handtekin fyrir utan fangelsi Navalnís í apríl. EPA/SERGEI ILNITSKY

Rússneskur dómstóll skerti verulega ferðafrelsi læknis sem annaðist Alexei Navalní eftir að sterkum efnum var skvett í augað á honum árið 2017 og hefur stutt við bakið á honum. Anastasia Vasilyeva var dæmd fyrir að brjóta gegn sóttvarnarreglum með því að hvetja fólk til að taka þátt í mótmælum gegn fangelsun Navalnís fyrr á þessu ári.

Læknirinn er formaður verkalýðsfélags lækna sem yfirvöld í Rússlandi hafa skilgreint sem útsendara erlendra aðila.

Vasilyeva má ekki yfirgefa heimili sitt að nóttu til, ekki fara frá Moskvu og ekki sækja fjöldafundi. Þá verður hún að gera yfirvöldum grein fyrir sér tvisvar sinnum í mánuði. Takmarkanir þessar eru til eins árs, samkvæmt frétt Reuters.

Fyrr á árinu dæmdi dómstóll talskonu Navalnís til sambærilegrar takmörkunar í átján mánuði. Aðrir bandamenn Navalnís hafa einnig hlotið sambærilegan dóm.

Navalní var í febrúar dæmdur í þriggja og hálfs árs fangelsi fyrir að hafa rofið skilorð og var gert að sitja inni í tvö og hálft ár þar sem hann hafði áður verið í stofufangelsi í eitt ár.

Hann var dæmdur eftir að hann sneri aftur til Moskvu frá Þýskalandi fyrir að hafa rofið skilorð vegna umdeilds dóms sem hann fékk fyrir fjárdrátt árið 2014.

Navalní átti að gefa sig fram við lögreglu með reglulegu millibili. Það gerði hann ekki undir lok síðasta árs enda var hann á sjúkrahúsi í Berlín eftir að eitrað hafði verið fyrir honum í borginni Tomsk.

Undir lok síðasta árs skipuðu fangelsismálayfirvöld Rússlands Navalní að snúa aftur til Rússlands þar sem hann væri á skilorði vegna dómsins frá 2014. Var honum gert að mæta á fund í Rússlandi þann 29. desember, og sagt að annars ætti hann á hættu að vera gert að afplána dóm sinn næst þegar hann færi til Rússlands.

Skilorðsdómur Navalní féll úr gildi þann 30. desember.

Hann sneri þó aftur til Rússlands um leið og hann gat, að eigin sögn, og var handtekinn við komuna til landsins. Skömmu síður var hann svo dæmdur.

Nú hefur Navalní fengið stöðu hryðjuverkamanns í dómskerfi Rússlands og hefur hann verið sakaður um tilraun til ofbeldisfullrar valdatöku. Samtök sem Navalní stofnaði og kallast Sjóður gegn spillingu hafa verið skilgreind sem öfgasamtök.

Samtökunum hefur verið gert að loka skrifstofum og stöðva starfsemi. Í gegnum árin hafa samtökin varpað ljósi á meinta spillingu í ríkisstjórn Vladimírs Pútín, forseta Rússlands til fjölda ára.

Sjá einnig: Saka Navalní um að brjóta á réttindum fólks

Eftir að Navalní var dæmdur í fangelsi skipulögðu bandamenn hans mótmæli víða um Rússland. Mótmælt var í tugum borga landsins í febrúar en yfirvöld mættu mótmælendum með töluverðri hörku. Hundruð mótmælenda voru handteknir.

Navalní og bandamenn hans hafa svo í kjölfarið verið ákærðir vegna þessara mótmæla og annarra.

Rússland

Tengdar fréttir

Metfjöldi smitaðra og látinna í Rússlandi

Yfirvöld í Rússlandi greindu í morgun frá því að metfjöldi manna hefði bæði smitast af Covid-19 og dáið vegna sjúkdómsins sem kórónuveiran veldur. Faraldurinn hefur náð nýjum hæðum í Rússlandi og er að reynast heilbrigðisstarfsmönnum erfiður.

14. október 2021 09:50

Tileinkar friðarverðlaunin sex blaðamönnum hans sem voru myrtir

Dmitry Muratov, blaðamaður og fyrrverandi ritstjóri rússneska miðilsins Novaya Gazeta tileinkaði friðarverðlaun Nóbels sem hann hlaut í morgun þeim sex blaðamönnum sem hafa verið myrtir á meðan þau störfuðu fyrir hann í Rússlandi.

8. október 2021 16:58

Rússneskur ritstjóri sem flúði land eftirlýstur

Yfirvöld í Rússlandi hafa lýst eftir þekktum rússneskum rannsóknarblaðamanni sem hefur tekið þátt í umfangsmiklum rannsóknum sem beinast gegn ríkisstjórn Vladimírs Pútín, forseta Rússlands. Roman Dobrokhotov, stofnandi og ritstjóri Insider, er eftirlýstur fyrir að hafa laumað sér yfir landamæri Rússlands og Úkraínu.

30. september 2021 17:01

Enn fleiri sjálfstæðum fjölmiðlum lokað í Rússlandi

Tveimur rússneskum fjölmiðlum hefur verið lokað af yfirvöldum landsins. Þar er um að ræða fréttavefina Otrkytye Media og MBKh Media, auk þess sem hjálparsamtökunum Otkrytki hefur einnig verið lokað.

5. ágúst 2021 10:36

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.