Lífið

Fékk lag frá Hildi Guðnadóttur í stuttmyndina sína

Sylvía Rut Sigfúsdóttir skrifar
Eydís Eirvar tilnefnd til Eddunnar 2019 fyrir stuttmynd sína Islandia.
Eydís Eirvar tilnefnd til Eddunnar 2019 fyrir stuttmynd sína Islandia. AÐsent

Eydís Eir Brynju- og Björnsdóttir gaf nýlega út stuttmyndina Chrysalis. Myndin fjallar um Tourette heilkennið og í aðalhlutverki er 13 ára stúlka. Lag eftir margverðlaunaða tónskáldið Hildi Guðnadóttur er notað í myndinni.

Eydís Eir er nýkomin heim frá Prag eftir nám í FAMU. Lokaverkefnið hennar var stuttmynd tekin á 16 mm filmu og er með tónlist eftir Hildi Guðnadóttur. 

Eydís var tilnefnd til Eddunnar 2019 fyrir stuttmynd sína Islandia sem var byggð á eigin reynslu þegar hún ferðaðist erlendis og lenti í fangelsi fyrir það eina að kæra ofbeldið sem hún var fyrir. Myndin ferðaðist á fjölmörg festivöl eins og hina virtu kvikmyndahátíð Austin film festival.

„Chrysalis er hins vegar mjög ólík Islandia. Myndin er súrrealískur, tilraunakenndur dokú-skáldskapur (e.docu-fiction) og fjallar um 13 ára stúlku Vanessku sem er greind með Tourette heilkennið og reynir hvað hún getur til að takast á við nýja veruleika sinn. Myndin komst inn á stærstu heimildarmyndahátíð í Mið -Evrópu, Jihlava film festival í Tékklandi,“ segir Eydís.

Stilla úr Chrysalis.

Braust út úr skelinni

Þess má geta að konur eru í helstu hlutverkum fyrir framan og aftan vélina, tökukonan, framleiðandi, aðstoðarleikstjóri, tónlist og auðvitað handrit og leikstjórn. 

„Vanesska er aðeins 13 ára svo samkvæmt lögum höfðum við aðeins 7 tíma á dag með henni á tökustað og tvo daga í tökur. Það er eiginlega ótrúlegt hvað við náðum að gera á þessum stutta tima miða við próduktsjónið. Ég er enn að átta mig á hvaða “genre” eða í hvað a flokk myndin er í en það er það sem ég elska við hana. Þetta er á milli skáldskapar og veruleika, súrrealísk en svo er hún einnig mjög stílfærð. Það er teiknimynd í myndinni sem var mjög skemmtilegt ferli sem ég vil gjarna gera meira af í framtíðinni,“ segir Eydís.

„Vanesska er nýgreind með Tourette eða í febrúar á þessu ári svo ég varð að fara varlega og eyddi miklum tíma með henni svo hún upplifði mikið öryggi í kringum mig. Fyrir þá sem ekki vita eru helstu einkenni Tourette svonefndir kækir, sem eru tilgangslausar en óviðráðanlegar hreyfingar eða hljóð. Einnig fylgja oft áráttu- og þráhyggjueinkenni (OCD) og einkenni athyglisbrests og ofvirkni (ADHD) Vanesska elskaði verkefnið því ég bjó til draumkenndan karakter handa henni sem ég tel að hafi hjálpað hennar að brjótast út úr skelinni. Á þversagnarkenndan hátt er stundum gott að skapa karakter sem fær þinn eigin persónuleika að koma fram, ef það meikar séns.“

Stilla úr Chrysalis

Billie Eilish ómetanleg

Vanesska er ekki lærð leikkona og þetta var hennar fyrsta skipti fyrir framan myndavélina.

„Ég skapaði ákveðna umgjörð eða heim fyrir hana svo hún varð óhræddari. Það eru allskonar hugmyndir sem ég vann með og fékk innblástur frá myndum eftir Maya Deren og Alejandro Jodorowsky. Ég hef velt fyrir mér Tourette heilkenninu í mörg ár, ég veit ekki af hverju, kannski vegna þess þetta er óútskýranlegt og ólæknanlegt. Ég gerði mikla rannsóknarvinnu og fór aftur til tíma þegar fólk vissi ekkert um þetta. Það var mjög erfitt að lesa um hvernig var komið fram við fólk fyrir hundrað árum eða tuttugu til þrjátíu árum sem er ekkert svo langt síðan. Ég hugsaði um fortíðina og hvað erfist í DNA á fólki, ef sjúkdómurinn erfist hvað þá langt aftur í tímann, erfast áföll ? Vannesska er svo heppin að búa í heimi þar sem átrúnaðargoðið hennar Billie Eilish talar opinskátt um sitt Tourrette. Það er alveg ómetanlegt.“

Tónskáldið Hildur Guðnadóttir tók við Óskarsverðlaunum, fyrst Íslendinga. Hún hefur einnig fengið Emmy, Grammy, BAFTA, Golden Globe, Critic's Choice og fleiri verðlaun.Getty

Hreint ótrúlegt að fá Hildi

Eydís segir að líf fólks með Tourette sé samt áskorun. 

„Hún hefur alveg upplifað það að fólk heldur að hún sé að leika, jafnvel kennarinn hennar hélt hún gæti stjórnað þessu og bara hætt. Ég var að hlusta mikið á Hildi þegar ég var að skrifa, svo þegar ég heyrði lagið hennar Opaque og gat ekki komið því úr hausnum á mér svo ég ákvað að prófa að spyrja. Fólkið í kringum mig og mentorinn minn héldu að ég væri eitthvað klikkuð að reyna ná í Óskarsverðlaunahafa en það tókst. Einn framleiðandi fannst það hreint ótrúlegt því hann átti svo erfitt með að fá Sigurrós í stóru myndina sína svo kem ég og næ í Hildi Guðnadóttur í litlu myndina mína. Við notuðum þá tækni að spila tónlistina hennar þegar við vorum í tökum, þá skapaðist rétta andrúmsloftið og atriðið varð að því sem það átti að vera.“

Hér fyrir neðan má sjá sýnishorn úr myndinni Chrysalis en á síðunni Patreon er hægt að horfa á hana í heild sinni og styðja þannig við dreifingu á myndinni.


Tengdar fréttir






Fleiri fréttir

Sjá meira


×