Fá hærri bætur vegna þaks sem fauk af í miklu óveðri

Desemberstormurinn 2015 var sannkallað aftakaveður og hlaust töluvert tjón af völdum þess víða um land. Þar á meðal á húsi í ótilgreindu bæjarfélagi þar sem hluti þaksins fauk af, og þakklæðning flettist af á öðrum þakhlutum að hluta.

Í húsinu bjó ekkja sem lést árið 2016 en ágreiningur var uppi um hversu háar bætur tryggingafélagið ætti að greiða. Eftir að konan lést tók dánarbú hjónanna við málinu. TM hafði greitt út 16,8 milljónir króna vegna tjónsins, auk rúmlega milljónar, samtals tæplega átján milljónir króna.

Dánarbúið taldi hins vegar að tjónið sem hlaust af hafi verið umfangsmeira og krafðist það 38 milljóna króna í bætur, en til vara 23,6 milljóna króna.

Húsið skemmdist mikið í óveðrinu og eftirköstum þess og var það metið óíbúðarhæft, og að lokum rifið árið 2019.

Vatnsleki vegna gleymsku verktaka

Í dómi héraðsdóms er því lýst að auk foktjónsins hafi orðið miklar vatnsskemdir á húsinu. Þar kemur einnig fram að verktakar á vegum tryggingafélagsins hafi gleymt að setja yfirbreiðslusegl sem félagið útvegaði sérstaklega í janúar 2016 til að loka þakinu. Var það ekki gert fyrr en í apríl sama ár. Áður hafði þakinu verið lokað til bráðabirgða með byggingaplasti, auk þess sem að björgunarsveitir hefðu gengið frá þakinu í óveðrinu til að fyrirbyggja frekara foktjón.

Húseigandi óskað eftir skýrslu frá Mannviti um ástand hússins sem gefin var út í mars árið 2016. Þar var einnig fyrra tjón á húsinu frá árinu 1999 tekið með í reikninginn. Í skýrslu Mannvits kom fram að áætlaður kostnaður við viðgerðir á húsinu væru 38 milljónir. Aðalkrafa dánarbúsins byggði á þessu mati.

Tryggingafélagið mótmælti þessu mati og framkvæmdi eigin greiningu. Niðurstaðan þar var að kostnaðurinn næmi 17,0 milljónum króna sem boðnar voru eigendum hússins, auk 3,5 milljóna fyrir að ljúka málinu. Húseigandi hafnaði boðinu og greiddi þá tryggingafélagið 16,8 milljónir auk þess sem það hafði áður greitt rúma milljón, samtals 17,9 milljónir.

Þaulreyndur matsmaður mat tjónið á 23,6 milljónir króna

Vegna ágreiningsins var kallaður til þaulreyndur matsmaður sem mat að húsið væri viðgerðarhæft og að kostnaður við viðgerð væri 23,6 milljónir króna. Tryggingafélagið taldi hins vegar að tjónið væri fullbætt.

Frétt um afleiðingar óveðursins frá árinu 2015:

Héraðsdómur féllst ekki á aðalkröfu dánarbúsins um 38 milljónir í bætur, þar sem skýrslan sem sú krafa væri byggð á fæli einnig í sér tjón sem varð árið 1999, sem væri löngu fyrnt.

Eftir stóð þá mat matsmannsins sem mat tjónið á 23,6 milljónir króna og spurningin hvort að tryggingafélagið bæri ábyrgð á vatnslekanum sem varð eftir foktjónið í desember 2016.

Í dómi héraðsdóms Reykjavíkur segir að ekki sé hægt að fella það tjón sem varð vegna vatnsleka á húsinu eftir foktjónið á eigendur hússins. Í ljósi þess að tryggingafélagið hafi útvegað iðnaðarmenn til að ganga frá vettvangi og greitt fyrir efni til þess, hafi eigendur hússins mátt líta svo á að tryggingafélagið bæri ábyrgð á lagfæringum hússins frá því að lekinn hófst í kjölfar óveðurs og þangað til gengið var frá frágangi þaksins fimm mánuðum síðar.

Kemur einnig fram í dómi héraðsdóms að tjón sem varð af völdum vatnstjónsins gæti vel numið því sem eftir stæði þegar búið væri að draga þær bætur sem tryggingafélagið hafði þegar greitt frá mati matsmannsins frá auk annars, alls um 4,6 milljónir króna.

Var tryggingafélagið því dæmt til að bæta fok- og vatnstjón á fasteigninni sem þakið fauk af að hluta í ofsaveðrinu í samræmi við matsgerðina. Alls þarf tryggingafélagið að greiða dánarbúinu 4,6 milljónir króna, auk málskostnaðar upp á 1,7 milljónir króna.